Liteya 16

Ekateli na yo ya kosalela Nzambe

Osengeli kosala nini mpo na kokóma moninga ya Nzambe? (1, 2)

Lolenge nini okoki kopesa bomoi na yo epai na Nzambe? (1)

Ntango nini osengeli kozwa batisimo? (2)

Lolenge nini okoki kozwa nguya mpo na kotikala sembo epai na Nzambe? (3)

1. Mpo na kokóma moninga ya Nzambe, osengeli kozwa boyebi malamu ya solo ya Biblia (1 Timoté 2:3, 4), kozala na kondima kati na makambo oyo osili koyekola (Baebele 11:6), komonisa ete obongoli motema na masumu na yo (Misala 17:30, 31), mpe kobongola bizaleli na yo. (Misala 3:19) Na nsima bolingo na yo mpo na Nzambe esengeli kopusa yo na komipesa yo moko epai na ye. Yango elimboli ete yo moko ozali koyebisa ye na nzela ya libondeli ete omipesi epai na ye mpo na kosala mokano na ye.​—Matai 16:24; 22:37.

2. Nsima na komipesa epai na Nzambe, osengeli kozwa batisimo. (Matai 28:19, 20) Batisimo ezali nzela ya komonisa polele na bato nyonso ete osili kopesa bomoi na yo epai na Yehova. Na yango, batisimo etaleli bobele baoyo bakóli mpo na kokamata ekateli ya kosalela Nzambe. Na ntango moto azali kobatisama, nzoto na ye mobimba esengeli kozindisama kati na mai mpo na mwa ntango.a​—Malako 1:9, 10; Misala 8:36.

3. Nsima wana osili komipesa, Yehova azali kosɛnga yo ete omitambwisa na boyokani na ndai na yo. (Nzembo 50:14; Mosakoli 5:4, 5) Zábolo akomeka kopekisa yo ete otika kosalela Yehova. (1 Petelo 5:8) Kasi bɛlɛmá epai na Nzambe kati na libondeli. (Bafilipi 4:6, 7) Yekolá Liloba na ye mokolo na mokolo. (Nzembo 1:1-3) Kangamá makasi na lisangá. (Baebele 13:17) Na kosaláká nyonso oyo, okozwa nguya ya kotikala sembo epai na Nzambe. Na yango, okoki mpo na libela na libela kosala makambo oyo Nzambe azali kosɛnga yo!

[Maloba na nse ya lokasa]