Basambisi

18 Na mikolo wana ezalaki na mokonzi na Yisraele te.+ Mpe na mikolo yango, libota ya Badani+ ezalaki koluka esika* mpo na kofanda, mpamba te tii na ntango wana bazwaki naino te teritware lokola libula na kati ya mabota ya Yisraele.+

2 Badani batindaki mibali ya mpiko mitano ya mabota na bango, longwa na Zora mpe na Eshetaole,+ mpo na konɔnga mokili mpe kotalatala yango. Balobaki na bango: “Bókende kotalatala mokili yango.” Ntango bakómaki na etúká ya ngombangomba ya Efraime, na ndako ya Mika,+ balalaki kuna. 3 Ntango mibali yango bakómaki pene na ndako ya Mika, bayokaki mongongo* ya elenge mobali wana Molevi. Bakendaki kosolola na ye mpe batunaki ye: “Nani amemi yo awa? Ozali kosala nini na esika oyo? Eloko nini ozali koluka awa?” 4 Ayebisaki bango makambo oyo Mika asalelaki ye mpe abakisaki: “Azwaki ngai na mosala mpo nazala nganga-nzambe na ye.”+ 5 Na nsima, balobaki na ye: “Tobondeli yo, tuná Nzambe soki mobembo oyo tozali kosala ekoleka malamu.” 6 Nganga-nzambe yango alobaki na bango: “Bókende na kimya. Yehova akozala na bino na mobembo na bino.”

7 Na yango, mibali wana mitano bakendaki mpe bakómaki na Laishe.+ Bamonaki ndenge bato ya engumba yango bazalaki komityela motema, kaka ndenge Basidone bazalaka. Bazalaki na kimya mpe bazalaki kobanga eloko te,+ mpe ezalaki na moto moko te oyo azalaki kobundisa mokili yango mpo na komonisa bango mpasi. Bazalaki kofanda mosika na Basidone, mpe bazalaki na boyokani na bato mosusu te.

8 Ntango bazongaki epai ya bandeko na bango na Zora mpe na Eshetaole,+ bandeko na bango batunaki bango: “Boni esika bokendaki?” 9 Bayanolaki: “Tókende kobundisa bango, mpo tomoni ete mokili yango ezali malamu mingi. Mpo na nini bozali kokakatana? Bóumela te mpo na kokende kozwa mokili yango. 10 Ntango bokokóma kuna, bokomona ete bato yango bazali kobanga eloko te,+ mpe mokili yango ezali monene mpenza. Nzambe apesi yango na lobɔkɔ na bino; mokili yango ezali esika oyo ezangi ata eloko moko te oyo ezalaka awa na mabele.”+

11 Na yango mibali 600 ya libota ya Badani oyo bazalaki na bibundeli mpo na etumba balongwaki na Zora mpe na Eshetaole.+ 12 Bamataki mpe batyaki kaa na bango na Kiriate-yearime+ na Yuda. Yango wana, bapesá esika yango nkombo Mahane-dani*+ tii na mokolo ya lelo. Ezali na wɛsti ya Kiriate-yearime. 13 Balongwaki wana, bakei na etúká ya ngombangomba ya Efraime, mpe bakómaki na ndako ya Mika.+

14 Bongo mibali mitano oyo bakendaki konɔnga mokili ya Laishe+ balobaki na bandeko na bango: “Boyebi ete na bandako oyo ezali na efode moko, bikeko ya banzambe ya libota,* ekeko moko oyo eyemami mpe ekeko ya ebende?*+ Bókanisa nini bosengeli kosala.” 15 Na yango batɛlɛmaki wana mpe bakɔtaki na ndako ya elenge mobali wana Molevi,+ epai ya Mika mpe batunaki ye soki azali malamu. 16 Na ntango wana, mibali 600 ya libota ya Dani+ oyo bazalaki na bibundeli mpo na etumba batɛlɛmaki liboso ya porte. 17 Mibali mitano oyo bakendaki konɔnga mokili yango+ bakɔtaki na ndako mpo na kozwa ekeko oyo eyemami, efode,+ bikeko ya banzambe ya libota,*+ mpe ekeko ya ebende.*+ (Nganga-nzambe+ atɛlɛmaki liboso ya porte elongo na mibali 600 oyo bazalaki na bibundeli mpo na etumba.) 18 Mibali yango bakɔtaki na ndako ya Mika mpe bazwaki ekeko oyo eyemami, efode, bikeko ya banzambe ya libota* mpe ekeko ya ebende.* Nganga-nzambe atunaki bango: “Bozali kosala nini?” 19 Kasi bango bayanolaki: “Fandá nyɛɛ. Koloba eloko te.* Yaká tókende mpo ozala tata* mpe nganga-nzambe na biso. Nini eleki malamu: ozala nganga-nzambe na ndako ya moto moko,+ to okóma nganga-nzambe ya etuluka mpe libota moko ya Yisraele?”+ 20 Na yango, nganga-nzambe yango asepelaki, mpe azwaki efode, bikeko ya banzambe ya libota,* ekeko oyo eyemami+ mpe akendaki elongo na bato yango.

21 Na nsima babalukaki, basimbi nzela bakei mpe batyaki bana, bibwɛlɛ mpe biloko ya motuya liboso na bango. 22 Ntango bakómaki mosika na ndako ya Mika, mibali oyo bazalaki kofanda pene na ndako ya Mika bayanganaki mpo na kolanda Badani yango mpe bazwaki bango. 23 Ntango babelelaki Badani, babalukaki, batalaki bango, mpe balobaki na Mika: “Likambo nini? Mpo na nini oyei na ebele ya bato boye?” 24 Bongo ye alobaki: “Bozwi banzambe na ngai oyo nasalá, mpe bokei na nganga-nzambe na ngai. Natikali mabɔkɔ mpamba. Bongo bozali kotuna ngai lisusu: ‘Likambo nini?’” 25 Badani bazongisaki: “Kogangela biso te, noki mibali oyo bazali na nkanda* bábundisa yo mpe yango ekoki kosala ete obungisa bomoi* na yo mpe bomoi* ya bato ya ndako na yo.” 26 Na yango, Badani bakobaki mobembo na bango; mpe lokola Mika amonaki ete baleki ye na makasi, abalukaki mpe azongaki na ndako na ye.

27 Nsima ya kozwa biloko oyo Mika asalaki mpe nganga-nzambe na ye, bakendaki na Laishe,+ epai ya bato oyo bazalaki kofanda na kimya mpe bazalaki kobanga eloko te.+ Babomaki bango na mopanga, mpe batumbaki engumba yango. 28 Ata moto moko te ayaki kobikisa engumba yango, mpo ezalaki mosika na Sidone, mpe bazalaki na boyokani na bato mosusu te. Engumba yango ezalaki na lobwaku patatalu oyo ezalaki ya Bete-rehobe.+ Na nsima, Badani batongaki lisusu engumba yango mpe bafandaki kuna. 29 Lisusu, bapesaki engumba yango nkombo ya tata na bango, Dani,+ oyo Yisraele abotaki.+ Kasi liboso, nkombo ya engumba yango ezalaki Laishe.+ 30 Na nsima, Badani batɛlɛmisaki ekeko+ kuna, mpe Yonatane+ mokitani ya Gereshome,+ mwana ya Moize, elongo na bana na ye ya mibali bakómaki banganga-nzambe ya libota ya Badani tii na mokolo oyo bato ya mboka yango bamemamaki na mokili ya bapaya. 31 Mpe batɛlɛmisaki ekeko, oyo Mika asalisaki, mpe yango etikalaki kuna mikolo nyonso oyo ndako ya Nzambe ya solo ezalaki na Shilo.+