Liyebisi epai ya baboti

Ntango moto azali elenge, azali lokola moto oyo azali kotambola likoló ya nsinga mpo na kokatisa mai. Ntango nyonso oyo azali kobwaka lokolo, ebangisaka. Ntango mosusu yo moboti okoki kosepela te ete mwana na yo akatisa likoló ya nsinga ya ndenge wana. Kasi lokola mwana asengeli kaka koleka na nzela yango, okoki kosalisa mwana mpo akwea te. Baboti nde bakoki mpenza kosalisa bana na bango mpo bálekisa malamu bolenge na bango mpe bákóma mikóló oyo babongi.

Kasi okoki kokanisa ete koloba ezali pɛtɛɛ, kosala nde mama ya likambo! Ezali mpenza bongo. Mbala mosusu ntango mwana na yo ya mobali azalaki mwana moke, azalaki mobulumobulu mpe azalaki kolobaloba mingi, kasi sikoyo akómi malilimalili mpe alingi lisusu kosolola na yo te. Na mwa mikolo oyo eleki, mwana na yo ya mwasi azalaki ná yo lokola pantalɔ ná mokaba, kasi sikoyo akómi koyoka nsɔni bámona ye ná yo!

Ata bongo, ntango bana na bino bakómi ndenge wana, bókanisa te ete bokokoka te kosalisa bango. Mokanda moko ezali oyo ekoki kopesa bino mpe bana na bino bwanya mpo bómitambwisa malamu. Mokanda yango nde Biblia, Liloba ya Nzambe.

Buku Mituna oyo bilenge batunaka—Biyano oyo ebongi, Volimi 2, ebongisami mpo na kopesa mwana na yo batoli ya malamu oyo euti na Makomami. Soki otali na nkasa 4 mpe 5 okomona masolo ndenge na ndenge oyo ezali na buku oyo. Longola yango, buku oyo ezali mpe na makambo oyo elandi:

(1) Ezali na makambo oyo mwana ye moko asengeli kosala. Na bisika mingi ya buku oyo, ekosɛnga mwana na yo akoma biyano to makanisi na ye na mituna mpe makambo mosusu oyo balobeli. Na ndakisa bitanda oyo ezali na nkasa 132 mpe 133, oyo ezali na motó ya likambo “ndenge ya komibongisa liboso,” ekosalisa mwana na yo akanisa mikakatano oyo akutanaka na yango mpe ndenge oyo akoki kolonga yango. Lisusu, buku oyo ezali na biteni libwa, mpe na nsuka ya eteni mokomoko, okomona etanda oyo elobi “makambo oyo nakosalela.” Na lokasa yango akoki kokoma makanisi na ye mpe ndenge oyo ayoki nsima ya kotánga eteni yango.

(2) Ezali kolendisa bana básololaka ná baboti na bango. Na ndakisa, nkasa 63 mpe 64 ezali na etanda oyo elobi “ndenge nini nakoki kosolola na papa to mama likambo etali kosangisa nzoto?” Lisusu, na nsuka ya mokapo mokomoko, ezali na etanda oyo elobi “okanisi nini?” Bana bakoki kosalela etanda yango mpo na bozongeli mpe baboti bakoki kosalela yango mpo na losambo na libota. Lisusu, mokapo mokomoko ezali mpe na etanda oyo elobi “makambo oyo nakosala” mpe fraze ya nsuka ya etanda yango elobi: “Na mokapo oyo, nakosepela kotuna moboti (baboti) na ngai boye: . . .” Yango ekosalisa bana báluka toli oyo ebongi epai ya baboti na bango ntango bazali kobundana na mikakatano ya bolenge.

Toli: Soki olingi ete bana na yo bákoma na buku na bango makambo oyo ezali mpenza na mitema na bango, tikeláká bango mpe bonsomi ya kobomba makambo oyo bakomi. Mbala mosusu na nsima, bango moko bakoyebisa yo makambo oyo bakomaki.

Zalá na buku na yo moko mpe tángá yango malamumalamu. Ntango ozali kotánga yango, meká kokanisa mikakatano mpe mitungisi ndenge na ndenge oyo okutanaki na yango, ezala mpe makanisi kilikili oyo ozalaki kobundana na yango ntango ozalaki naino elenge. Soki libaku emonani, sololá makambo yango ná mwana na yo. Yango ekosalisa mwana afungolela yo motema na ye. Ntango azali koyebisa yo likambo, yoká ye! Mpe ata soki ozali kosala nyonso mpo asolola ná yo, kasi ye azali kaka kolinga te, kolɛmba te. Ata soki ezali komonana lokola bazali koyoka toli na yo te, kasi yebá ete bana bayokelaka mingi baboti na bango koleka baninga na bango.

Tozali na esengo mingi ya kopesa bino ná bana na bino buku oyo ezali na batoli oyo euti na Biblia, mpe tozali kobondela ete buku oyo esalisa mpenza mabota na bino.

Babimisi