Ezera

9 Ntango kaka makambo wana esalemaki, bankumu bayaki epai na ngai mpe balobaki na ngai: “Bato ya Yisraele ná banganga-nzambe mpe Balevi bakabwani te na bato ya bikólo mosusu mpe na mimeseno na bango oyo eyinamá,+ elingi koloba, ya Bakanana, ya Bahiti, ya Baperizi, ya Bayebusi, ya Baamone, ya Bamoabe, ya Baezipito+ ná ya Baamore.+ 2 Bango moko mpe bana na bango ya mibali babalaki bana basi mosusu ya bato ya bikólo yango.+ Boye bango, libota* mosantu,+ basangani na bato ya bikólo yango.+ Bankumu ná bayangeli-basungi nde bato ya liboso oyo basali likambo wana ya kozanga bosembo.”

3 Ntango kaka nayokaki yango, napasolaki elamba na ngai ná kazaka na ngai oyo ezangá mabɔkɔ. Napikolaki nsuki ya motó na ngai mpe mandefu na ngai, mpe nafandaki, nalɛmbi nzoto mpo na mawa. 4 Bongo bato nyonso oyo bazalaki na limemya makasi* mpo na maloba ya Nzambe ya Yisraele, bayanganaki epai na ngai, bazalaki komitungisa mpo na kozanga bosembo ya bato oyo bautaki na bokangami, wana ngai nafandaki kaka, nalɛmbi nzoto mpo na mawa, tii na ntango ya likabo ya mbuma ya mpokwa.+

5 Nsima ya komiyokisa nsɔni ndenge wana, natɛlɛmaki na ntango ya kopesa likabo ya mbuma ya mpokwa.+ Nazalaki kaka na elamba na ngai mpe kazaka na ngai ezangá mabɔkɔ oyo epasukaki. Nafukamaki mpe natombolaki mabɔkɔ likoló epai ya Yehova Nzambe na ngai. 6 Mpe nalobaki: “Ee Nzambe na ngai, nayoki mpenza nsɔni mpe namoni ete nabongi te kotombola elongi na ngai liboso na yo, Ee Nzambe na ngai, mpo mabunga na biso ekómi mingi na mitó na biso mpe ngambo na biso emati tii na likoló.+ 7 Banda na ntango ya bankɔkɔ na biso tii lelo, tozali na ngambo monene.+ Mpe mpo na mabunga na biso, biso moko, bakonzi na biso mpe banganga-nzambe na biso, tokabami na mabɔkɔ ya bakonzi ya bikólo mosusu na mopanga,+ tokómaki bakangami,+ bapunzaki biloko na biso+ mpe toyokisamaki nsɔni, ndenge ezali ata tii lelo oyo.+ 8 Kasi mpo na mwa ntango moke, Ee Yehova Nzambe na biso, omoniseli biso boboto na ndenge otiki ete mwa ndambo ya bato bábika mpe opesi biso libateli* na esika na yo mosantu,+ mpo na kongɛngisa miso na biso, Ee Nzambe na biso, mpe mpo na kopesa biso lisusu makasi na boombo na biso. 9 Mpo atako tozali baombo,+ yo Nzambe na biso osundoli biso na boombo na biso te. Omoniseli biso bolingo ya sembo na ndenge osali ete bakonzi ya Perse bázala na motema malamu,+ mpo na kopesa biso lisusu makasi mpo tótɛlɛmisa ndako na yo Nzambe na biso+ mpe tóbongisa bisika na yango oyo ebebá, mpe mpo na kopesa biso efelo ya mabanga* na Yuda mpe na Yerusaleme.

10 “Kasi sikoyo tokoloba nini, Ee Nzambe na biso, nsima ya makambo oyo ekómeli biso? Mpo toboyaki kotosa mitindo na yo, 11 oyo opesaki biso na nzela ya basaleli na yo basakoli, ntango olobaki: ‘Mokili oyo bozali kokɔta mpo na kozwa ezali mokili moko ya mbindo mpo bato ya bikólo yango bazali mbindo, mpo na misala na bango oyo eyinamá oyo batondisi na bikólo yango banda nsuka tii nsuka na mbindo na bango.+ 12 Yango wana, bópesa bana na bino ya basi epai ya bana na bango ya mibali te, mpe bózwa te bana na bango ya basi mpo na bana na bino ya mibali,+ mpe bosengeli kosala ata eloko moko te mpo bázala na kimya mpe na bomɛngo.+ Boye bokokóma makasi mpe bokolya biloko ya malamu ya mokili oyo mpe bokozwa yango mpo na bana na bino mpo na libela.’ 13 Nyonso wana ekómeli biso mpo na misala na biso ya mabe mpe mpo na ngambo monene oyo tomemi (mpo yo, Ee Nzambe na biso, osaleli biso makambo te na kolanda libunga na biso,+ mpe otiki nzela ete mwa ndambo ya bato oyo bazali awa bálongwa na mabɔkɔ ya baoyo bakangaki bango).+ 14 Tokobuka nde lisusu mibeko na yo mpe tokosala nde kondimana ya libala ná bato ya bikólo oyo basalaka makambo oyo eyinamá?+ Soki tosali bongo, okosilikela biso makasi kino okoboma biso nyonso mpe ata moto moko te akotikala, boye te? 15 Ee Yehova Nzambe ya Yisraele, yo ozali sembo,+ mpo mwa ndambo na biso totikali na bomoi tii lelo. Talá biso oyo totɛlɛmi liboso na yo na ngambo na biso, mpo na kotalela makambo oyo esalemaki, ata moko na biso abongi te kotɛlɛma liboso na yo.”+