Yosua
1 Nsima ya liwa ya Moize, mosaleli ya Yehova, Yehova alobaki boye na Yosua*+ mwana ya Nunu, mosungi+ ya Moize: 2 “Moize mosaleli na ngai akufi.+ Sikoyo tɛlɛmá, katisá Yordani, yo ná bato oyo nyonso, mpe kɔtá na mokili oyo nazali kopesa bango, bato ya Yisraele.+ 3 Nakopesa bino esika nyonso oyo lokolo na bino ekonyata, kaka ndenge nalakaki Moize.+ 4 Teritware na bino ekobanda na esobe tii na Liban mpe tii na ebale monene, Efrate, elingi koloba mokili mobimba ya Bahiti+ mpe ekokende tii na Mbu Monene* na wɛsti.*+ 5 Moto moko te akokoka kotɛmɛla yo bomoi na yo mobimba.+ Kaka ndenge nazalaki na Moize, nakozala mpe na yo.+ Nakosundola yo te mpe nakotika yo te.+ 6 Zalá na mpiko mpe zalá makasi,+ mpo yo nde moto okosala ete bato oyo bázwa libula ya mokili oyo nalapelaki bankɔkɔ na bango ndai ete nakopesa bango.+
7 “Kaka nde, zalá na mpiko mpe zalá makasi mpenza mpe tosá malamumalamu makambo nyonso oyo ezali na Mobeko oyo mosaleli na ngai Moize apesaki yo. Kotika yango te mpo na kokende na lobɔkɔ ya mobali to na lobɔkɔ ya mwasi,+ mpo osala makambo na bwanya epai nyonso oyo okokende.+ 8 Buku oyo ya mobeko esengeli kolongwa na monɔkɔ na yo te,+ mpe osengeli kotánga yango na mongongo ya nse* butu moi, mpo otosa mpenza makambo nyonso oyo ekomami na kati na yango;+ mpo, na ndenge yango nde nzela na yo ekolonga mpe okosala makambo na bwanya.+ 9 Napesi yo mitindo, boye te? Zalá na mpiko mpe zalá makasi. Kobanga te mpe kozala na nsɔmɔ te, mpo Yehova Nzambe na yo azali na yo epai nyonso oyo okokende.”+
10 Bongo Yosua apesaki bakapita ya bato ya Yisraele mitindo ete: 11 “Bóleka na kati ya kaa mpe bópesa bato mitindo oyo: ‘Bóbongisa biloko ya kolya, mpo nsima ya mikolo misato bokokatisa Yordani mpo na kokɔta mpe kozwa mokili oyo Yehova Nzambe na bino azali kopesa bino mpo ezala ya bino.’”+
12 Mpe Yosua alobaki na Barubene, Bagade mpe na ndambo ya libota ya Manase ete: 13 “Bókanisa mitindo oyo Moize mosaleli ya Yehova apesaki bino,+ ete: ‘Yehova Nzambe na bino azali kopesa bino bopemi mpe apesi bino mokili oyo. 14 Basi na bino, bana na bino mpe bibwɛlɛ na bino bakofanda na mokili oyo Moize apesi bino na ngámbo oyo* ya Yordani,+ kasi bino nyonso bilombe ya etumba+ bokokatisa liboso ya bandeko na bino+ na molɔngɔ lokola basoda. Bosengeli kosalisa bango 15 kino ntango Yehova akopesa bandeko na bino bopemi, kaka ndenge apesi bino, mpo bango mpe bázwa mokili oyo Yehova Nzambe na bino azali kopesa bango. Na nsima, bokozonga na mokili oyo bapesaki bino mpo na kofanda, mokili oyo Moize, mosaleli ya Yehova, apesaki bino na ngámbo ya ɛsti ya Yordani.’”+
16 Bapesaki Yosua eyano ete: “Tokosala makambo nyonso oyo opesi biso mitindo, mpe tokokende esika nyonso oyo okotinda biso.+ 17 Kaka ndenge toyokelaki Moize na makambo nyonso oyo alobaki, tokoyokela yo mpe bongo. Kaka nde, Yehova Nzambe na yo azala na yo ndenge azalaki na Moize.+ 18 Moto nyonso oyo akotombokela etinda na yo mpe akoboya kotosa mitindo nyonso oyo opesi ye akobomama.+ Kaka nde, zalá na mpiko mpe zalá makasi.”+