Masolo ya basakoli ya Bokonzi

Bakanisi ‘bato oyo babosaná bango’

NA MOBU 2001, na engumba Berne, na Suisse, Haykaz, elenge moko ya mbula 15 oyo azali Motatoli ya Yehova akendaki kotala esika oyo balakisaki bafɔtɔ, mikanda, mpe koyoka bato mosusu oyo bamonaki ndenge Banazi banyokolaki Batatoli ya Yehova; babengaki ebongiseli yango “Bato oyo babosaná bango.” Na nsuka, Haykaz alobaki boye: “Nayoká ndenge oyo Banazi banyokolaki Batatoli ya Yehova, kasi ezali mbala ya liboso namona mikanda mpe bafɔtɔ ya ntango wana. Bafɔtɔ mpe maloba ya bato oyo bamonaki makambo yango na miso, bakisá mpe makambo oyo bato ya mayele na masolo ya kala balobaki esimbaki mpenza motema na ngai.”

Mwa moke na nsima, ntango basɛngaki Haykaz akoma lisolo moko mpo na baninga na ye ya kelasi, aponaki lisolo oyo ezalaki na motó ya likambo oyo: “Batatoli ya Yehova​—Bato oyo tobosanaka ete Banazi banyokolaki mpe bango.” Molakisi andimaki Haykaz akoma lisolo wana mpe ayebisaki ye ete asengeli kosalela mpe makanisi oyo ezali na mikanda mosusu ya mokili. Haykaz andimaki na esengo. Alobaki boye: “Natángaki mwa babuku oyo elobeli Batatoli ya Yehova na ntango ya Banazi mpe nakomaki na mokuse makanisi oyo nazwaki. Nalobelaki mpe makambo oyo ngai moko namonaki na elakiseli. Lisolo na ngai ezalaki na nkasa 43, ezalaki mpe na mayemi ná bafɔtɔ.”

Na sanza ya Novɛmbɛ 2002, Haykaz alobelaki lisolo na ye liboso ya bana-kelasi, balakisi, bandeko mpe baninga na ye. Nsima ya lisolo na ye, ekómaki ntango ya kotuna ye mituna, yango epesaki ye libaku ya kolimbola bindimeli na ye oyo euti na Biblia. Ntango mwana mwasi moko atunaki ye mpo na nini aponaki lisolo yango, Haykaz ayebisaki ye ete ezali na mikanda mingi te ya masolo ya kala oyo elobelaka Batatoli ya Yehova, mpe alingaki bato báyeba ndenge Batatoli babundaki na mpiko mpo na kondima na bango. Lisolo na ye ebimisaki litomba nini?

Haykaz alobi boye: “Baninga na ngai ya kelasi bakamwaki mpo bazalaki koyeba te ete Batatoli ya Yehova mpe banyokwamaki makasi. Mingi kati na bango mpe bayebaki te ete Batatoli oyo bazalaki na bakaa ya bakangami ya Banazi bazalaki kolata elembo ya violɛ.”

Nsima ya lisolo ya Haykaz, azwaki mabaku mingi ya kosolola na baninga na ye ya kelasi mpe kolimbola mateya ya Biblia na makambo lokola kozongisa makila, masanga mpe bizaleli malamu. Haykaz alobaki boye: “Ata moninga na ngai moko te atyolaki ngai to asɛkaki ngai.” Longola yango, batyaki lisolo na ye na bibliotɛkɛ ya eteyelo na bango. Lisolo yango ekosalisa bato bábosana lisusu te mpiko ya Batatoli ya Yehova.