Kobima

14 Sikoyo Yehova alobaki na Moize ete: 2 “Yebisá Bayisraele ete basengeli kozonga mpe kotya kaa liboso ya Pihahirote kati na Migidole ná mbu, etalana na Baala-zefone.+ Bokotya kaa liboso na yango, pene na mbu. 3 Bongo Farao akoloba mpo na Bayisraele ete: ‘Bazali koyengayenga na mokili, bakɔti mobulu. Nzela ya kobima na esobe ezali te.’ 4 Nakotika motema ya Farao ekóma makasi,+ mpe akolanda bango na nsima, nakozwa nkembo na makambo oyo nakosala Farao ná mampinga na ye nyonso;+ mpe Baezipito bakoyeba mpenza ete nazali Yehova.”+ Na yango, basalaki kaka bongo.

5 Na nsima, bayebisaki mokonzi ya Ezipito ete bato bakimi. Na mbala moko, motema ya Farao mpe ya basaleli na ye ebongwanaki mpo na bato yango,+ mpe balobaki ete: “Likambo nini oyo tosali? Mpo na nini totiki baombo na biso Bayisraele bákende?” 6 Bongo abongisaki makalo na ye ya bitumba, mpe azwaki bato na ye elongo na ye.+ 7 Azwaki makalo 600 ya malamu koleka mpe makalo mosusu nyonso ya Ezipito ná babundi likoló ya mokomoko na yango. 8 Bongo Yehova atikaki motema ya Farao, mokonzi ya Ezipito, ekóma makasi mpe alandaki Bayisraele, wana Bayisraele bazalaki kobima na mpiko nyonso.*+ 9 Baezipito balandaki bango,+ ná makalo nyonso ya Farao mpe basoda na ye oyo batambolaka na mpunda mpe mampinga na ye bakómaki pene ya kozwa bango, wana batyaki kaa pembeni ya mbu, pene na Pihahirote na kotalana na Baala-zefone.

10 Ntango Farao akómaki penepene, Bayisraele batombolaki miso na bango mpe bamonaki Baezipito bazali kolanda bango. Bayisraele babangaki mingi mpe babandaki kobelela Yehova.+ 11 Balobaki na Moize ete: “Ezali mpo malita ezali na Ezipito te nde omemi biso awa mpo tókufa na esobe?+ Likambo nini oyo osali biso, na ndenge obimisi biso na Ezipito? 12 Yango te nde toyebisaki yo na Ezipito ete: ‘Tiká biso, tósalela Baezipito’? Mpo ezali malamu tósalela Baezipito na esika tókufa na esobe.”+ 13 Bongo Moize alobaki na bato ete: “Bóbanga te.+ Bózala na mpiko mpe bómona ndenge Yehova akobikisa bino, yango nde akosala mpo na bino lelo.+ Mpo Baezipito oyo bozali komona lelo, bokomona bango lisusu te.+ 14 Yehova ye moko akobundela bino,+ mpe bino bokofanda nyɛɛ.”

15 Sikoyo Yehova alobaki na Moize ete: “Mpo na nini ozali kaka kobelela ngai? Yebisá Bayisraele bálongola kaa. 16 Kasi yo, tombolá lingenda na yo mpe sembolá lobɔkɔ na yo likoló ya mbu mpe kabolá yango, mpo Bayisraele báleka na katikati ya mbu, na mabele oyo ekauki. 17 Nde ngai, nazali kotika mitema ya Baezipito ekóma makasi, mpo bakokɔta nsima na bango; nakozwa nkembo na makambo oyo nakosala Farao ná mampinga na ye nyonso, makalo na ye ya bitumba mpe basoda na ye oyo batambolaka na mpunda.+ 18 Mpe Baezipito bakoyeba mpenza ete nazali Yehova ntango nakozwa nkembo na makambo oyo nakosala Farao, makalo na ye ya bitumba ná basoda na ye oyo batambolaka na mpunda.”+

19 Bongo anzelu ya Nzambe ya solo,+ oyo azalaki kotambola liboso ya kaa ya Yisraele, alongwaki mpe akendaki na nsima na bango, mpe likonzí ya lipata oyo ezalaki liboso na bango ekendaki mpe etɛlɛmaki na nsima na bango.+ 20 Bongo yango eyaki kotɛlɛma kati ya kaa ya Baezipito mpe kaa ya Yisraele.+ Na ngámbo mosusu, yango ezalaki lipata ya molili. Na ngámbo mosusu, yango ezalaki kongɛngisa butu.+ Mpe etuluku moko epusanaki te pene na etuluku mosusu, butu mobimba.

21 Sikoyo Moize asembolaki lobɔkɔ na ye likoló ya mbu;+ mpe Yehova azongisaki mai ya mbu yango nsima na mopɛpɛ makasi ya ɛsti butu mobimba, asalaki ete esika oyo mbu ezalaki ekóma mabele oyo ekauki,+ mpe mai ekabwanaki.+ 22 Bongo Bayisraele balekaki na katikati ya mbu na mabele oyo ekauki,+ wana mai esalaki efelo na lobɔkɔ na bango ya mobali mpe na lobɔkɔ na bango ya mwasi.+ 23 Baezipito balandaki bango, mpe bampunda nyonso ya Farao, makalo na ye ya bitumba mpe basoda na ye oyo batambolaka na mpunda babandaki kokɔta nsima na bango, na katikati ya mbu.+ 24 Na eleko ya kokɛngɛla ya ntɔngɔ,* Yehova atalaki na kaa ya Baezipito na kati ya likonzí ya mɔtɔ mpe ya lipata,+ mpe akɔtisaki mobulungano na kaa ya Baezipito. 25 Akobaki kolongola bapine ya makalo na bango, bongo bakómaki kotambwisa yango na mpasi, mpe Baezipito bazalaki koloba ete: “Tókima, tópusana ata moke te pene na Yisraele, mpo Yehova azali kobundisa Baezipito mpo na bango.”+

26 Na nsima, Yehova alobaki na Moize ete: “Sembolá lobɔkɔ na yo likoló ya mbu, mpo mai ezonga mpe ezindisa Baezipito, makalo na bango ya bitumba mpe basoda na bango oyo batambolaka na mpunda.” 27 Na mbala moko, Moize asembolaki lobɔkɔ na ye likoló ya mbu, mpe ntango ntɔngɔ elingaki kotana, mbu ezongaki ndenge yango ezalaka. Ntango Baezipito bazalaki kokima mpo bákutana na yango te, Yehova abwakaki Baezipito na kati ya mbu.+ 28 Ntango mai ezongaki, ezipaki makalo ya bitumba ná basoda oyo batambolaka na mpunda ná mampinga nyonso ya Farao oyo bakɔtaki na mbu nsima na bango.+ Moto ata moko te kati na bango atikalaki na bomoi.+

29 Kasi, Bayisraele batambolaki na mabele oyo ekauki na kati ya esika oyo mai ya mbu ezalaka,+ mpe mai yango esalaki efelo na lobɔkɔ na bango ya mobali mpe na lobɔkɔ na bango ya mwasi.+ 30 Bongo na mokolo yango Yehova abikisaki Yisraele na lobɔkɔ ya Baezipito,+ mpe Bayisraele bamonaki bibembe ya Baezipito pembeni ya mbu. 31 Bayisraele mpe bamonaki nguya* monene oyo Yehova amonisaki epai ya Baezipito, mpe bato babandaki kobanga Yehova mpe kondimela Yehova mpe Moize mosaleli na ye.+