Basambisi

4 Kasi nsima ya liwa ya Ehude, Bayisraele basalaki lisusu makambo oyo ezali mabe na miso ya Yehova.+ 2 Na yango Yehova atɛkaki bango na lobɔkɔ ya Yabine, mokonzi ya Kanana,+ oyo azalaki koyangela na Hazore. Mokonzi ya limpinga ya basoda na ye ezalaki Sisera; azalaki kofanda na Haroshete+ ya bikólo.* 3 Bayisraele babelelaki Yehova,+ mpo Yabine* azalaki na makalo 900 ya bitumba oyo ezalaki na makwangola na bapine na yango ya ebende,*+ mpe anyokolaki Bayisraele makasi+ mbula 20.

4 Nzokande mosakoli Debora,+ mwasi ya Lapidote, azalaki kosambisa Yisraele na ntango wana. 5 Azalaki kofanda mingi na nse ya nzete ya mbila ya Debora, na katikati ya Rama+ mpe Betele,+ na etúká ya ngombangomba ya Efraime, mpe Bayisraele bazalaki komata epai na ye mpo na kosamba makambo. 6 Atindaki bábenga Barake+ mwana ya Abinoame na Kedeshe-nafatali+ mpe alobaki na ye boye: “Yehova Nzambe ya Yisraele apesi yo mitindo oyo: ‘Kende mpe tambolá* tii na Ngomba Tabore. Kamatá elongo na yo mibali 10 000 na libota ya Nafatali mpe ya Zebulone. 7 Nakomema epai na yo Sisera, mokonzi ya limpinga ya basoda ya Yabine, elongo na makalo na ye ya bitumba mpe basoda na ye na mokɛli* ya Kishone,+ mpe nakopesa ye na lobɔkɔ na yo.’”+

8 Bongo Barake alobaki na ye: “Soki okei elongo na ngai, nakokende, kasi soki okei elongo na ngai te, nakokende te.” 9 Debora alobaki: “Nakokende mpenza elongo na yo. Kasi, etumba oyo okobunda ekomemela yo lokumu te, mpo ezali na lobɔkɔ ya mwasi moko nde Yehova akopesa Sisera.”+ Na yango, Debora atɛlɛmaki mpe akendaki elongo na Barake na Kedeshe.+ 10 Barake ayanganisaki libota ya Zebulone mpe ya Nafatali+ na Kedeshe, mpe mibali 10 000 balandaki ye. Debora mpe amataki elongo na ye.

11 Nzokande, Hebere Mokeni akabwanaki na Bakeni mosusu,+ bakitani ya Hobabe, tata-bokilo ya Moize,+ mpe atɛlɛmisaki hema na ye pene na nzete monene na Zaananime, oyo ezali pene na Kedeshe.

12 Bayebisaki Sisera ete Barake mwana ya Abinoame asili komata na Ngomba Tabore.+ 13 Na mbala moko Sisera ayanganisaki makalo na ye nyonso ya bitumba: makalo 900 oyo ezalaki na makwangola na bapine na yango ya ebende.* Ayanganisaki mpe basoda nyonso oyo bazalaki elongo na ye banda na Haroshete ya bikólo mpo na kokende na mokɛli* ya Kishone.+ 14 Bongo Debora alobaki na Barake ete: “Tɛlɛmá, mpo lelo ezali mokolo oyo Yehova akopesa Sisera na lobɔkɔ na yo. Talá, Yehova azali mpenza kobima liboso na yo.” Bongo Barake alongwaki na Ngomba Tabore mpe akitaki elongo na mibali 10 000 oyo bazalaki kolanda ye. 15 Na nsima Yehova akɔtisaki mobulungano epai ya Sisera ná makalo na ye nyonso ya bitumba mpe limpinga ya basoda na ye nyonso+ liboso ya mopanga ya Barake. Nsukansuka, Sisera akitaki na likalo na ye mpe akimaki na makolo. 16 Barake alandaki makalo ya bitumba mpe limpinga ya basoda tii na Haroshete ya bikólo. Na yango, limpinga mobimba ya basoda ya Sisera ekweaki na mopanga; ata moto moko te atikalaki na bomoi.+

17 Kasi Sisera akimaki na makolo tii na hema ya Yaele,+ mwasi ya Hebere+ Mokeni, mpo Yabine+ mokonzi ya Hazore ná bato ya ndako ya Hebere Mokeni bazalaki koyokana malamu.* 18 Bongo Yaele abimaki mpo na kokutana na Sisera mpe alobaki na ye: “Kɔtá, nkolo na ngai, kɔtá awa. Kobanga te.” Na bongo akɔtaki na hema na ye, mpe Yaele azipaki ye bolangiti. 19 Na nsima Sisera alobaki na ye: “Nabondeli yo, pesá ngai mwa mai ya komɛla, mpo nayoki mposa ya mai.” Na yango, Yaele afungolaki molangi ya mposo ya nyama oyo ezalaki na miliki mpe apesaki ye amɛla,+ na nsima azipaki ye lisusu. 20 Ayebisaki Yaele boye: “Tɛlɛmá na ekɔtelo ya hema, mpe soki moto moko ayei mpe atuni yo ete: ‘Mobali moko azali awa?’ lobá: ‘Azali te!’”

21 Kasi Yaele mwasi ya Hebere, azwaki pike ya hema ná marto na lobɔkɔ na ye. Na nsima, ntango Sisera alalaki mpɔngi makasi mpo alɛmbaki, Yaele apusanaki malɛmbɛ epai na ye mpe atɔbɔlaki ye pike yango na mopanzi ya motó mpe akɔtisaki yango tii na mabele, mpe Sisera akufaki.+

22 Barake akendaki kuna mpo na kolanda Sisera, mpe Yaele abimaki mpo na kokutana na ye mpe alobaki: “Yaká nalakisa yo mobali oyo ozali koluka.” Barake akɔtaki na hema elongo na ye, mpe amonaki Sisera alali, ebembe, ná pike ya hema ekɔti na motó na ye.

23 Bongo na mokolo yango, Nzambe atyaki Yabine mokonzi ya Kanana na nse ya bokonzi ya Bayisraele.+ 24 Bayisraele bazalaki se kobundisa Yabine mokonzi ya Kanana makasi mpenza,+ tii balongaki koboma ye.+