Mokanda ya liboso ya Samwele

10 Bongo Samwele azwaki molangi ya mafuta mpe asopaki yango na motó ya Saulo.+ Apesaki ye lipwɛpwɛ mpe alobaki ete: “Oyo emonisi solo ete Yehova atye yo mafuta mpo okóma mokambi+ ya libula na ye.+ 2 Lelo ntango okotika ngai, okokuta mibali mibale pene na lilita ya Rashele+ na Zeleza na teritware ya Benyamina, mpe bakoyebisa yo boye: ‘Bampunda oyo okendaki koluka emonani, kasi sikoyo tata na yo atiki likambo ya bampunda+ mpe akómi komitungisa mpo na yo, alobi: “Nasala nini mpo na mwana na ngai?”’ 3 Na nsima kende tii na nzete monene ya Tabore, mpe kuna okokutana na mibali misato oyo bazali komata epai ya Nzambe ya solo na Betele.+ Moko amemi bana-ntaba misato, moko amemi mampa misato, mpe moko amemi elokó monene ya vinyo. 4 Bakotuna yo soki ozali malamu, na nsima bakopesa yo mampa mibale, mpe osengeli kozwa yango. 5 Nsima na yango, okokóma na ngomba moke ya Nzambe ya solo, esika etuluku moko ya basoda ya Bafilistia ezali. Ntango okokóma na engumba yango, okokutana na etuluku moko ya basakoli oyo bauti na esika oyo etombwaná, bazali kokita mpe bazali kosakola. Liboso na bango, bato bakobɛta ebɛtɛlo ya nsinga, mbonda moke, piololo mpe nzɛnzɛ. 6 Elimo ya Yehova ekosala makasi kati na yo,+ mpe okobanda kosakola elongo na bango mpe okokóma moto ya ndenge mosusu.+ 7 Ntango bilembo wana nyonso ekokokisama, salá nyonso oyo lobɔkɔ na yo ekoki kosala, mpo Nzambe ya solo azali na yo. 8 Na nsima, kitá na Gilgale+ liboso na ngai, mpe nakolanda yo kuna mpo na kopesa bambeka ya kotumba mpe bambeka ya kimya.* Osengeli kozela ngai mikolo nsambo tii ntango nakoya epai na yo. Bongo, nakoyebisa yo oyo osengeli kosala.”

9 Saulo atikaki Samwele mpe asimbaki nzela akei. Na mbala moko, Nzambe abandaki kokómisa motema na ye ndenge mosusu; mpe bilembo wana nyonso ekokisamaki na mokolo yango. 10 Na yango, balongwaki wana mpe bakendaki na ngomba moke, mpe etuluku moko ya basakoli ezalaki koya kokutana na ye. Na mbala moko, elimo ya Nzambe ekitelaki ye,+ mpe akómaki kosakola+ kati na bango. 11 Ntango bato nyonso oyo bayebaki ye liboso bamonaki ye azali kosakola elongo na basakoli, balobanaki ete: “Likambo nini ekómeli mwana ya Kishe? Saulo azalaka mpe na kati ya basakoli?” 12 Bongo moto moko kuna alobaki boye: “Kasi tata na bango nani?” Yango ekómá liloba ya lisese ete: “Saulo azalaka mpe na kati ya basakoli?”+

13 Ntango Saulo asilisaki kosakola, akendaki na esika oyo etombwaná. 14 Na nsima, ndeko mobali ya tata ya Saulo atunaki ye ná mosaleli na ye: “Bokendaki wapi?” Na yango Saulo alobaki ete: “Koluka bampunda,+ kasi tomonaki yango kuna te, yango wana tokendaki epai ya Samwele.” 15 Ndeko ya tata ya Saulo atunaki bango: “Nabondeli bino, bóyebisa ngai, Samwele alobi na bino nini?” 16 Saulo ayanolaki ndeko ya tata na ye: “Ayebisi biso ete bampunda yango emonani.” Kasi Saulo ayebisaki ye te likambo ya bokonzi oyo Samwele alobaki.

17 Na nsima Samwele ayanganisaki bato liboso ya Yehova na Mizipa+ 18 mpe alobaki na Bayisraele boye: “Talá oyo Yehova Nzambe ya Yisraele alobi: ‘Ngai nde nabimisaki Yisraele na Ezipito mpe nabikisaki bino na lobɔkɔ ya Ezipito+ mpe na lobɔkɔ ya makonzi nyonso oyo ezalaki konyokola bino. 19 Kasi lelo oyo, boboyi Nzambe na bino,+ oyo azalaki kobikisa bino na mabe mpe na bampasi na bino nyonso, mpe bolobi: “Te, osengeli kotyela biso mokonzi.” Sikoyo, bótɛlɛma liboso ya Yehova na kolanda mabota na bino mpe bituluku na bino ya bato nkóto.’”

20 Na yango, Samwele asɛngaki bituluka nyonso ya Yisraele epusana penepene,+ mpe etuluka ya Benyamina eponamaki.+ 21 Na nsima, asɛngaki etuluka ya Benyamina epusana na kolanda mabota na yango, mpe libota ya Bamatre eponamaki. Nsukansuka, Saulo, mwana ya Kishe, aponamaki.+ Kasi ntango bakendaki koluka ye, bamonaki ye te. 22 Na yango, batunaki Yehova ete:+ “Mobali yango ayei mpenza awa?” Yehova ayanolaki: “Ye wana abombani na kati ya bisaka.” 23 Bongo bakimaki mbangu mpe bazwaki ye kuna. Ntango atɛlɛmaki na katikati ya bato, alekaki bato mosusu nyonso na molai, banda na mapeka na ye tii na motó.+ 24 Samwele alobaki na bato nyonso boye: “Bomoni moto oyo Yehova aponi?+ Ezali na moto moko te lokola ye kati na bato nyonso!” Mpe bato nyonso babandaki koganga: “Mokonzi azala na bomoi!”

25 Samwele ayebisaki bato lotomo oyo bakonzi bakozala na yango,+ akomaki yango na buku moko, mpe atyaki yango liboso ya Yehova. Na nsima, Samwele atikaki bato nyonso bázonga, moto na moto na ndako na ye. 26 Saulo mpe azongaki na ndako na ye na Gibea, mpe bilombe ya bitumba oyo Yehova asimbaki mitema na bango bakendaki elongo na ye. 27 Kasi bato mosusu ya mpambampamba balobaki ete: “Moto oyo akobikisa biso ndenge nini?”+ Na yango, batyolaki ye, mpe bamemelaki ye ata likabo moko te.+ Kasi Saulo alobaki eloko te mpo na yango.*