“Basuki”

NA MOBU 2002, Batatoli ya Yehova basalaki liyangani moko ya etúká na engumba Mbandaka, oyo ezwami na nɔrdi-wɛsti ya République démocratique du Congo. Ntango Libongoli ya Mokili ya Sika ya Makomami ya Grɛki ya boklisto ebimaki na Lingala na liyangani yango, bayangani bapumbwaki na esengo, mpe basusu batangisaki mpisoli. Na nsima, bayangani bayaki mbango penepene na ebaelo mpo na kotala Biblia yango ya sika mpe bazalaki koganga: “Basuki, Basambwe!”

Mpo na nini bayangani bayokaki esengo makasi ndenge wana, mpe balingaki koloba nini na maloba wana? Na bisika mosusu ya Mbandaka, Batatoli ya Yehova bazalaki na likoki te ya kozwa Babiblia ya Lingala. Mpo na nini? Mpamba te mangomba ezalaki koboya kotɛkɛla bango Biblia. Batatoli bazalaki kosɛnga na bato mosusu básombela bango Babiblia. Na yango, basepelaki makasi mpo mangomba ekopekisa bango lisusu te kozwa Babiblia.

Kaka Batatoli ya Yehova te nde bakozwa litomba na Biblia yango ya sika, kasi bato nyonso. Moto moko oyo azalaki kolanda programɛ ya liyangani yango na ndako na ye na nzela ya bikóliseli-loláká akomelaki biro ya Batatoli ya Yehova ete: “Nazali na esengo mingi ndenge Biblia oyo ebimi. Ekofungola biso miso na makambo mingi. Nazali Motatoli ya Yehova te, kasi nazali kozela Biblia oyo bobimisi na motema likoló.”

Libongoli ya Mokili ya Sika ya Makomami mosantu esilá kobimisama na mobimba na yango na minɔkɔ 33 mpe Makomami ya Grɛki ya boklisto na minɔkɔ 19, Lingala mpe ezali na kati. Soki olingi kozwa Libongoli oyo ya kitoko, tuná Motatoli ya Yehova moko ayebisa yo ndenge okoki kozwa yango.