Kobima
11 Na yango, Yehova alobaki na Moize ete: “Nakobakisela Farao ná Ezipito etumbu moko lisusu. Nsima na yango, akotika bino bólongwa awa, bókende.+ Ntango akotika bino bókende, akobengana mpenza bino bólongwa awa.+ 2 Sikoyo yebisá bato ete mobali nyonso mpe mwasi nyonso asɛnga epai ya moninga na ye, biloko ya palata mpe biloko ya wolo.”+ 3 Mpe Yehova asalaki ete Bayisrele bándimama na miso ya Baezipito. Lisusu, na mokili ya Ezipito, Moize akómaki moto ya lokumu mpenza epai ya basaleli ya Farao mpe epai ya bato.
4 Bongo Moize alobaki ete: “Yehova alobi boye: ‘Pene na midi ya butu nakoleka na kati ya Ezipito,+ 5 mpe mwana nyonso ya liboso na mokili ya Ezipito akokufa,+ banda na mwana ya liboso ya Farao oyo azali kofanda na kiti na ye ya bokonzi tii na mwana ya liboso ya moombo mwasi oyo azali kosala na enikelo ya mabɔkɔ mpe mwana nyonso ya liboso ya etonga.+ 6 Mpe kolela monene ekozala mpenza na mokili mobimba ya Ezipito, kolela oyo eyokaná naino te, mpe kolela ya bongo ekoyokana lisusu te.+ 7 Kasi ata mbwa ekongalela* Bayisraele te mpe banyama na bango te mpo bóyeba ete Yehova akoki kosala bokeseni kati na Baezipito mpe Bayisraele.’+ 8 Mpe basaleli na yo nyonso bakokita mpenza epai na ngai mpe bakofukama bilongi na nse liboso na ngai mpe bakoloba ete: ‘Kende, yo ná bato nyonso oyo bazali kolanda yo.’+ Mpe nsima na yango, nakobima.” Na yango, alongwaki epai ya Farao, abimi na nkanda makasi.
9 Na yango, Yehova alobaki na Moize ete: “Farao akoyokela bino te,+ mpo makamwisi na ngai ekóma lisusu ebele na mokili ya Ezipito.”+ 10 Moize ná Arona basalaki makamwisi oyo nyonso liboso ya Farao,+ kasi Yehova atikaki motema ya Farao ekóma makasi, bongo atikaki te Bayisraele bálongwa na mokili na ye, bákende.+