Kobima
19 Na sanza ya misato nsima ya kobima ya Bayisraele na mokili ya Ezipito, kaka na mokolo yango, bakómaki na esobe ya Sinai. 2 Balongwaki na Refidime,+ bakómaki na esobe ya Sinai mpe batyaki kaa na esobe yango. Yisraele etyaki kaa kuna liboso ya ngomba.+
3 Na nsima, Moize amataki epai ya Nzambe ya solo, mpe Yehova abengaki ye uta na ngomba,+ alobaki ete: “Talá oyo okoloba na ndako ya Yakobo mpe okoyebisa Bayisraele: 4 ‘Bino moko bomoni oyo nasalaki Baezipito,+ mpo nakumba bino na mapapu lokola mpongo mpe naya na bino epai na ngai.+ 5 Sikoyo soki bokotosa mpenza mongongo na ngai mpe bokobatela kondimana na ngai, bokokóma mpenza eloko na ngai moko* kati na bato ya bikólo nyonso,+ mpo mabele mobimba ezali ya ngai.+ 6 Bokokóma mpo na ngai bokonzi moko ya banganga-nzambe mpe ekólo moko mosantu.’+ Yango nde maloba oyo okoloba na Bayisraele.”
7 Bongo Moize akendaki mpe abengaki bankulutu ya bato mpe ayebisaki bango maloba nyonso wana oyo Yehova atindaki ye aloba.+ 8 Nsima na yango, bato nyonso na likanisi kaka moko bazongisaki ete: “Nyonso oyo Yehova alobi, tondimi kosala yango.”+ Na mbala moko Moize azongaki koyebisa Yehova maloba ya bato. 9 Mpe Yehova alobaki na Moize ete: “Talá! Nakoya epai na yo kati na lipata ya moindo, mpo bato báyoka ntango nakosolola na yo, mpe mpo bándimela yo ntango nyonso.” Bongo Moize ayebisaki Yehova maloba ya bato.
10 Na yango Yehova alobaki na Moize ete: “Kende epai ya bato, mpe santisá bango lelo ná lobi, mpe basengeli kosukola bilamba na bango. 11 Mpe basengeli komibongisa mpo na mokolo ya misato, mpo na mokolo ya misato Yehova akokita na Ngomba Sinai na miso ya bato nyonso. 12 Osengeli kotyela bato bandelo zingazinga na yango nyonso mpe koloba na bango ete: ‘Bókeba ete bómata na ngomba te, mpe bósimba ndelo na yango te. Moto nyonso oyo akosimba ngomba akobomama mpenza. 13 Lobɔkɔ ata moko te ekosimba moto yango, kasi bakobamba ye mabanga to bakotɔbɔla ye.* Ezala nyama to moto, akobika te.’+ Kasi ntango makɛlɛlɛ ya liseke ya mpate ya mobali ekoyokana,+ bango bakoki komata na ngomba.”
14 Bongo Moize akitaki na ngomba ayei epai ya bato, mpe abandaki kosantisa bato, mpe basukolaki bilamba na bango.+ 15 Alobaki na bato ete: “Bómibongisa mpo na mokolo ya misato. Bósangisa nzoto na mwasi te.”*
16 Na ntɔngɔ ya mokolo ya misato, bankake ná mikalikali ezalaki, ná lipata moko ya monene+ likoló ya ngomba mpe lokito makasi mpenza ya liseke, mpe bato nyonso oyo bazalaki na kaa babandaki kolɛnga.+ 17 Sikoyo Moize abimisaki bato na kaa mpo na kokutana na Nzambe ya solo, mpe bazalaki na nse ya ngomba. 18 Ngomba Sinai ezalaki kobimisa milinga epai na epai, mpo Yehova akitaki kuna kati na mɔtɔ;+ mpe milinga na yango ezalaki komata lokola milinga ya mombonda, mpe ngomba mobimba ezalaki koningana makasi mpenza.+ 19 Ntango lokito ya liseke ezalaki kaka kokóma makasi, Moize alobaki, mpe mongongo ya Nzambe ya solo ebandaki koyanola ye.
20 Na yango, Yehova akitaki likoló ya Ngomba Sinai, na nsɔngɛ ya ngomba. Bongo Yehova abengaki Moize na nsɔngɛ ya ngomba, mpe Moize amataki.+ 21 Sikoyo Yehova alobaki na Moize ete: “Kitá mpe kebisá bato bámeka te kokatisa ndelo mpo na koya kotala Yehova, noki te mingi kati na bango bakokufa. 22 Mpe banganga-nzambe oyo bapusanaka ntango nyonso pene na Yehova bámisantisa, mpo Yehova akitisela bango nkanda na ye te.”+ 23 Na nsima, Moize alobaki na Yehova ete: “Bato bakoki komata na Ngomba Sinai te mpo yo osilaki kokebisa biso ete: ‘Tyá bandelo zingazinga ya ngomba, mpe santisá yango.’”+ 24 Bongo Yehova alobaki na ye ete: “Kende, kitá, mpe matá lisusu ná Arona elongo na yo, kasi kotika te ete banganga-nzambe mpe bato bákatisa ndelo mpo na komata epai ya Yehova, mpo akitisela bango nkanda na ye te.”+ 25 Na yango Moize akitaki epai ya bato mpe ayebisaki bango makambo oyo Nzambe alobaki.