Yesu, bomoi na ye mpe mosala na ye

Atekami mpe akambami

WANA atungisamaki mpo na kimya monene na Yesu kati na monyoko, Pilato ameki lisusu kofungola ye, kasi banganga minene babakisi lisusu nkanda na bango. Basili kozwa ekateli ete likambo moko te ekoka kopekisa mokano na bango mabe. Yango wana balandi konganga ete: “Kakisa ye na nzete! Kakisa ye na nzete!”

Na mawa nyonso, Pilato alobi na bango ete “Bokamata ye bino mpenza mpe bokakisa ye na nzete.” Ekeseni mpenza na oyo bauti koloba mosika te ete, Bayuda bazali na lotomo ya koboma bobele mosali na mabe oyo abuki mobeko monene ya lingomba. Nzokande, soko koleka mbala mitano, Pilato asili komonisa ete Yesu asali likambo mabe te na kolobáká ete: “Ngai namoni likambo moko kati na ye te.”

Wana Bayuda bamonaki ete bifundeli na makambo na politike bizwaki matomba te, bazongeli lisusu efundeli likoló na kotuka, oyo basalelaki mwa bangonga na liboso, na ntango Yesu asambisamaki liboso na Sanedrina. Balobi ete “Biso tozali na mobeko mpe ebongi na mobeko na biso ete akufa mpo ete amizalisi Mwana na Nzambe.”

Oyo ezali efundeli ya sika mpo na Pilato, mpenza ebangisi ye lisusu koleka. Asosoli sikawa ete Yesu azali moto lokola bato banso te, lokola oyo emonisaki ndóto ya mwasi na ye mpe nguya monene na ezaleli oyo azali komonisa. Kasi, azali mpenza “Mwana na Nzambe?” Mpamba te Pilato ayebi ete Yesu azali Mogalilé. Nzokande, ekoki mbala mosusu kozala ete azalaki na bomoi mosusu liboso. Akótisi ye lisusu na ndako mpe atuni ye ete: “Yo outi wapi?”

Yesu ayanoli ye te. Kala mingi te, auti koloba na Pilato ete, ye azali mokonzi, kasi bokonzi na ye euti na mokili oyo te. Na boye, ntina ya kopesa bandimbola mosusu ezali te. Kasi, kopusamáká na lolendo mpo ete aboyaki koyanola ye, Pilato asilikeli Yesu na kolobáká ete: “Okosolola na ngai te? Oyebi te ete nazali na bokonzi ya kokangola yo mpe na bokonzi ya kokakisa yo na nzete?”

Yesu ayanoli na limemya ete: “Ozali na bokonzi likoló na ngai te soki epesameli yo uta na Likoló te.” Alingi kolobela bokonzi oyo Jéhovah asili kopesa nzela na bakonzi na bato ete bakamba makambo ya mokili. Yesu abakisi: “Boye ye oyo akabi ngai epai na yo azali na lisumu lileki.” Solo mpenza, nganga monene Kaifa mpe baninga na ye, lisusu mpe Yuda Mokeliota, bazali na ngambo monene kati na monyoko nyonso na Yesu.

Kokamwáká lisusu Yesu mpe na kobanga ete mbala mosusu auti na Nzambe, Pilato atye lisusu milende mpo na kokangola ye. Kasi, Bayuda baboyi koyoka Pilato. Bazongeli lisusu bifundeli na bango likoló na makambo na politike, na kobakisáká na mayele mabe ete: “Soko okokangola moto oyo, ozali moninga na Kaisala te. Moto na moto oyo akomizalisa mokonzi, azali kotombokela Kaisala.”

Atako yango ekokaki kobimisa makambo mabe, Pilato abimisi lisusu Yesu na libanda mpe alobi lisusu na Bayuda ete: “Botala mokonzi na bino!”

Bazongisi ete “Longola ye! Longola ye! Kakisa ye na nzete.”

Pilato alembaki wana atunaki bango ete, “Nakokakisa nde mokonzi na bino na nzete?”

Boyangeli na Baloma ezali kookisa Bayuda nkanda. Na solo mpenza, basepeli na yango te. Nzokande, banganga minene balobi na bokosi nyonso ete: “Tozali na mokonzi te bobele Kaisala.”

Kobangáká noki akobebisa mosala na ye mpe lokumu na ye, Pilato apesi nzela na bopusi ya Bayuda. Apesi Yesu epai na bango. Basoda balongoli ye elamba motané oyo balatisaki ye na esika na bilamba na ye ya likoló. Wana bazalaki kokamba ye na esika na mpasi, Yesu asengeli lisusu komema ye moko nzete oyo akokakisama.

Ezali sikawa na katikati na ntongo ya Vendredi le 14 Nisan; midi ezali mpenza mosika te. Yesu atelemi uta ntongo, mpe azali bobele komona mpasi. Akoki mpenza kolemba mpo na kilo ya nzete. Yango wana moleki nzela moko na nkombo Simona moto na Cyrène na mokili ya Afrike, azwamaki mpo na komema nzete na esika na ye. Wana bazali kokende, ebele na bato bazali kolanda nsima, mpe basi bazali kolela mpe kooka mawa likoló na Yesu.

Kobongwanáká epai na basi wana, Yesu alobi ete: “Bana basi na Yelusaleme, botika kolela na ntina na ngai. Bolela nde mpo na bino moko mpe mpo na bana na bino. Tala mikolo mikoya wana bato bakoloba ete: ‘Esengo na bikomba, na bango bazwi zemi te, na bango bamelisi bana te!’ Na nsima na ngomba minene ete: ‘Kwea likoló na biso!’ Mpe na ngomba mike ete: ‘Zipa biso!’ Mpamba te soki basali makambo oyo na nzete mobesu, makambo nini bakosala na nzete ekauki?”

Yesu azali kolobela nzete oyo ete libota na Yisraele, nzete oyo ezali naino mwa moke mobesu, elilingi ya bomoi, mpo ete Yesu azali wana elongo na litika na libota oyo bandimeli ye. Kasi ntango Bayuda yango bakolongwa, libota likotikala lisusu te, bobele nzete mpamba oyo esili kokufa na elimo, ebongiseli ya libota oyo likauki. E, ekozala mpenza na bantina ya kolela wana mampinga ya Baloma, maye masalelami na Nzambe, makobebisa libota ya Bayuda. Yoane 19:6-17; 18:31; Luka 23:24-31; Matai 27:31, 32; Malako 15:20, 21.

◆ Bakonzi ya mangomba bafundi lisusu Yesu na likambo nini, wana emoni bango ete bifundeli ya politike bizwi matomba te?

◆ Mpo na ntina nini mosusu, oyo mbala mosusu ebangisi Pilato?

◆ Nani azali na ngambo monene kati na makambo oyo makomeli Yesu?

◆ Bakonzi ya mangomba bazali kosala nini mpo ete Pilato apesa Yesu epai na bango?

◆ Yesu alobi nini epai na basi oyo bazali kolela na ntina na ye, mpe maloba na ye likoló na nzete “mobesu” mpe nzete “ekauki” malimboli nini?