Ntina oyo tosengeli kosala mosala

OLINGAKA mingi nini: kosala mosala to kosakana?— Ya solo, kosakana ezali mabe te. Biblia elobi ete Yelusaleme ‘etondaki na bana mibali mpe bana basi oyo bazali kosakana na nzela.’​—Zekalia 8:5.

Moteyi Monene azalaki kosepela kotala bana mike ntango bazali kosakana. Liboso aya awa na mabelé, alobaki ete: “Nakómaki pembeni na [Nzambe] lokola mosali ya mayele . . . nazalaki kosepela liboso na ye ntango nyonso.” Omoni ete Yesu azalaki kosala mosala elongo na Yehova na likoló. Mpe ntango azalaki kuna, alobaki ete: “Makambo oyo ezalaki kosepelisa ngai ezalaki elongo na bana ya bato.” Ɛɛ, kaka ndenge toyekolaki yango liboso, Moteyi Monene azalaki kosepela mpenza na moto nyonso, ezala ata bana.​—Masese 8:30, 31, NW.

Okanisi ete Yesu azalaki kosakana ntango azalaki mwana moke?— Ekoki kozala ete azalaki kosakana. Kasi lokola azalaki “mosali ya mayele” na likoló, asalaki mpe mosala ntango azalaki awa na mabelé?— Ɛɛ, bazalaki kobenga Yesu “mwana ya mosali-mabaya.” Bazalaki mpe kobenga ye mpe “mosali ya mabaya.” Yango emonisi nini?— Emonisi ete Yozefe, tata-mobɔkɔli ya Yesu, alakisaki ye mosala yango. Yango wana Yesu mpe akómaki mosali ya mabaya.​—Matai 13:55; Malako 6:3.

Yesu ayebaki mpenza mosala ya mabaya malamu?— Lokola babengaki ye “mosali ya mayele,” yango emonisi ete azalaki kosala mosala na ye malamu kuna na likoló, na yango, asengelaki mpe kosala malamu mosala na ye ya mabaya, okanisi bongo te?— Yebá ete, na ntango wana, kozala mosali ya mabaya ezalaki mosala ya lisɛki te. Ekoki kozala ete Yesu asengelaki kokende na zamba kokata nzete, kopasola yango, komema mabaya na ndako, mpe na nsima kosala na yango bamesa, bakiti, mpe biloko mosusu.

Okanisi ete mosala wana ezalaki kopesa Yesu esengo?— Yo mpe okosepela kosalela bato bamesa, bakiti mpe biloko mosusu ya kitoko?— Biblia elobi ete ezali malamu moto “asepela na misala na ye.” Mosala epesaka moto esengo koleka kosakana.​—Mosakoli 3:22.

Na ntembe te, mosala ezali na ntina mingi mpo na makanisi na biso mpe mpo na nzoto na biso. Na mikili mosusu, bana mingi balekisaka ntango mingi na kotala televizyo to kosala masano ya video. Bakómaka mineneminene, gɔigɔi mpe bazalaka mpenza na esengo te. Bapesaka mpe bato mosusu esengo te. Mpo tózala na esengo, tosengeli kosala nini?—

Tomonaki na Mokapo 17 ya buku oyo ete, mpo na kozala na esengo, esengeli kokabelaka bato mpe kosalisaka bango. (Misala 20:35) Biblia ezali kobenga Yehova “Nzambe ya esengo.” (1 Timote 1:11) Mpe, ndenge totángaki na Masese, Yesu azalaki “kosepela liboso na ye ntango nyonso.” Mpo na nini Yesu azalaki na esengo?— Amonisaki ntina moko ntango alobaki ete: “Tata na ngai azali kokoba kosala tii sikoyo, mpe ngai nazali kokoba kosala.”​—Yoane 5:17.

Ntango Yesu azalaki awa na mabelé, asalaki mosala ya mabaya bomoi na ye mobimba te. Yehova Nzambe abongiselaki ye mosala moko ya ntina mingi oyo asengelaki kosala awa na mabelé. Oyebi mosala yango?— Yesu alobaki ete: ‘Nasengeli kosakola nsango malamu ya bokonzi ya Nzambe, mpamba te natindamaki mpo na yango.’ (Luka 4:43) Mbala mosusu, ntango Yesu azalaki kosakola epai na bato, bato yango bazalaki kondimela ye mpe bazalaki koyebisa bato mosusu makambo oyo alobaki, ndenge mwasi Mosamalia oyo ozali komona na elilingi oyo asalaki.​—Yoane 4:7-15, 27-30.

Ndenge nini Yesu azalaki kotalela mosala yango? Okanisi ete azalaki kosepela kosala yango?— Yesu alobaki ete: “Bilei na ngai ezali nde kosala mokano ya moto oyo atindaki ngai mpe kosilisa mosala na ye.” (Yoane 4:34) Esengo ya ndenge nini oyokaka ntango ozali kolya biloko oyo olingaka?— Yango epesi yo likanisi mpo oyeba ndenge Yesu azalaki kosepela na mosala oyo Nzambe apesaki ye.

Nzambe asalá biso tózalaka na esengo ntango tozali koyekola kosala mosala. Alobi ete likabo oyo Ye apesi moto ezali ete moto “asepela na mosala na ye ya makasi.” Na bongo soki oyekoli kosala misala ntango ozali elenge, yango ekopesa yo esengo bomoi na yo mobimba.​—Mosakoli 5:19, NW.

Yango elingi koloba te ete mwana moke akoki kosala misala oyo mokóló asalaka, atako bongo biso nyonso tokoki kosala misala mosusu. Ekoki kozala ete baboti na yo bakendaka mosala mokolo na mokolo koluka mbongo mpo libota na bino ekoka kozwa biloko ya kolya mpe ndako ya kofanda. Mpe ndenge oyebi, mpo ndako ezalaka ntango nyonso pɛto mpe na molɔngɔ, misala ya kosala ezalaka mingi.

Mosala nini okoki kosala na ndako mpo na bolamu ya libota mobimba?— Okoki kosalisa na kotya biloko na mesa, kosukola basaani, kobwaka bosɔtɔ, kokɔmba shambre oyo olalaka, mpe kolɔkɔta biloko oyo osakanaka na yango. Ekoki kozala ete osalaka makambo mosusu wana. Misala wana ezalaka mpenza mpo na bolamu ya libota.

Tótala bolamu oyo misala yango epesaka. Biloko oyo osakanaka na yango osengeli kolongola yango nsima ya kosakana. Na makanisi na yo, mpo na nini ezali na ntina mingi kosala bongo?— Mpo ndako ezala na molɔngɔ, mpe bato bázwa likama te. Soki olongoli biloko yango te, mokolo mosusu mama na yo akoki kokɔta na ndako na biloko na mabɔkɔ mpe akoki konyata eloko moko, akoki koselimwa, kokwea, mpe kozoka. Akoki ata kokɔta lopitalo mpo na yango. Yango ekozala likambo ya mawa, ezali bongo te?— Omoni sikoyo ete ntango ozali kolongola biloko oyo osakanaka na yango nsima ya kosakana, ezali mpo na bolamu ya libota mobimba.

Ezali mpe na mosala mosusu oyo bana basengeli kosala. Na ndakisa, badevuare ya kelasi. Na kelasi oyekolaka kotánga. Bana mosusu basepelaka kotánga, kasi bamosusu balobaka ete kotánga ezali mpasi. Ata soki yango emonanaka mpasi na ebandeli, okozala na esengo soki oyebi kotánga malamu. Soki oyebi kotánga, okokoka koyekola makambo mingi oyo ekosepelisa yo. Okokoka kutu kotánga Biblia, mokanda mpenza ya Nzambe. Na bongo, ntango ozali kosala badevuare na yo ya kelasi malamu, yango ezali mpenza malamu, ezali bongo te?—

Ezali na bato mosusu oyo balingaka kosala mosala te. Ntango mosusu oyebi moto moko ya ndenge wana. Kasi lokola Nzambe asalá biso mpo tósalaka mosala, tosengeli kosala makasi mpo tólingaka mosala. Moteyi Monene alingaki mpenza mosala oyo azalaki kosala?— Ɛɛ, mpo na ye, ezalaki lokola nde azali kolya biloko oyo alingaka mingi. Mosala nini azalaki kosala?— Azalaki koyebisa bato mosusu makambo ya Yehova Nzambe mpe ndenge oyo bakoki kozwa bomoi ya seko.

Yoká sikoyo toli oyo ekoki kosalisa yo olinga mosala. Omituna boye: ‘Mpo na nini mosala oyo esengeli kosalema?’ Ntango oyebi ntina ya mosala moko, ekozala mpasi te mpo osala yango. Mpe ezala ete mosala yango ezali monene to moke, salá yango malamumalamu. Soki osali mosala na yo malamu, yango ekopesa yo esengo lokola oyo Moteyi Monene ayokaki na mosala na ye.