Masolo ya basi mibale oyo bakufelá mibali

SANDRA azali mwasi oyo akufelá mobali mpe afandaka na ekólo Australie. Ntango mobali na ye akufaki, eleki sikoyo mwa bambula, Sandra abulunganaki makanisi. “Ntango namonaki ete esili, nazangi molongani mpe moninga na ngai ya motema, likambo yango elekaki ngai motó. Tii lelo oyo nayebaka te ndenge oyo nalongwaki na lopitalo tii nakómaki na ndako to mpe makambo nini nasalaki na nsima na mokolo wana. Na bapɔsɔ oyo elandaki, kobanga oyo nazalaki na yango esilaki mpe na esika na yango nakómaki nde koyoka mpasi na nzoto.”

Sandra azali na moninga moko ya mokóló, Elaine; ye mpe mobali na ye akufá eleki sikoyo mbula soki motoba. Elaine asalaki sanza motoba mpo na kokɛngɛla David mobali na ye, ntango azalaki kobɛla, tii akufaki na maladi ya kanser. Elaine ayokaki mpasi mingi; kutu, mwa mikolo na nsima ya liwa ya mobali na ye, miso na ye ekufaki na boumeli ya mwa ntango. Mokolo mosusu, mbula mibale na nsima ya liwa ya mobali na ye, akweaki na miso ya bato. Monganga asalaki ye ekzamɛ kasi azwaki ye na maladi te. Kasi amonaki ete Elaine azalaki kobomba mpasi na ye na motema; yango wana alobaki na ye akende na ndako mpe asala makasi ete alela. Elaine alobi ete: “Esalaki mikolo mingi mpo namesana na mawa na ngai.” Lisusu, soki azali kaka ye moko, Elaine alobi likambo moko oyo azalaki kosala: “Nazalaki kokende na shambre mpe nazalaki kozipa motó na ngai na bilamba ya David.”

Ya solo, kokufela mobali oyo olingaki mingi ememaka mitungisi ndenge na ndenge, mpamba te, likoló ya mpasi ya kotikala yo moko kozanga mobali, ezalaka mpe na mikakatano mosusu. Na ndakisa, na eleko moko, Sandra amonaki ete azalaki lisusu ye te. Lokola basi mingi oyo bauti kokufela mibali, azalaki mpe koyoka ete azangi moto oyo akobatela ye. Sandra alobi boye: “Lokola nazalaki momeseno ya kotika ete mobali na ngai azwaka ekateli ya nsuka; mbala moko natikalaki ngai moko mpo na kozwa bikateli yango. Mpɔngi na ngai ekómaki kokatanakatana. Nakómaki kolɛmbalɛmba. Nayebaki likambo ya kosala te.”

Mokolo na mokolo, makambo lokola oyo ya Sandra na Elaine ezali kokómela ebele ya basi na mokili mobimba. Mibali mingi bazali kokufa na maladi, na makama, na bitumba, ntango bazali koboma bato ya etuluka moko mpe na mobulu; mpe ntango bakufi, bazali kotika basi na bango bango moko.a Mingi kati na basi yango bafandi na mpasi na bango na motema, bazali koyeba likambo ya kosala te. Baninga na bandeko bakoki kosala nini mpo na kosalisa bango bámesana na bomoi ya ndenge yango? Lisolo oyo elandi epesi mwa makanisi oyo ekoki kosalisa.

[Maloba na nse ya lokasa]