“Mpisoli ya botondi”

“MPISOLI ya botondi ekitaki na matama na ngai, wana nautaki kotanga lisolo ‘Lolenge nini kosalisa bato oyo banyokwami na makanisi na kozwa lisusu esengo.’” (Mosenzeli ya 15 mars 1990, lok. 26-30) Nsima na kobima ya masolo likoló na konyokwama na makanisi, kati na nimero ya ler mpe ya 15 mars 1990, la Société azwaki ebele na mikanda ya botondi miye mizalaki kobanda na maloba motindo oyo. Kasi, maloba oyo totii awa ezali ya moklisto mwasi moko Témoin de Jéhovah ya Japon, oyo mwana na ye ya mobali abelaki Schizophrénie (motindo mosusu na maladi ya makanisi) kala mingi te. Tala oyo akomaki:

“Mokolo nyonso, nasengeli koyikisa mpiko mpe kolendisa molimo oyo monyokwami na makanisi, kino komiyoka mbala mosusu ete makasi masili mpo na kolanda kosala yango. Soki butu ekómi, mwana na ngai akobangaka mingi mpenza. Nakopesaka ye nkisi mpo na kolála, mpe nakofandaka mpo na kobondela ye na kotyáká maboko na ngai na elongi na ye kino akolála. Lokola soko nde nazali mpenza kolalisa bébé moko na mbeto. Pene na ngonga moko na nsima, akozwa mpenza mpongi makasi. Wana nde napemi mwa moke, kasi na ntango wana nazali kokanisa oyo nasengeli kosala lobi lolandi.

“Mwana na ngai azali kozongela mbala na mbala maloba oyo ete: ‘Nazali eloko mpamba. Nazali ata na elikya moko te.’ Mikolo nyonso azalaki kotuna na mawa nyonso ete: ‘Ngai nakobika?’ Ntango nini nakotika komela nkisi? Yango ekoumela ntango boni?’ Na ntango wana, lokola oyo zulunalo elobeli yango, nakotunaka ye mituna mosusu mpo akanisa makambo mosusu, mpe bongo nakosalisaka ye na lolenge ekoki ete azongela makanisi ya bomoto. Kasi, yango ekosalemaka mokolo na mokolo.

“Mbala mosusu, wana akómaka mpenza na bobangi, mwana na ngai akobengaka bankulutu na téléfone na katikati na butu mpe akosengaka bango ete babondela mpo na ye. Nsima wana nde ameki kozwa mwa makasi mpe kopema. . . . Mbala na mbala mpasi na ye ekómaka makasi wana mobali na ngai oyo azali mondimi te, asali mobembo ya mombongo. Na ntango wana, nakobengaka mbala mosusu na téléfone mpo na kozwa lisalisi ya nokinoki, mpe ebele na Ba Témoins bayaka na ndako.

“Bandeko na bolingo, nazali kotonda bino na motema moko lokola bozali kobimisa mbala na mbala masolo motindo oyo mamonisi ete bozali mpenza komibanzabanza na baoyo bazali na bolembu.”