“Nkisi ya miso mpo opakola na miso na yo”

YESU KLISTO apesaki etinda wana, na ekeke ya liboso, na lisangá ya boklisto oyo ezalaki na mboka Laodikia, na Asie Mineure.

Yesu alobaki boye: “Osomba . . . nkisi ya miso mpo opakola na miso na yo bongo omona.” Ezalaki mpenza maladi ya miso ya solo te, kasi kokufa miso ya elimo oyo ezalaki na mposa ya nkisi. Baklisto ya Laodikia bazalaki kolanda bizaleli ya bato ya mboka wana ya bozwi mingi; yango esalaki ete bátya lisusu likebi te na makambo oyo ezalaki mpenza bamposa na bango ya elimo.

Yesu azalaki komonisa ezaleli oyo ekómisaki bango na mikakatano ya miso, ntango alobaki boye: “Olobaka ete: ‘Nazali moto ya bomɛngo mpe nasili konduka bomɛngo mpe nazali ata na mposa ya eloko moko te,’ kasi oyebi te ete ozali moto ya mpasi mpe moto ya mawa mpe mobola mpe moto akufá miso mpe bolumbu.” Atako bango moko bayebaki yango te, bandeko ya lisangá yango bazalaki na mposa ya “nkisi ya miso” oyo bakokaki kozwa kaka soki bandimi kolanda mateya mpe disipilini ya Yesu Klisto. Yango wana Yesu alobaki na bango ete: ‘Bósomba epai na ngai.’​—Emoniseli 3:17, 18, NW.

Ndenge kaka ezalaki mpo na baklisto wana ya Laodikia, lelo oyo mpe baklisto ya solo basengeli kokeba, mpo ntango mosusu kozanga ete báyeba yango, bakoki komekola bizaleli mabe ya bato oyo bazingi bango, bato oyo bamipesi na koluka kokóma na bozwi mingi mpe na bomoi ya bisengo. Mpo miso na biso ya elimo emonaka malamu, esengeli tólanda likebisi oyo: “Osomba epai na [Yesu] . . . nkisi ya miso mpo opakola na miso na yo bongo omona.”

Tósimba malamu likambo oyo ete esengeli kosomba “nkisi ya miso” yango. Yango elakisi ete ezali na motuya oyo esengeli kofuta. Motuya yango ezali nde ntango oyo tosengeli kolekisa mpo na koyekola Liloba ya Nzambe mpe komanyola likoló na yango. Mokomi na Nzembo ayebisi biso ete Liloba yango “ezali pɛto, engɛngisaka miso [ya elimo].”​—Nzembo 19:8, NW.