Yosua

9 Bakonzi nyonso oyo bazalaki na ngámbo ya wɛsti ya Yordani+ bayokaki likambo oyo esalemaki. Bazalaki na etúká ya ngombangomba, na Shefela, pembenipembeni ya bokula mobimba ya Mbu Monene,*+ mpe liboso ya Liban, elingi koloba bakonzi ya Bahiti, Baamore, Bakanana, Baperizi, Bahivi, mpe Bayebusi.+ 2 Bongo basalaki boyokani mpo na kobunda na Yosua mpe Yisraele.+

3 Bato ya Gibeone+ mpe bayokaki makambo oyo Yosua asalaki Yeriko+ mpe Ai.+ 4 Bongo basalaki na mayele mpenza mpe batyaki biloko na bango ya kolya na basaki oyo ebebábebá. Batyaki likoló ya bampunda na bango basaki yango ná milangi ya vinyo ya mposo ya nyama oyo elɛmbálɛmbá, epasuká mpe babambábambá; 5 balataki mpe bilamba oyo enzuluká ná basandale oyo ebebábebá mpe oyo babambábambá. Mampa nyonso oyo bamemaki ezalaki oyo ekaukákauká mpe epanzanápanzaná. 6 Bongo bakendaki epai ya Yosua na kaa na Gilgale+ mpe balobaki na ye mpe na mibali ya Yisraele boye: “Touti na mokili moko mosika. Sikoyo, bósala boyokani* ná biso.” 7 Kasi, mibali ya Yisraele balobaki na Bahivi+ boye: “Mbala mosusu bofandaka nde penepene na biso. Bongo ndenge nini tokoki kosala kondimana na bino?”+ 8 Bato yango balobaki na Yosua: “Tozali basaleli* na yo.”

Na yango Yosua alobaki na bango: “Bino banani, mpe bouti wapi?” 9 Mpe bango balobaki na ye: “Basaleli na yo bauti na mokili moko mosika mpenza+ mpo na nkombo ya Yehova Nzambe na yo, mpo toyokaki nsango ya lokumu na ye mpe nyonso oyo asalaki na Ezipito+ 10 mpe makambo nyonso oyo asalaki bakonzi mibale ya Baamore oyo bazalaki na ngámbo* mosusu ya Yordani, elingi koloba, Mokonzi Sihone+ ya Heshibone mpe Mokonzi Oge+ ya Bashane, oyo azalaki na Ashetarote. 11 Yango wana, bankulutu na biso mpe bato nyonso oyo bafandi na mokili na biso balobaki na biso: ‘Bózwa biloko na bino ya kolya mpo na mobembo mpe bókende kokutana na bango. Bóloba na bango: “Tokozala basaleli na bino;+ sikoyo, bósala kondimana na biso.”’+ 12 Mampa oyo tozwaki mpo na kolya na mobembo ezalaki mɔtɔ mokolo oyo tolongwaki na bandako na biso mpo na koya epai na bino. Sikoyo, talá ndenge ekaukikauki mpe epanzanipanzani.+ 13 Mpe milangi ya vinyo oyo ya mposo ya nyama ezalaki naino ya sika ntango totondisaki yango, kasi sikoyo epasukipasuki.+ Lisusu, bilamba na biso enzuluki mpe basandale na biso ebebi mpo mobembo ezalaki molai mingi.”

14 Na yango, mibali ya Yisraele bazwaki* ndambo ya biloko ya kolya ya bato yango, kasi batunaki Yehova te.+ 15 Bongo Yosua ayokanaki na bango na kimya+ mpe asalaki ná bango kondimana ete akotika bango na bomoi, mpe bankumu ya liyangani balapelaki bango ndai ete bakotosa kondimana yango ya kimya.+

16 Mikolo misato nsima ya kosala kondimana na bango, mibali ya Yisraele bayokaki ete bato yango bautaki mosika mingi te, mpe bazalaki kofanda penepene na bango. 17 Bongo Bayisraele basimbaki nzela bakei mpe bakómaki na bingumba na bango mikolo misato na nsima. Bingumba yango ezalaki Gibeone,+ Kefira, Beerote, ná Kiriate-yearime.+ 18 Kasi, Bayisraele babundisaki bango te, mpo bankumu ya liyangani balapelaki bango ndai na nkombo ya Yehova+ Nzambe ya Yisraele. Na yango liyangani mobimba ekómaki koimaima mpo na bankumu yango. 19 Bongo bankumu nyonso balobaki na liyangani mobimba boye: “Lokola tolapelaki bango ndai na nkombo ya Yehova Nzambe ya Yisraele, tozali na ndingisa te ya kosala bango mabe. 20 Talá oyo tokosala bango: Tokotika bango na bomoi, mpo nkanda ya Nzambe eyela biso te mpo na ndai oyo tolapelaki bango.”+ 21 Mpe bankumu babakisaki boye: “Bótika bango na bomoi, kasi bákóma nde balɔkɔti-nkoni mpe batoki-mai mpo na liyangani mobimba.” Yango nde bankumu balakaki bango.

22 Sikoyo, Yosua abengaki bango mpe alobaki na bango: “Mpo na nini bokosaki biso, bolobi: ‘Touti mpenza mosika na bino,’ nzokande bofandi kaka awa pene na biso?+ 23 Banda lelo, bolakelami mabe!+ Bokozala baombo mpo na libela, mpe mosala na bino ekozala ya kolɔkɔta nkoni mpe kotoka mai mpo na ndako ya Nzambe na ngai.” 24 Bapesaki Yosua eyano boye: “Mpo bayebisaki biso basaleli na yo polele ete Yehova Nzambe na yo apesaki mosaleli na ye Moize mitindo ete apesa bino mokili oyo mobimba mpe asilisa bato nyonso oyo bafandi na mokili yango.+ Na yango, tokómaki kobanga mingi mpo na bomoi* na biso likoló na bino.+ Yango wana tosalaki bongo.+ 25 Sikoyo, tozali na mabɔkɔ na yo. Salá biso ndenge emonani malamu mpe sembo na miso na yo.” 26 Mpe Yosua asalelaki bango boye; abikisaki bango na mabɔkɔ ya Bayisraele, mpe babomaki bango te. 27 Kasi banda mokolo wana Yosua akómisaki bango balɔkɔti-nkoni mpe batoki-mai mpo na liyangani+ mpe mpo na etumbelo ya Yehova, na esika oyo Ye akopona;+ basalaka mosala yango tii na mokolo ya lelo.+