Mituna ya batángi

Ntango nini “Esika eleki bosantu” epakolamaki, lokola Danyele 9:24 (NW) esakolaki yango?

Esakweli ya Danyele 9:24-27 elobeli komonana ya “Masiya Mokonzi” to Klisto. Na yango, “Esika eleki bosantu” oyo esakolamaki ete ekopakolama, ezali tempelo ya Yelusaleme te. Ezali “Esika eleki bosantu” ya tempelo ya Nzambe na likoló, tempelo na ye monene ya elimoa​—Baebele 8:1-5; 9:2-10, 23.

Ntango nini tempelo ya Nzambe na elimo ebandaki kosala? Tótalela makambo oyo esalemaki na mobu 29 T.B., ntango Yesu akendaki kozwa batisimo. Kobanda ntango wana, Yesu akokisaki maloba ya Nzembo 40:6-8. Na nsima, ntoma Paulo amonisaki ete Yesu abondelaki Nzambe boye: “Olingaki mbeka mpe makabo ya kotombwa te, kasi osili kobongisela ngai nzoto.” (Baebele 10:5) Yesu ayebaki ete Nzambe “alingaki” te bálanda kopesa banyama lokola mbeka na tempelo ya Yelusaleme. Kasi, Yehova abongisaki nzoto ya Yesu, moto ya kokoka, mpo na kopesa yango lokola mbeka. Mpo na komonisa mposa makasi oyo azalaki na yango, Yesu alobaki lisusu boye: “Talá nasili koya, ekomami mpo na ngai kati na mokanda. Ɛ Nzambe, nayei kosala mokano na yo.” (Baebele 10:7) Eyano ya Yehova ezalaki nini? Evanzile ya Matai elobi boye: “Esili ye kobatisama, abimi nokinoki na mai. Mpe talá, likoló epaswami mpe amoni [elimo, NW] ya Nzambe kokita lokola ebenga mpe kokóma likoló na ye. Mpe mongongo uta na likoló elobi ete, Oyo mwana na ngai ya bolingo, nasepeli [na] ye mingi.”​—Matai 3:16, 17.

Lokola Yehova Nzambe andimaki ete nzoto ya Klisto epesama lokola mbeka, emonisaki ete etumbelo monene, oyo eleki etumbelo oyo ezalaki na tempelo ya Yelusaleme, esalemaki. Etumbelo yango ezalaki “mokano” ya Nzambe, to ebongiseli mpo na kondima ete bomoi ya Yesu lokola moto epesama lokola mbeka. (Baebele 10:10) Ndenge oyo Yesu apakolamaki na elimo santu elimbolaki ete Nzambe abimisaki ebongiseli na ye mpo na tempelo ya solo ya elimo.b Yango elingi koloba ete ntango Yesu azwaki batisimo, esika ya Nzambe na likoló epakolamaki, to eponamaki lokola “Esika eleki bosantu” kati na ebongiseli monene ya tempelo ya elimo.

[Maloba na nse ya lokasa]

[Elilingi na lokasa 27]

“Esika eleki bosantu” epakolamaki ntango Yesu abatisamaki