Bolingo oyo eleki bolingo ya mama mpo na mwana na ye

BAMAMA bazali kobwaka bana na bango ya mike oyo bauti kobota na bisika engbunduka etɛlɛmaka, na bakabine ya nzela, to na balabala. Na bantango mosusu, bato oyo balongolaka bosɔtɔ na bikunde bakutaki bana oyo mingongo mikauki mpo na kolela bamama na bango. Zulunalo O Estado de S. Paulo eyebisi ete “likambo ya kobwaka bana na balabala ekómi mingi.” Ya solo, elenge mwasi oyo aboti akoki, na nsima, koyoka mawa mpo na likambo asali. Kasi, akobwaka mwana ata soki mwana yango akokufa.

Okoki komituna ete: ‘Ndenge nini mama akoki mpenza kozwa likanisi ya kobwaka mwana na ye?’ Biblia elobeli likambo moko ya mawa lokola elilingi mpo na komonisa mayoki ya Mozalisi na biso epai ya bato na ye: ‘Mwasi akoki nde kobosana mwana na ye oyo azali naino komela mabɛlɛ? Ayoka mawa lisusu te mpo na mwana mobali na libumu na ye? Ata baoyo bakobosana nde ngai nakobosana yo te.’—Yisaya 49:15.

Ya solo, Nzambe azali na bolingo mozindo mpo na biso mpe atyelaka bamposa na biso likebi koleka mama nyonso. Ozala elenge to mokóló, ezala okutani na likambo nini, yebá ete ozali yo moko te. Mozalisi na yo azali wana mpo na kosalisa yo mpe asepelaka ete yo ozala malamu. Mokomi na nzembo alobaki boye: “Ata tata mpe mama bakotika ngai, nde [Yehova] akolɔkɔta ngai.”​—Nzembo 27:10.

Na mokili mobimba, zulunalo Linɔ́ngi ya Mosɛnzɛli mpe Lamuká! ezali kobima mpo na kopesa boyebi ya “Nzambe bobele moko ya solo,” Yehova, mpe ya Mwana na ye Yesu Klisto, oyo ekoki kolimbola bomoi ya seko mpo na baoyo bazali kosepela koyeba yango.​—Yoane 17:3.