Mokanda ya mibale ya Ntango

19 Na nsima, Yehoshafate mokonzi ya Yuda azongaki malamu*+ na ndako na ye* na Yerusaleme. 2 Yehu+ mwana ya Hanani,+ momoni-bimonaneli, akendaki kokutana na Mokonzi Yehoshafate mpe alobaki na ye: “Osengelaki nde kokende kosalisa moto mabe?+ Mpe osengeli nde kolinga bato oyo bayinaka Yehova?+ Mpo na yango, Yehova asilikeli yo. 3 Atako bongo, Nzambe amoni makambo ya malamu epai na yo,+ mpo olongolaki banzete ya losambo* na ekólo mpe obongisi motema na yo* mpo na koluka Nzambe ya solo.”+

4 Yehoshafate akobaki kofanda na Yerusaleme. Mpe akendaki lisusu kotala bato, banda na Beere-sheba tii na etúká ya ngombangomba ya Efraime,+ mpo na kozongisa bango epai ya Yehova Nzambe ya bankɔkɔ na bango.+ 5 Atyaki mpe basambisi na ekólo mobimba, na bingumba nyonso ya Yuda oyo ebatelami makasi, engumba na engumba.+ 6 Mpe alobaki na basambisi: “Bókeba na oyo bozali kosala, mpo bozali kosambisa mpo na moto te, kasi mpo na Yehova; mpe azali elongo na bino ntango bozali kokata makambo.+ 7 Sikoyo, tiká ete kobanga ya Yehova ekwela bino.+ Bókeba na oyo bozali kosala, mpo epai ya Yehova Nzambe na biso kozanga bosembo,+ kopona bilongi+ mpe kanyaka ezalaka te.”+

8 Na Yerusaleme mpe, Yehoshafate atyaki Balevi mosusu mpe banganga-nzambe ná bankumu mosusu ya mabota ya batata ya Yisraele mpo bázala basambisi na nkombo ya Yehova mpe bákataka makambo ya bato oyo bafandi na Yerusaleme.+ 9 Lisusu, apesaki bango mitindo oyo: “Talá oyo bokosala na kobanga Yehova, na bosembo mpe na motema mobimba:* 10 Mbala nyonso oyo bandeko na bino oyo bafandi na bingumba mosusu bakoyela bino likambo oyo etali kosopa makila,+ to bakoya na motuna mpo na mobeko moko, mitindo, malako to bikateli ya lisambisi, bosengeli kokebisa bango mpo bámema ngambo te na miso ya Yehova, soki te nkanda na ye ekongalela bino mpe bandeko na bino. Ndenge wana nde bokosala mpo bómema ngambo te. 11 Talá Amaria, nganga-nzambe mokonzi oyo atyami mpo na kotambwisa bino na makambo nyonso oyo etali Yehova.+ Zebadia mwana ya Yishimaele azali mokambi ya libota ya Yuda na makambo nyonso oyo etali mokonzi. Mpe Balevi bakozala basungi mpo na bino. Bózala makasi mpe bósala mosala na mpiko, mpe tiká Yehova azala na baoyo bazali kosala oyo ezali malamu.”*+