Babatelami na Moninga na bango aleki monene

EZALI mpenza na boninga moko monene oyo ebatelaka Batatoli ya Yehova. Ezali bongo boyokani ya ntina mingi oyo bazali na yango elongo na Moninga na bango aleki monene, Yehova Nzambe. (Kokanisá na Yakobo 2:23.) Asungaka bango na bantango ya komekama makasi ya kondima na bango. Yango epesaka bango nzela ya kozala bato oyo babatelaka bosembo.

Bato mingi mingi basili kokumisa ezaleli ya bosembo ya Batatoli oyo bazalaki kati na bamboka oyo etambwisamaki na biyangeli mabe. Moko na bango ezali bongo Jiří Krupička, nganga-mayele ya filozofi mpe na zébi ya bikelamu ya bomoi, oyo akimaki uta na Tchécoslovaquie na 1968 nsima ya kolekisa bambula mingi kati na bakáa ya bakangami ya bakoministe. Kati na mokanda na ye Renesance rozumu (Bolamuki ya mayele), alobeli bampasi mpe bompikiliki ya Batatoli ya Yehova, baoyo batyamaki na bolɔ́kɔ mpo na ezaleli na bango ya kozanga kokɔta na makambo ya politiki.

Na nsé ya boyangeli ya bakoministe, Batatoli mingi bakatelamaki etumbu ya bolɔ́kɔ mpo na kondima na bango. Atako batyamaki na bolɔ́kɔ, baboyaki kotimola uranium oyo esengelaki kosalelama mpo na bitumba. (Yisaya 2:4) Krupička alobeli likambo moko oyo amonaki kati na moko na bisika oyo bazalaki kotimola makɛ́lɛ yango na 1952. Amonaki bilili ya bato mibale batɛlɛmi lokola bikeko ya ngalási kati na malili makasi ya eleko ya mpiɔ. Bazipaki bango mbɛki ya bibendé na motó mpe na ntólo.

Krupička akomi ete: “Balatisamaki bilamba ya bolɔ́kɔ bisilá konzuluka, bazalaki kotɛlɛma wana uta na ntɔ́ngɔ́ mpenza. Lolenge nini balóngaki kotɛlɛma na boumeli ya ntango molai na makolo makangami na mpiɔ? Na lisalisi ya nguya ya kondima. Mbɛki yango ezalaki ya kala mpe esilaki koguga. Moto moko ya motema mabe abɛtaki bango na motó mpe na mapeka na makasi nyonso na boye ete mbɛki wana esilá kobeba ekataki simisi ya moko na bato yango mpe ekɔtaki na loposo na ye, mpe makila mazalaki kotanga uta na lobɔkɔ ya simisi na ye.

“Sodá-mokɛngɛli atɛlɛmisaki molɔngɔ́ na biso liboso na bango, mpe mokonzi ya basodá asalelaki biso mwa lisukúlu moko ya mokuse. Alobaki ete, koboya mosala ezali bongo botomboki mpe etumbu esengeli kopesama mpo na yango. Ezali te mayoki ya mpambampamba na ntina na bitumba mpe na ntina na koboma nde ekosalisa bato oyo baboyaka kokɔta na bitumba, banguna ya sosializme.”

Mokonzi yango ya basodá akamataki ebendé moko mpe abɛtaki yango likoló na mbɛki moko. Moto oyo alatisamaki yango akweaki na mbɛki yango na mabelé. Likambo oyo lisalemaki na nsima etikalaki libela kati na bɔɔngɔ́ ya Krupička.

Alobi ete: “Loyembo moko ezalaki koyembama uta na bambeki wana. Mingongo na nsé, libondeli epai na Nzambe lisalemi na mongongo ya kokita, ye oyo akoki koyoka makambo nyonso oyo mazali kouta bipai nyonso​—ayokaki ata loyembo wana oyo ezalaki koyembama uta na mbɛki wana ya kala, oyo esilá koguga, oyo esalemaki na uranium. Ayokaka yango makasi koleka loyembo oyo eyembaka na etuluku ya bayembi kati na ndakonzambe.”

Na mokolo mwa 1 Sɛtɛ́mbɛ 1993, mosala ya Batatoli ya Yehova na République Tchèque endimamaki engebene mibeko ya Leta. Batatoli ya Yehova ya République Tchèque bazali sikawa na nsai ya kokokisa mosala na bango ya boklisto ya koteya na bonsomi nyonso. Ee, bazali na esengo ya koyebisa basusu na ntina na Yehova, moninga na bango oyo aleki monene.

[Elilingi na lokasa 7]

Baoyo bazalaki kati na liyangani na République Tchèque