Masolo ya Basakoli ya Bokonzi

“Obengi na nimero mosusu”

LESLIE na Caroline bazalaki kopesa litatoli na telefone, moto na moto na ngala na ye, epai ya bafandi ya mwa kaa moko ya mibange oyo ebatelami makasi, na engumba Johannesburg, na ekólo ya Afrika ya Sudi. Bakutaki bato mingi te na bandako, mpe mwa bato yango bazalaki na mposa mpenza te ya koyoka nsango ya boklisto; yango wana ntango mwasi moko ayanolaki na telefone, Caroline asepelaki mingi.

Caroline atunaki: “Wana nde Madame B.?”

Mongongo moko ya boboto elobaki : “Ah te mama, ngai nazali Madame G. Obengi na nimero mosusu.”

Lokola mwasi yango ayanolaki mpenza na boboto, Caroline alobaki: “Nayebisa yo kasi likambo nalingaki kosolola na Madame B.” Na yango ayebisaki ye mapamboli oyo ekozwama ntango Bokonzi ya Nzambe ekoya. Ntango basilisaki koyokana mpo Caroline akende kotikela ye mwa buku Nzambe azali kosɛnga nini epai na biso?, Madame G. atunaki: “Nalingi natuna, ozali moto ya lingomba nini?”

Caroline ayanolaki ete: “Tozali Batatoli ya Yehova.”

“Te, te, nalingi lingomba wana te! Nazali na mposa ya kosolola na bino te.”

Caroline amekaki kosimba motema na ye boye: “Nauti kopesa yo elikya moko ya malamu mingi na boumeli ya miniti 20 oyo tosololi; nalakisi yo na Biblia makambo oyo mosika te Bokonzi ya Nzambe ekosala mpo na bato. Osepelaki mingi koyoka makambo wana, kutu ozalaki na nsai mpenza mpe omonisaki mposa ya koyeba makambo mosusu. Oyebi nini mpenza na ntina ya Batatoli ya Yehova? Soki ozali kobɛla, okobenga moto oyo abongisaka mituka? Mpo na nini okoki kotika ngai te nalimbolela yo bindimeli ya Batatoli ya Yehova?”

Mpo na mwa ntango moke afandaki nyɛɛ; na nsima ayanolaki boye: “Oyo olobi, nakanisi ezali solo. Malamu oya. Kasi oyebaka ete ata mokolo moko te okokómisa ngai moto ya lingomba na bino!”

Caroline azongisaki boye: “Ata soki nalingi kokómisa yo moto ya lingomba na biso, nakokoka te. Yehova kaka nde moto akoki kosala yango.”

Nyonso elekaki malamu ntango Caroline akendeki kotikela Mme G. ​— (Betty) mwa buku, mpe andimaki báya kotala ye lisusu. Ntango Caroline azongaki lisusu, Betty alobaki na ye ete ayebisaki basi mosusu oyo balyaka na ye mesa moko ete azali kosolola na Batatoli ya Yehova. Basi yango batombolaki mabɔkɔ likoló mpe batunaki ye: “Ndenge nini osali likambo ya boye? Bato wana bandimelaka kutu Yesu te!”

Mbala moko Caroline atunaki ye likambo moko ya ntina oyo basololaki etali Bokonzi ya Nzambe.

Caroline atunaki boye: “Nani akozala Mokonzi?”

Mpe Betty ayanolaki: “Ezali bongo Yesu.”

“Ezali bongo,” Caroline alobaki. Na nsima akobaki na kolimbolela ye ete Batatoli ya Yehova bandimaka ete Yesu azali Mwana ya Nzambe kasi bakokani te na Nzambe, azali mpe te eteni ya Bosato.​—Malako 13:32; Luka 22:42; Yoane 14:28.

Na nsima ya kozongela Betty mbala mwa mingi, Caroline amonaki ete atako mwasi wana azalaki kotalela bomoi na makanisi ya malamu mpe azalaki moto ya esengo, nzoto na ye ezalaki kolɔngɔnɔ mpenza te. Kutu, abɛlaka kanser mpe abangaka akufa. Ayebisaki Caroline ete: “Elingaki kozala malamu mpenza soki nayokaka makambo oyo bambula mingi liboso mpe soki nazalaka na kondima lokola yo.” Caroline abɔndisaki ye na komonisa ye bavɛrsɛ oyo elobaka ete liwa ezalaka lokola mpɔngi ya makasi, kasi moto akoki kolamuka na liwa mpo na kosekwa. (Yoane 11:11, 25) Nyonso wana elendisaki Betty mingi, oyo azali sikoyo koyekola Biblia mbala na mbala. Lokola bokolɔngɔnɔ ya nzoto na ye ezali kobeba se kobeba, yango ezali kopesa ye likoki te ya koyangana na makita na Ndako ya Bokonzi.

Caroline alobi boye: “Mpo na ngai, emonani polele ete banzelu batambwisaka mosala oyo. Nalingaki nde kobenga na nimero ya Madame B. kasi nakweaki na nimero ya Betty, mpe likambo ya kokamwisa Betty azali na mbula 89!”​—Emoniseli 14:6.