Liteya 2

Bolamu bozali kozwama na Eteyelo ya mosala ya Nzambe

 1-5. Formation nini tozali kozwa na Eteyelo ya mosala ya Nzambe mpo na kosalisa biso ete tosalela Nzambe?

¹ Ndenge nini Jéhovah azali kobongisa basaleli na ye ete bayeba kosala malamu mosala na ye? Azali kosala yango na nsima na lisangá na ye. Na mikili mingi, kobongisama oyo ezali kobanda na kelasi ya koyekola kotanga. Baoyo basili koyekola kotanga mpe kokoma bakoki kokomisa nkombo na bango na Eteyelo ya mosala ya Nzambe.

² Eteyelo oyo ezali kobongisa biso mpo na mosala ya Nzambe, mpe bakosengaka moto mbongo mpo na yango te. Ezali kosalisa lisangá na mitindo mibale: (1) Moyekoli moko na moko azali kolanda ebongiseli ya boyekoli oyo ezali kosalisa ye na kobakisa makoki na ye ya kosangisa makanisi matali motó ya likambo moko, kotya yango na molongo mpe kosolola yango lokola esengeli; (2) na boumeli ya likita ya poso na poso, lisangá mobimba ezali koyoka makambo mingi ya ntina. Mpo na yango, kolongono ya elimo ya lisangá ezali kobakisama, mosala ya kosakola ezali mpe kobonga koleka.

³ Mbula na mbula, filiale ya la Société na mokili mokomoko ebongisaka programme ya eteyelo mpe etindaka yango na masangá. Programme yango esalemaka na kotalela mikanda misili kobongolama na monoko to na minoko oyo elobamaka na mokili mokomoko. Nzokande, Biblia nde ezali mokanda oyo eleki kosalelama mingi.

⁴ Poso na poso, bayekoli bazali koleka liboso mpo na kosala masolo oyo mazali kolendisa lisangá; moko na yango, eleki nyonso na molai mpe ebengami discours d’instruction to lisolo mpo na koteya lisangá. Diskur oyo epesamaka na ndeko moko oyo azali na makoki mingi, mpo ete lisangá mobimba ekoka kozwela yango litomba mpenza. Masolo mosusu mazali mikuse mpe mapesami na bayekoli, mibali mpe basi, engebene programme ya eteyelo. Mbula nyonso programme ezalaka mpe na botangi ya Biblia. Na masolo mosusu, mitó ya makambo epesami mpe ekoki kosalema mbala mosusu na ndenge likambo esengi yango. Mbala mingi, masolo ya bandeko basi esalemaka lokola elakiseli na mosala ya kosakola ndako na ndako, to kolobana na ntango ya bozongeli moto to nsima na boyekoli ya Biblia, litatoli ya libaku malamu to lisolo elongo na basangani mosusu ya libota to elongo na mosakoli moko.

⁵ Masangá mike oyo mazali bobele na basi bakoki kosala masolo nyonso. Ndenge nini? Bobele na kofanda, na kolobana kati na bandeko basi mibale, na kolobana na mituna mpe biyano to bobele na kotanga makambo mapesami kati na mokanda.

 6. Mokengeli na eteyelo asengeli kozala ndeko ya ndenge nini?

⁶ Mokengeli na eteyelo. Lisangá moko na moko ezali na mokengeli na eteyelo ya mosala ya Nzambe. Asengeli kozala molakisi malamu, moto ayebi Biblia malamu mpe alobaka malamu monoko oyo lisangá ezali kosalela. Asengeli kozala na boboto mpe na maloba malamu. Azali “nkulutu” na elimo. Mosala na ye ezali boye ete akoma nkombo ya bayekoli, akabolela bango badevuare mpo na kosala mpe apesa bango toli na boboto mpe na elendiseli.

 7. Makambo nini masengeli kotalelama mpo na kokabola badevuare na eteyelo?

⁷ Mokengeli na eteyelo azali na liste ya bayekoli nyonso oyo bapesaki nkombo, liste yango ezali kosalisa ye mpo na koyeba kokabola badevuare. Ebongi ete badevuare epesama poso misato liboso ya date oyo moto akosala yango. Na yango, moto akozwa ntango ya kotanga lisolo na ye mpe kobongisa yango. Mokengeli na eteyelo ayebi ete bandeko nyonso kati na lisangá bakotaki kelasi ndenge moko te; yango wana ntango azali kokabola badevuare azali kotalela makoki ya moto na moto. Epai mosusu, akopesa epai na elenge te lisolo moko oyo ekoki na mbula na ye te. Nzokande, akosenzela ete moyekoli moko na moko azwaka devuare mbala na mbala mpe koleka liboso mpo na kosala yango.

 8. Mpo na nini esengeli koyebisa moyekoli soki alekisi minite na ye?

⁸ Eteyelo esengeli kobanda mpe kosuka na ngonga oyo epesamaki na yango. Soki moyekoli moko alekisi ntango epesamaki na ye, mokengeli na eteyelo to ndeko mosusu oyo aponami mpo na yango akoyebisa ye; wana moyekoli akosilisa liloba oyo azali na yango na monoko mpe akolongwa liboso.

 9-12. Lolenge nini mokengeli na eteyelo akomibanzabanza mpo na bokoli ya bayekoli mpe ya bandeko nyonso kati na lisangá?

⁹ Mokengeli na eteyelo akopesa toli na moyekoli moko na moko na miso ya lisangá mobimba, mpo ete bamosusu bakoka kozwa litomba na toli yango. Kopesa longonya to félicitation ezali na ntina, mpe mokengeli azali koluka ete ayikisa yo mpiko. Akopesa yo batoli oyo ekoki kotonga yo, na makambo ya sikisiki oyo makomami na fiche ya Toli mpo na balobi. Yango ekozala bapwɛ́ oyo bakoyebisa yo liboso ete obongisa yango. (Tala Liteya 20.) Mokengeli na eteyelo akoluka koyeba mikakatano na yo, mpe akolanda bokoli na yo.

¹⁰ Mokengeli na eteyelo azali mpe na mposa ete likita moko na moko ya eteyelo ezala liziba ya mapamboli mpo na lisangá mobimba. Akoyikisa moto na moto mpiko ete apesaka biyano na bozongeli oyo esalemaka poso na poso mpe na oyo esalemaka na bileko. Soki naino okomisi nkombo na yo na eteyelo te, akolobana na yo mpo ete opesa nkombo na yo, mpe akosalisa yo ete olonga mikakatano na yo, kolakisaka yo motindo nini yo mpe okoki kokumisa Jéhovah lokola ebongi.

¹¹ Mokengeli na Eteyelo ya mosala ya Nzambe azali mpe na libaku malamu ya kosalisa bayekoli mpo na oyo etali kobongisa badevuare na bango soki bazali na mposa na ye. Soki ekobonga, akoki kobenga bango na ndako na ye; soki azali na ntango mpo na yango te, akosenga lisalisi epai na bandeko bateli mpe na bandeko bameseni kosala masolo. Baboti bakoki kosalisa mingi bana na bango, mpo na kobongisela bango badevuare te, kasi kolakisa bango mpe kopesa bango toli na ndenge bakoki koluka makambo na mikanda mpe kotya yango na molongo lokola esengeli. Soki ozali kolakisa mosakoli ya sika kati na mosala ya kosakola, mbala mosusu bakosenga yo ete osalisa mpe ye mpo na kobongisa badevuare na ye na Eteyelo ya mosala ya Nzambe.

¹² Mokengeli na eteyelo azali mpe kokengela biblioteke ya Eteyelo ya mosala ya Nzambe oyo ezali kuna na Salle du Royaume. Akosala nyonso ekoki na ye mpo na kolakisa na bato ya sika ndenge nini bakoki koluka makambo kati na mikanda yango oyo etondi na boyebi ya Biblia. Akosala makasi mpo ete mikanda nyonso ya sika ya la Société, bakisa ba diksionere mpe ba index, ezala wana mpo ete bayekoli mpe bato mosusu bakoka koluka kuna na kati makambo oyo bazali na yango mposa.

13-17. Kokola ya bayekoli ezali komonana na baoyo bazali kotala bango?

¹³ Bolamu mpo na bayekoli. Soki bapesi yo devuare mpo na kosala yango na eteyelo, ndima yango lokola ete ezali libaku malamu epesameli yo na lisangá ya Jéhovah. Ndima mpe salela na kosokema nyonso toli oyo bazali kopesa yo. Toli yango ekoki kosalelama kati na masolo na yo ya mokolo na mokolo to kati na mosala na yo ya kosakola. Soki okotya molende mpo na koyekola mpe kosalela makambo mazali kolakisama na eteyelo oyo, okozwela yango matomba mingi.

¹⁴ Baoyo bazali koyangana na eteyelo poso na poso mpe kosala badevuare bazali kokola na ndenge boye ete biyano na bango na makita bizali malamu koleka mpe bazali kozwa matomba malamu koleka kati na mosala ya kosakola. Epai mosusu, eteyelo ezali kopesa nzela na bandeko mibali ete bayeba kobongisa mpe kosala badiskur oyo ezali kolendisa bayoki mpe ezali kopusa bango na kozwa bikateli, ezala na kosalaka masolo na likita ya mosala to na kosalaka badiskur na miso ya bato mingi. Mpo na formation oyo bazwi na Eteyelo ya mosala ya Nzambe, basakoli mingi bazali kosamba malamu na batribinale mpe na miso ya bakonzi, mpe bamosusu bazwi libaku ya koloba na eteyelo ya mosuni to na miso ya bituluku bisusu.

¹⁵ Moyekoli oyo akosalela na elobeli na ye mpe na masolo na ye ya mikolo nyonso toli oyo bazali kopesa ye na ntango azali kosala badevuare akomona ete nsima na mikolo abandi kosilisa na elobeli na ye mimeseno mabe oyo azalaki na yango uta kala. Ezala na mosala na biso ya mosuni, na eteyelo ya mosuni to epai mosusu, formation oyo tozwi lokola ba Témoins de Jéhovah ekozanga te kokamwisa baoyo bazali kotala biso. Na ntina yango, zulunalo moko eyebani mingi ekomaki boye: “Na mwa basanza Temwe ya sika azali koyekola Biblia na mozindo koleka baklisto mingi na boumeli ya bomoi na bango mobimba. Ezali mpamba te soki tozali komona ete Batemwe nyonso bazali bato bayebi koloba malamu.”

¹⁶ Ebongi ete ndeko nyonso kati na lisangá amityela mokano liboso mpo na koyeba soki azali kokola kati na mosala ya Nzambe. Mingimingi mokano yango ekozala na boyokani na bokoli oyo tosili kozwa na Eteyelo ya mosala ya Nzambe. Na ndakisa, ozali komona ete ozali kokoka te kozongela bato mpo na koyanola na mituna na bango? Masolo mingi malakisami na eteyelo makosalisa yo ete oyeba kosala yango.

¹⁷ Mpo na kozwa matomba mingi, esengeli te bobele kozela mokolo ya eteyelo, oyo ekoumela minite ntuku minei na mitano. Ebongi ete moyekoli mokomoko azala na programme na ye ya boyekoli na ndako, mpo na kobongisa masolo, kotanga eteni ya Biblia epesami mpe koluka makambo mosusu. Soki tozali kobwaka miso na makambo nyonso oyo makolobelama na eteyelo, tokomona ete bobele bayekoli oyo bazwi mikumba te, kasi baoyo nyonso bazali koyangana na eteyelo bakobakisa boyebi na bango mpe makoki na bango lokola baministre ya Jéhovah.

18-20. Mpo na nini, ata toyebi koloba malamu te, tosengeli kolemba te mpo na oyo etali kosangana na biso na eteyelo?

¹⁸ Bandeko nyonso balendisami ete batya molende mpenza kozanga kobosana ntina ya eteyelo. Ezali mpo na kotalisa ndenge ya kolobaloba te, ezali mpe mpo na kotónga bolembu mpe mikakatano ya bamosusu te. Mpamba te, bolamu oyo tokozwa na eteyelo ekotalela mingimingi mikano oyo ezali kopusa biso na kosangana na yango. Eteyelo ezali ndambo na ebongiseli oyo Jéhovah asili kokamata mpo na koteya biso. Ye nde azali koteya biso mpe azali kobongisa biso engebene mokano na ye. Na yango, moyekoli moko te asengeli kozala na motema likoló, mpamba te tozali koluka kosepelisa bato te soki mpe kolanda myango ya mokili mpo na oyo etali koteya to koloba. Mokano na biso ezali ete tondimama na Nzambe mpe topambwama na misala oyo tozali kosalela ye.

¹⁹ Ya solo, bandeko mosusu mibali mpe basi bazali na mayoki ndenge moko na Moïse oyo alobaki epai na Jéhovah ete: “Nayebi koloba malamu te; nazalaki boye banda bomwana tee lelo.” (Ex. 4:10, Liloba lya Nzambe) Kasi soki ozali na kondima mpe oyebi ete mpo na Nzambe makambo nyonso makoki kosalema, okolongola liyoki oyo. (Mat. 19:26) Okotalela ete molende nyonso oyo ozali kotya mpo na kobongisa makoki na yo ya kosakola Liloba ya bomoi ezali na ntina. Ata kobongisama moke ekoki kopesa yo nzela na kolakisa moto nzela ya bomoi. Wana ekozala ntina na esengo mpo na yo, boye te?

²⁰ Ntina monene ya Eteyelo ya mosala ya Nzambe ezali ete ebongisa biso mpo na mosala ya Nzambe. Tika ete ozala moko kati na bibele na bato oyo bazali koyangana na yango poso na poso mpe bazali koluka kozwa bolamu na yango, mpe tika ete Jéhovah apambola milende oyo okosala mpo na kokola!— Bafil. 3:16.