Yobo
2 “Lokola Nzambe azali mpenza na bomoi, ye oyo apimeli ngai bosembo,+
Lokola Mozwi-ya-Nguya-Nyonso azali na bomoi, ye oyo akómisi ngai* bololo,+
3 Lokola mpema na ngai ezali kati na ngai
Mpe elimo ya Nzambe ezali na zolo na ngai,+
4 Mbɛbu na ngai ekoloba likambo moko te ya kozanga bosembo;
Mpe lolemo na ngai ekobimisa bokosi te!
5 Nakoki kokanisa ata moke te ete natánga bino bato ya sembo!
Tii nakokufa, nakotika te* bosembo na ngai!+
6 Nakobatela bosembo* na ngai mpe nakotika yango ata moke te;+
Ntango nyonso nakozala na bomoi,* motema na ngai ekokweisa* ngai te.
7 Monguna na ngai akóma lokola moto mabe,
Baoyo bazali kobundisa ngai lokola bato oyo bazangi bosembo.
8 Mpo elikya nini moto oyo abangaka Nzambe te* azali na yango soki abebisami,+
Soki Nzambe alongoli bomoi* na ye?
10 To moto yango, akosepela nde na Mozwi-ya-Nguya-Nyonso?
Akobondela nde Nzambe ntango nyonso?
11 Nakoteya bino makambo etali nguya* ya Nzambe;
Nakobomba eloko moko te na oyo etali Mozwi-ya-Nguya-Nyonso.
12 Talá! Soki bino nyonso bomoni bimonaneli,
Mpo na nini maloba na bino ezali mpenza mpamba?
13 Wana ezali likabo oyo Nzambe apesaka moto mabe,+
Libula oyo banyokoli bazwaka epai ya Mozwi-ya-Nguya-Nyonso.
14 Soki bana na ye bakómi mingi,+ bakokwea na mopanga,
Mpe baoyo bauti na libota na ye bakozala na bilei mingi te.
15 Bana na ye oyo babiki
bakokundama na maladi moko oyo ebomaka mpenza,
Mpe basi oyo mibali bakufi bakolela bango te.
16 Ata soki anduki palata lokola putulu,
Mpe abombi bilamba ya kitoko lokola mabele,*
17 Ata soki asangisi yango,
Moto ya sembo nde akolata yango,+
Mpe moto oyo azali na likambo te nde akokabola palata na ye.
18 Ndako oyo atongi ezali pɛtɛɛpɛtɛɛ lokola ndako ya ndɔngɛ,
Lokola esika ya kobatama+ oyo sinzili asali.