Epai ya mokambi ya nzembo. Mondule ya Davidi.
64 Ee Nzambe, yoká mongongo na ngai ntango nazali kobondela.+
Batelá bomoi na ngai ezala na nsɔmɔ ya monguna te.
2 Bombá ngai mosika na masolo ya nkuku ya bato mabe,+
Mosika na ebele ya basali mabe.
3 Bapelisi lolemo na bango lokola mopanga;
Bazali kobimisa maloba mabe lokola makula,
4 Mpo bábwakela yango moto oyo azali na likambo te, uta na bisika ya kobombana;
Bazali kobwakela ye yango na mbalakaka, bazali kobanga te.
5 Bazali kokangama makasi na makanisi na bango ya mabe;
Bazali kolobela ndenge bakobomba mitambo na bango.
Bazali koloba ete: “Nani akomona yango?”+
6 Bazali kolukaluka ndenge ya sika ya kosala mabe;
Na kobombana babongisi malamu mayele na bango;+
Ezali mpenza mpasi koyeba makanisi ya motema ya mokomoko na bango.
7 Kasi Nzambe akobwakela bango likula;+
Bakozoka mpota na mbalakaka.
8 Lolemo na bango moko ekokweisa bango;+
Baoyo nyonso bakotala bakoningisa motó.
9 Bongo bato nyonso bakobanga;
Mpe bakoyebisa likambo oyo Nzambe asali,
Mpe bakososola misala na ye.+
10 Moto ya sembo akosepela na Yehova mpe akokima epai na ye;+
Bato nyonso ya motema sembo bakosepela makasi.