Kobima

16 Na nsima balongwaki na Elime, nsukansuka liyangani mobimba ya Bayisraele ekómaki na esobe ya Sine,+ oyo ezali kati na Elime mpe Sinai, na mokolo ya 15 ya sanza ya mibale nsima ya kobima na mokili ya Ezipito.

2 Bongo liyangani mobimba ya Bayisraele ebandaki koimaima mpo na Moize mpe Arona na esobe.+ 3 Bayisraele bazalaki kaka koloba na bango ete: “Soki lobɔkɔ ya Yehova ebomaki biso ata na mokili ya Ezipito wana tofandaki pene na banzungu ya misuni ya nyama,+ wana tozalaki kolya mampa ndenge tolingi. Sikoyo bobimisi biso mpe bokɔtisi biso na esobe oyo mpo na koboma lisangá oyo mobimba na nzala.”+

4 Na nsima, Yehova alobaki na Moize ete: “Talá nazali konɔkisela bino mampa uta na likoló,+ mpe moto nyonso asengeli kobima mpe kolɔkɔta ndambo oyo ekoki na ye mokolo na mokolo,+ mpo natya bango na komekama mpo na komona soki bakotambola na mobeko na ngai to te.+ 5 Kasi na mokolo ya motoba+ ntango bazali kobongisa oyo bakomema, bakozwa mbala mibale motángo oyo balɔkɔtaka mokolo na mokolo.”+

6 Bongo Moize ná Arona balobaki na Bayisraele nyonso ete: “Na mpokwa bokoyeba mpenza ete ezali Yehova nde abimisi bino na mokili ya Ezipito.+ 7 Na ntɔngɔ bokomona nkembo ya Yehova, mpo Yehova ayoki koimaima na bino na ntina na ye. Biso tozali banani mpo bóimaima mpo na biso?” 8 Moize alobaki lisusu ete: “Ntango Yehova akopesa bino mosuni na mpokwa mpe mampa na ntɔngɔ oyo bokolya ndenge bolingi, bokomona ete Yehova ayoki koimaima na bino oyo bozali koimaima mpo na ye. Kasi biso tozali banani? Bozali koimaima mpo na biso te, kasi nde mpo na Yehova.”+

9 Na nsima, Moize alobaki lisusu na Arona ete: “Yebisá liyangani mobimba ya Bayisraele ete: ‘Bópusana liboso ya Yehova, mpo ayoki koimaima na bino.’”+ 10 Ntango kaka Arona alobaki na liyangani mobimba ya Bayisraele, babalukaki mpe batalaki na esobe, mpe talá! nkembo ya Yehova emonanaki na kati ya lipata.+

11 Yehova alobaki lisusu na Moize ete: 12 “Nayoki koimaima ya Bayisraele.+ Yebisá bango ete: ‘Liboso molili ekɔta* bokolya mosuni, mpe na ntɔngɔ bokotonda na mampa,+ mpe bokoyeba mpenza ete nazali Yehova Nzambe na bino.’”+

13 Na yango, na mpokwa bandɛkɛ na nkombo kayɛ eyaki mpe ezipaki kaa,+ mpe na ntɔngɔ mamwɛ* etondanaki zingazinga ya kaa. 14 Ntango mamwɛ oyo etondanaki elimwaki, eloko moko ya moke, oyo ebukanaka mpambampamba ezalaki na etando ya esobe,+ eloko yango ezalaki moke mpenza lokola glasi ya pɛtɛpɛtɛ na mokili. 15 Ntango Bayisraele bamonaki yango, babandaki kolobana bango na bango ete: “Oyo nini?” mpo bayebaki yango te. Moize alobaki na bango ete: “Ezali mampa oyo Yehova apesi bino mpo na kolya.+ 16 Yehova apesi etinda oyo: ‘Moto na moto asengeli kolɔkɔta na kotalela oyo akoki kolya. Bokozwa omɛrɛ moko*+ mpo na moto mokomoko na kolanda motángo ya bato oyo mokomoko na bino azali na bango na kati ya hema na ye.’” 17 Bayisraele babandaki kosala bongo; balɔkɔtaki yango, bamosusu balɔkɔtaki mingi mpe bamosusu balɔkɔtaki moke. 18 Ntango bazalaki komeka yango na omɛrɛ, oyo alɔkɔtaki mingi azwaki mingi koleka te mpe oyo alɔkɔtaki moke azangaki te.+ Balɔkɔtaki moto na moto na kotalela oyo akoki kolya.

19 Bongo Moize alobaki na bango ete: “Moto moko te asengeli kotika ndambo na yango tii na ntɔngɔ.”+ 20 Kasi bayokelaki Moize te. Ntango bato mosusu batikaki ndambo na yango tii na ntɔngɔ, yango ebotaki nkusu mpe ebimisaki nsolo mabe, mpe Moize asilikelaki bango. 21 Bazalaki kolɔkɔta yango ntɔngɔ nyonso na kotalela oyo moto na moto akokaki kolya. Ntango moi ezalaki kongala, yango ezalaki konyangwa.

22 Na mokolo ya motoba, balɔkɔtaki mampa mbala mibale,+ omɛrɛ mibale mpo na moto moko. Bongo bankumu nyonso ya liyangani bayaki mpe bayebisaki yango Moize. 23 Na yango alobaki na bango ete: “Yehova alobi boye: Lobi ekozala mokolo ya kopema mpenza,* sabata moko mosantu mpo na Yehova.+ Bótumba oyo bokoki kotumba, mpe bótɔkisa oyo bokoki kotɔkisa;+ mpe nyonso oyo etikali, bóbomba yango mpe bóbatela yango tii na ntɔngɔ.” 24 Na yango, babombaki yango tii na ntɔngɔ, kaka ndenge Moize apesaki mitindo, mpe yango ebimisaki nsolo mabe te mpe nkusu ebimaki na kati na yango te. 25 Bongo Moize alobaki ete: “Bólya yango lelo, mpo lelo ezali sabata mpo na Yehova. Lelo bokomona yango na mokili te. 26 Bokolɔkɔta yango mikolo motoba, kasi na mokolo ya nsambo, na sabata,+ ekozala te.” 27 Kasi, na mokolo ya nsambo bato mosusu babimaki mpo na kolɔkɔta yango, kasi bamonaki yango te.

28 Na yango Yehova alobaki na Moize ete: “Tii ntango nini bokoboya kotosa masɛngami na ngai mpe mibeko na ngai?+ 29 Bósimba likambo oyo ete Yehova apesi bino sabata.+ Yango wana, na mokolo ya motoba, azali kopesa bino mampa ya mikolo mibale. Moto na moto asengeli kofanda na esika na ye; moto moko te abima na esika na ye na mokolo ya nsambo.” 30 Na yango, bato bazalaki kotosa sabata* na mokolo ya nsambo.+

31 Bato ya Yisraele bapesaki yango nkombo “mana.”* Ezalaki mpɛmbɛ lokola mbuma ya koriandre, mpe elɛngi na yango ezalaki lokola ya bagato ya papala oyo esalemi na mafuta ya nzoi.+ 32 Bongo Moize alobaki ete: “Yehova apesi etinda oyo: ‘Bótondisa omɛrɛ moko mpe bóbomba yango na boumeli ya mabota na bino,+ mpo bámona mampa oyo napesaki bino mpo na kolya na esobe ntango nazalaki kobimisa bino na mokili ya Ezipito.’” 33 Na yango Moize alobaki na Arona ete: “Zwá elokó mpe tyá kati na yango omɛrɛ moko ya mana mpe tyá yango liboso ya Yehova mpo ebombama na boumeli ya mabota na bino.”+ 34 Kaka ndenge Yehova apesaki Moize etinda, Arona atyaki yango liboso ya Litatoli+ mpo ebombama. 35 Bayisraele balyaki mana mbula 40,+ tii ntango bakómaki na mokili oyo bato bafandi.+ Balyaki mana tii ntango bakómaki na ndelo ya mokili ya Kanana.+ 36 Omɛrɛ moko ezali efa* moko kabolá na zomi.