Nzala oyo esakolamaki

NA BAMBULA oyo nzala ekómi koyokama mingi kati na bansango ya mokili. Bililingi ya nsomo mpe ya kopesa mpasi bizali kouta na Ethiopie mpe bipai mosusu. Na 1992 likebi na mokili mobimba libendamaki mingi epai na bato oyo bakufaki na Somalie mpo na kozanga mpe mpo na etumba. Zulunalo International Herald Tribune eyebisaki na Septembre 1992 ete: “Moto moko te ayebi mpenza soki bato boni ya Somalie basili kokufa, kasi Croix Rouge ezali koyebisa motuya ya bato koleka 100 000. Bankama, soki ata bankóto, bazali kokufa mokolo na mokolo.”

Mitango mizali komonisa mpenza te bolozi mpe mpasi oyo bato wana bazali kooka. Yvette Pierpaoli, oyo azali momonisi ya ebongiseli Refugees International na mikili ya Mpótó, mpo na kotala makambo na bato oyo bakimi mboka na bango, akomaki kati na zulunalo ya O.N.U., Réfugiés ete: “Na New York to na Genève, makambo ya bato bakimi mbokar na bango mazali komonana polele mpenza; mituya mizali kopesama mpe bazero oyo ezali kati na mitango mikoki mbala mingi te kookisa mpasi. Kasi kuna mosika, na bandelo ya mikili epai mobulu mozali, nsomo ekoki kokangisa mongongo na yo mpe okoki kooka mposa ya konganga na kolela mpo na bonene ya mpasi na bato.”

Croix Rouge elobi ete milende na bango mpo na kosunga Somalie ezali mosala moleki monene ya kopesa lisalisi, oyo naino esalema te, nzokande bato mingi ya mayele bazali komilela ete lisalisi yango lizali bobele moke mpe likómi nsima mingi. Pierpaoli amileli ete: “Mikili oyo mizali kopesa lisalisi mizali kokanga maboko, milembi mpo na kosunga Afrique oyo ezali ntango nyonso se kobeba. . . . Bazali kopamela bato ya Afrique mpo na esaleli mabe ya mosolo, lokoso ya bayangeli na bango, bitumba oyo bizali na nsuka te.”

Biblia esilaki kosakola eleko moko oyo kozanga bilei esengelaki komonana “na esika moko nsima na mosusu.” Kozanga bilei yango, elongo na makambo mosusu mingi, lokola bitumba, koningana ya mabelé, maladi mabe, emonisi ete Bokonzi na Nzambe ebelemi. (Luka 21:11, 31) Biblia emonisi lisusu ete na nse ya Bokonzi malamu wana ya Nzambe, bilei bikozala mingi mpo na bato nyonso na mokili. Mokomi na Nzembo akomaki ete: “Masango ekotonda na mokili ata kino likoló na nkeka.”​—Nzembo 72:16.