Ekoki kosalema te!

“KOINGELA yo kamela na lidusu ya ntonga ezali petee koleka koingela na mozwi kati na Bokonzi ya Nzambe.” (Matai 19:24) Na maloba oyo, Yesu alingaki kopesa liteya moko epai na bayekoli na ye. Elenge mokonzi moko Moyuda autaki koboya libyangi ya kolanda Yesu mpe ya kolekisa eleko moko kitoko ya elimo. Mobali yango aponaki kobotela bozwi na ye na esika ya kolanda Masiya.

Yesu alobaki te ete mozwi akoki soki moke te kokola na Bokonzi ya Nzambe; ya solo, engebene ezalela ya moto na moto, bazwi basusu bakomaki bayekoli na ye. (Matai 27:57; Luka 19:2, 9) Nzokande, mbano yango ekoki te kopesama na moto oyo alingi bozwi na ye koleka makambo ya elimo. Ezali bobele na komibanzabanza na bamposa na ye ya elimo mpe na koluka lisalisi ya Nzambe nde moto motindo yango akoki kozwa lobiko.​—Matai 5:3; 19:16-26.

Lisese ya kamela oyo ezali kokola na lidusu ya ntonga lisengeli te kotalelama na lolenge ekomami. Yesu asalelaki elobeli ya makasi mpo na komonisa mikakatano oyo bazwi basengeli kokutana na yango wana bazali komeka kosepelisa Nzambe mpe kobatela lolenge ya bomoi na bango ya mposa ya bozwi.​—1 Timote 6:17-19.

Basusu bozali koloba ete lidusu ya ntonga ezalaki ekuke moko moke oyo ezalaki na efelo ya engumba, epai kamela akokaki koleka bobele na mpasi, ata nsima ya kolongola mikumba na yango. Kasi liloba ya greke rha·phisʹ, oyo ebongolami na “ntonga“ na Matai 19:24 mpe na Malako 10:25, euti na liloba oyo elimboli “kosona.” Na Luka 18:25, liloba be·loʹne elimboli ntango ya kosona, mpe kati na Traduction du monde nouveau texte wana ezali kotangama boye: “koingela ya kamela na lidusu ya ntonga ya kosana ezali petee koleka koingela na mozwi kati na Bokonzi ya Nzambe.” Bato mingi ya boyebi na likambo yango bandimi motindo wana ya kolimbola W. Vine alobi ete: “Likanisi ya kosalela ‘lidusu ya ntonga’ na bikuke mike emonani lokolo ete ezali likanisi ya sika; elembo moko ya kala ezali kati na yango te.”​—An Expository Dictionary of New Testament Words.

Mokanda moko moyebisi ete, kamela nyama monene ezali komeka kokota na lidusu ya ntonga ya kosona, ezali wana ‘elobeli makasi ya bato na orient.’ Mpe na ntina na baoyo bakanisi ete bazali na mayele mingi kino kokokisa oyo esengeli kosalema te, mokanda Talmud babylonien elobi ete ‘bazali kolekisa nzoku na lidusu ya ntonga.’ Yesu asalelaki elobeli ya makasi mpe kokesenisa ya monene mpo na komonisa likambo oyo likoki kosalema te. Kamela to nzoku bakoki te kokota na lidusu ya ntonga ya kosona. Kasi, na lisalisi ya Nzambe, mozwi akoki kotika likanisi ya koluka bobele bozwi mpo na koluka bomoi ya seko na sembo nyonso. Lisusu, baoyo nyonso bazali na mposa ya sembo ya koyekola mpe ya kosala mokano ya Jéhovah, Nzambe Oyo Aleki likoló.