Mokanda ya liboso ya Samwele

20 Na nsima, Davidi alongwaki na Nayote, na Rama, mpe akimaki. Kasi, ayaki epai ya Yonatane mpe alobaki: “Nasali nini?+ Mabe nini nasali, mpe lisumu nini nasaleli tata na yo, mpo aluka koboma* ngai?” 2 Na yango, Yonatane alobaki na ye: “Ekoki kosalema soki moke te!+ Okokufa te. Talá! Tata na ngai asalaka likambo moko te, ezala ya monene to ya moke, kozanga ete ayebisa ngai. Mpo na nini tata na ngai abombela ngai likambo ya boye? Ekoki kosalema te.” 3 Kasi Davidi alobaki lisusu: “Tata na yo ayebi ete olingaka ngai mingi,+ yango wana mbala mosusu alobaki: ‘Malamu Yonatane ayeba likambo oyo te, noki ayoka motema mpasi.’ Kasi, lokola Yehova azali solo na bomoi mpe lokola yo ozali* solo na bomoi, liwa na ngai ezali mosika te!”+

4 Bongo Yonatane alobaki na Davidi: “Likambo nyonso oyo okoloba,* nakosala yango mpo na yo.” 5 Davidi alobaki na Yonatane: “Lobi ezali sanza ya sika,+ nasengeli mpenza kofanda elongo na mokonzi mpo na kolya; pesá ngai nzela nakende, mpe namibomba na esobe tii mokolo ya misato na mpokwa. 6 Soki tata na yo amoni ete nazali te, okoloba: ‘Davidi abondelaki ngai napesa ye nzela akende mbangu na Beteleme,+ engumba na ye, mpo libota na bango mobimba ezali kopesa mbeka ya mbula na mbula kuna.’+ 7 Soki alobi: ‘Likambo te,’ ngai mosaleli na yo nakobanga eloko te. Kasi soki asiliki, yebá ete azali kaka kokana kosala ngai mabe. 8 Moniselá ngai mosaleli na yo bolingo ya sembo,+ mpo osali kondimana na ngai liboso ya Yehova.+ Kasi soki nasali likambo moko ya mabe,+ yo moko bomá ngai. Mpo na nini okaba ngai epai ya tata na yo?”

9 Na yango Yonatane alobaki: “Nakoki kokanisa ata moke te kosala yo likambo ya boye! Soki nayoki ete tata na ngai azali kaka kokana kosala yo mabe, nakoya koyebisa yo.”+ 10 Bongo Davidi alobaki na Yonatane ete: “Soki tata na yo apesi yo eyano ya mabe, nani akoya koyebisa ngai yango?” 11 Yonatane alobaki na Davidi: “Yaká tókende na esobe.” Bongo bango mibale bakendaki na esobe. 12 Mpe Yonatane alobaki na Davidi: “Tiká Yehova Nzambe ya Yisraele azala motatoli ete lobi, to na mokolo oyo ekolanda, kaka na bangonga oyo, nakoluka koyeba makanisi ya tata na ngai. Soki azali na makanisi malamu mpo na yo, nakotindela yo moto mpo ayebisa yo yango. 13 Kasi soki tata na ngai akani kosala yo mabe, Yehova apesa ngai etumbu ya makasi* soki nayebisi yo yango te mpe natindi yo te okende na esika ya kimya. Tiká Yehova azala na yo,+ ndenge azalaki na tata na ngai.+ 14 Mpe osengeli komonisela ngai bolingo ya sembo ya Yehova ntango nazali na bomoi ata mpe ntango nakokufa.+ 15 Kotika soki moke te komonisa bolingo ya sembo epai ya bato ya libota na ngai,+ ata ntango Yehova akolongola banguna nyonso ya Davidi na mabele.” 16 Na yango, Yonatane asalaki kondimana na libota* ya Davidi, mpe alobaki: “Yehova akopesa banguna ya Davidi etumbu mpo na mabe na bango.” 17 Bongo Yonatane asɛngaki Davidi alapa lisusu ndai mpo na bolingo oyo balinganaki, mpo Yonatane alingaki ye lokola ye moko.*+

18 Na nsima, Yonatane alobaki na ye: “Lobi ezali sanza ya sika,+ mpe bakomona ete ozali te, mpo kiti na yo ekotikala mpamba. 19 Na mokolo ya misato bakomona mpenza ete ozali te. Na yango, osengeli koya awa, na esika oyo obombanaki mokolo wana,* mpe kofanda pene na libanga oyo. 20 Na nsima, nakobwaka makula misato na ngámbo moko ya libanga yango; nakobwaka yango lokola nde nalingi ezwa eloko moko boye. 21 Ntango nakotinda mosaleli na ngai, nakoloba: ‘Kende koluka makula yango.’ Soki nalobi na mosaleli yango: ‘Talá, makula yango ezali pembeni na yo, zwá yango!’ Boye, okoki kozonga, mpo lokola Yehova azali solo na bomoi, yango elakisi ete ozali na kimya, mpe likama ezali te. 22 Kasi soki nalobi na elenge mobali yango: ‘Talá, makula yango ezali mosika liboso na yo!’ Boye kende, mpo Yehova alingi ete okende. 23 Tiká Yehova azala motatoli kati na biso libela na libela,+ mpo na kondimana oyo ngai ná yo tosali.”+

24 Bongo, Davidi abombanaki na esobe. Na sanza ya sika, mokonzi afandaki na kiti na ye mpo na kolya.+ 25 Mokonzi afandaki na kiti na ye lokola momeseno, pene ya efelo. Yonatane afandaki na kiti oyo etalani na ye, mpe Abinere+ afandaki na mopanzi ya mokonzi, kasi kiti ya Davidi ezalaki mpamba. 26 Saulo alobaki ata eloko moko te na mokolo yango, mpo alobaki na motema na ye: ‘Boye likambo moko ekómeli ye mpe azali pɛto te.+ Ɛɛ, azali mpenza mbindo.’ 27 Mokolo oyo elandaki sanza ya sika, kiti ya Davidi ezalaki kaka mpamba. Bongo Saulo alobaki na mwana na ye Yonatane: “Mpo na nini mwana ya Yese+ ayei kolya te, ezala lobi, to lelo?” 28 Yonatane ayanolaki Saulo: “Davidi abondelaki ngai napesa ye nzela akende na Beteleme.+ 29 Alobaki na ngai: ‘Nabondeli yo, pesá ngai nzela nakende, mpo libota na biso esengeli kopesa mbeka na engumba, mpe ndeko na ngai nde asɛngi ngai nakende. Sikoyo, soki nandimami na miso na yo, tiká ngai nakende kotala bandeko na ngai.’ Yango wana ayei te na mesa ya mokonzi.” 30 Bongo nkanda ya Saulo engalelaki Yonatane mpe alobaki na ye: “Mwana ya mwasi motomboki, okanisi nayebi te ete oponi kozala na ngámbo ya mwana ya Yese? Ezali nsɔni mpo na yo, mpe nsɔni mpo na mama na yo!* 31 Ntango nyonso oyo mwana ya Yese akozala na bomoi awa na mabele, okozala na kimya te mpe bokonzi na yo ekoumela te.+ Sikoyo, tindá moto akende kozwela ngai ye, mpo asengeli kokufa.”*+

32 Kasi, Yonatane alobaki na tata na ye Saulo: “Mpo na nini asengeli kobomama?+ Asali nini?” 33 Bongo Saulo abwakelaki Yonatane likɔnga mpo na koboma ye.+ Na yango Yonatane amonaki ete tata na ye akani mpenza koboma Davidi.+ 34 Na mbala moko, Yonatane alongwaki na mesa na nkanda makasi. Alyaki eloko te na mokolo ya mibale nsima ya sanza ya sika, mpo ayokaki motema mpasi mpo na Davidi,+ mpe ndenge tata na ye ayokisaki ye nsɔni.

35 Na ntɔngɔ Yonatane akendaki na esobe, na esika oyo ayokanaki na Davidi, mpe azalaki elongo na elenge moko mosaleli na ye.+ 36 Mpe alobaki na mosaleli na ye: “Nabondeli yo, kimá mbangu mpe luká makula oyo nazali kobwaka.” Mosaleli yango akimaki mbangu, mpe Yonatane abwakaki likula mpo ekende kokwea mosika liboso na ye. 37 Ntango mosaleli yango akómaki na esika likula oyo Yonatane abwakaki ekweaki, Yonatane abelelaki mosaleli yango mpe alobaki: “Talá, likula yango ekwei mosika liboso na yo!” 38 Yonatane abelelaki lisusu mosaleli yango na nsima ete: “Salá noki! Kende mbangu! Koumela te!” Bongo mosaleli ya Yonatane akendaki, azwaki makula yango, mpe azongaki epai ya nkolo na ye. 39 Mosaleli yango ayebaki ata eloko moko te; kaka Yonatane ná Davidi nde bayebaki ntina oyo Yonatane asalaki bongo. 40 Na nsima, Yonatane apesaki mosaleli na ye bibundeli na ye mpe alobaki na ye: “Kende, memá yango na engumba.”

41 Ntango mosaleli yango akendaki, Davidi abimaki na esika oyo abombanaki; ezalaki na sudi penepene na esika oyo Yonatane azalaki. Na nsima, akweaki elongi na nse mpe agumbamaki mbala misato, bayambanaki* mpe balelaki, kasi Davidi alelaki mingi koleka. 42 Yonatane alobaki na Davidi: “Kende na kimya, mpo tolapaki ndai+ na nkombo ya Yehova, ete: ‘Tiká ete Yehova azala kati na ngai ná yo mpe kati na libota* na ngai mpe libota* na yo, mpo na libela.’”+

Na nsima, Davidi asimbaki nzela akei, mpe Yonatane azongaki na engumba.