Kobima
2 Na ntango yango, mobali moko ya libota ya Levi abalaki mwana mwasi moko ya Levi.+ 2 Mpe mwasi yango azwaki zemi mpe abotaki mwana mobali. Ntango amonaki ete mwana yango azali kitoko mingi, abombaki ye sanza misato.+ 3 Ntango akokaki lisusu kobomba ye te,+ azwaki kitunga* ya papirisi, apakolaki yango gudrɔ ná mpaka* mpe atyaki mwana na kati na yango mpe atyaki yango na matiti oyo ezali pembeni ya Ebale Nile. 4 Kasi, ndeko na ye ya mwasi+ atɛlɛmaki mwa mosika mpo na komona nini ekokómela ye.
5 Ntango mwana mwasi ya Farao akitaki mpo na kosukola na Ebale Nile, basaleli na ye ya basi bazalaki kotambola pembenipembeni ya Ebale Nile. Mpe amonaki kitunga na matiti ya ebale. Na mbala moko, atindaki moombo na ye ya mwasi azwa yango.+ 6 Ntango afungolaki yango, amonaki mwana, mpe mwana mobali yango azalaki kolela. Ayokelaki ye mawa mpe alobaki ete: “Oyo azali moko ya bana ya Baebre.” 7 Bongo ndeko-mwasi ya mwana yango alobaki na mwana mwasi ya Farao ete: “Olingi nakende kobengela yo mwasi moko oyo azali komɛlisa mabɛlɛ kati na basi Baebre mpo amɛlisela yo mwana yango mabɛlɛ?” 8 Mwana mwasi ya Farao alobaki na ye ete: “Kende!” Na mbala moko, elenge mwasi yango akendaki kobenga mama ya mwana yango.+ 9 Bongo mwana mwasi ya Farao alobaki na ye ete: “Zwá mwana oyo azala elongo na yo, mɛliselá ngai ye mabɛlɛ, mpe nakofuta yo.” Mwasi yango azwaki mwana mpe amɛlisaki ye mabɛlɛ. 10 Mpe mwana yango akolaki. Na nsima amemaki ye epai ya mwana mwasi ya Farao, bongo akómaki mwana na ye;+ mpe apesaki ye nkombo Moize* mpe alobaki ete: “Mpo nalongolaki ye na mai.”+
11 Sikoyo na mikolo yango, ntango Moize akómaki mokóló,* akendaki epai ya bandeko na ye mpo atala mikumba ya kilo oyo bazalaki komema,+ mpe amonaki Moezipito moko azali kobɛta Moebre, moko ya bandeko na ye. 12 Bongo atalaki epai na epai mpe amonaki moto te, abomaki Moezipito yango mpe akundaki ye na zɛlo.+
13 Kasi na mokolo oyo elandaki, abimaki mpe amonaki Baebre mibale ya mibali bazalaki kobunda. Na yango, alobaki na oyo asalaki mabe ete: “Mpo na nini ozali kobɛta moninga na yo?”+ 14 Mpe ye alobaki ete: “Nani atye yo nkumu mpe mosambisi na biso? Olingi koboma ngai ndenge obomaki Moezipito?”+ Na yango, Moize abangaki mpe alobaki ete: “Ya solo, likambo yango eyebani!”
15 Na nsima, Farao ayokaki likambo yango, mpe alukaki koboma Moize; kasi Moize akimaki Farao, akendaki kofanda mosika na mokili ya Midiane,+ mpe afandaki pembeni ya libulu moko ya mai. 16 Bongo nganga-nzambe ya Midiane+ azalaki na bana basi nsambo, mpe bayaki mpo na kotoka mai mpe kotondisa bisika ya komɛlisa bitonga ya tata na bango. 17 Kasi lokola na momeseno, babateli ya mpate bayaki mpe babenganaki bango. Na yango, Moize atɛlɛmaki mpe asalisaki* basi yango mpe amɛlisaki bitonga na bango mai. 18 Ntango bazongaki epai ya tata na bango Rewele,*+ ye akamwaki ete: “Ndenge nini lelo bozongi noki boye?” 19 Bayanolaki ete: “Moezipito+ moko abikisi biso na babateli ya mpate, atokeli biso mai mpe amɛlisi etonga mai.” 20 Alobaki na bana na ye ya basi ete: “Kasi azali wapi? Mpo na nini botiki mobali yango kuna? Bóbenga ye, mpo alya elongo na biso.” 21 Nsima na yango, Moize andimaki kofanda epai ya mobali yango, mpe ye apesaki Moize mwana na ye ya mwasi Zipora+ mpo azala mwasi na ye. 22 Na nsima, abotaki mwana mobali mpe Moize apesaki ye nkombo Gereshome,*+ mpo alobaki ete: “Nakómi moto oyo afandi mopaya na mokili ya bapaya.”+
23 Nsima ya ntango molai,* mokonzi ya Ezipito akufaki,+ kasi Bayisraele bazalaki kaka konyokwama mpe kolelalela mpo na boombo, mpe kolelalela na bango mpo na kosɛnga lisalisi lokola bazalaki baombo ezalaki kaka komata epai ya Nzambe ya solo.+ 24 Nsukansuka, Nzambe ayokaki kolelalela+ na bango mpo na minyoko mpe Nzambe akanisaki kondimana na ye elongo na Abrahama, Yisaka mpe Yakobo.+ 25 Bongo Nzambe atalaki Bayisraele; mpe Nzambe atyelaki bango likebi.