Basambisi

2 Bongo anzelu ya Yehova+ alongwaki na Gilgale,+ amataki tii na Bokime mpe alobaki: “Nabimisaki bino na Ezipito mpe nakɔtisaki bino na mokili oyo nalapelaki bankɔkɔ na bino ndai.+ Lisusu, nalobaki: ‘Nakobuka ata mokolo moko te kondimana oyo nasalaki ná bino.+ 2 Mpe bino, bosengeli te kosala kondimana na bato oyo bafandi na mokili oyo+ mpe bosengeli kobukabuka bitumbelo na bango.’+ Kasi botosi mongongo na ngai te.+ Mpo na nini bosali boye? 3 Yango wana ngai mpe nalobaki: ‘Nakobengana bango liboso na bino te,+ mpe bango bakozwa bino na motambo,+ mpe banzambe na bango bakobenda bino.’”+

4 Ntango anzelu ya Yehova alobaki na Bayisraele nyonso maloba wana, bato babandaki kolela na mongongo makasi. 5 Yango wana bapesaki esika yango nkombo Bokime,* mpe bapesaki Yehova mbeka kuna.

6 Ntango Yosua atikaki bato bákende, Moyisraele mokomoko akendaki na teritware ya libula na ye, mpo na kozwa mokili yango.+ 7 Bato bakobaki kosalela Yehova mikolo nyonso ya Yosua mpe mikolo nyonso ya bankulutu oyo batikalaki na bomoi nsima ya liwa ya Yosua, mpe oyo bamonaki misala nyonso ya minene oyo Yehova asalelaki Yisraele.+ 8 Na nsima, Yosua mwana ya Nunu, mosaleli ya Yehova, akufaki ntango azalaki na mbula 110.+ 9 Bongo bakundaki ye na teritware ya libula na ye na Timinate-herese,+ na etúká ya ngombangomba ya Efraime, na nɔrdi ya Ngomba Gaashe.+ 10 Na nsima, bato nyonso ya eleko wana bayanganisamaki na bankɔkɔ na bango,* mpe libota mosusu ebimaki, oyo eyebaki Yehova te mpe eyebaki makambo oyo asalaki mpo na Yisraele te.

11 Bayisraele bakómaki kosala oyo ezali mabe na miso ya Yehova mpe kosambela Babaala.+ 12 Na yango basundolaki Yehova, Nzambe ya batata na bango, oyo abimisaki bango na mokili ya Ezipito.+ Mpe balandaki banzambe mosusu, banzambe ya bato ya bikólo oyo bazalaki zingazinga na bango,+ mpe bagumbamelaki banzambe yango; na bongo basilikisaki Yehova.+ 13 Basundolaki Yehova mpe basambelaki Baala mpe bikeko ya Ashitorete.+ 14 Bongo nkanda ya Yehova engalelaki Bayisraele. Na yango apesaki bango na mabɔkɔ ya bapunzi, mpe bapunzaki bango.+ Atɛkaki bango na lobɔkɔ ya banguna oyo bazalaki zingazinga na bango,+ mpe bazalaki lisusu na likoki ya kotɛlɛma liboso ya banguna na bango te.+ 15 Epai nyonso oyo bazalaki kokende, lobɔkɔ ya Yehova ezalaki kotɛmɛla bango mpo na koyeisela bango mpasi,+ kaka ndenge Yehova alobaki mpe kaka ndenge Yehova alapelaki bango ndai;+ mpe bazalaki na mawa makasi mpenza.+ 16 Na yango Yehova azalaki kobimisa basambisi oyo bazalaki kobikisa bango na lobɔkɔ ya bapunzi na bango.+

17 Kasi baboyaki koyokela ata basambisi yango; basambelaki banzambe mosusu* mpe bagumbamelaki banzambe na bango. Batikaki noki kotambola na nzela oyo bankɔkɔ na bango batambolaki, baoyo batosaki mitindo ya Yehova.+ Basalaki lokola bango te. 18 Mbala nyonso oyo Yehova azalaki kobimisela bango basambisi,+ Yehova azalaki elongo na mosambisi yango, mpe azalaki kobikisa bango na lobɔkɔ ya banguna na bango mikolo nyonso ya mosambisi yango. Mpo Yehova azalaki koyoka mawa+ ntango bazalaki komilelalela mpo na mpasi oyo ezalaki kouta epai ya bato oyo bazalaki konyokola bango+ mpe epai ya baoyo bazalaki komonisa bango bwale.

19 Kasi ntango mosambisi yango akufi, bazalaki lisusu kosala makambo ya mabe koleka batata na bango, bazalaki kolanda banzambe mosusu, kosalela bango mpe kogumbamela bango.+ Batikaki te misala na bango mpe ezaleli na bango ya motó makasi. 20 Nsukansuka nkanda ya Yehova engalelaki Yisraele,+ mpe alobaki: “Lokola bato ya ekólo oyo babuki kondimana na ngai+ oyo napesaki bankɔkɔ na bango mitindo mpe baboyi kotosa ngai,+ 21 ngai mpe nakobengana ata ekólo moko te liboso na bango na bikólo nyonso oyo Yosua atikaki ntango akufaki.+ 22 Na ndenge yango nakomeka Bayisraele mpo na koyeba soki bakolanda nzela ya Yehova,+ mpe bakotambola kati na yango ndenge batata na bango basalaki.” 23 Bongo Yehova atikaki bikólo yango wana. Abenganaki yango noki te, mpe apesaki yango na lobɔkɔ ya Yosua te.