Mituna ya batángi

Liteya nini tokoki kozwa na mobeko oyo ezali na Exode 23:19: “Okolamba mwana ya ntaba na mabɛlɛ ya mama na yango te”?

Etinda wana ya Mobeko ya Moize, oyo ezongelami mbala misato na kati na Biblia, ekoki kosalisa biso tóyeba makambo oyo ebongi na miso ya Yehova, motema mawa mpe boboto na ye. Ezali mpe komonisa ete asepelaka te na losambo ya lokuta.​—Exode 34:26; Deteronome 14:21.

Kolamba mwana ya ntaba to ya nyama mosusu oyo azali naino komɛla mabɛlɛ ekoki koyokana te na ndenge oyo Yehova abongisá makambo. Nzambe asalá mabɛlɛ ya mama mpo ezala bilei ya mwana mpe esalisa ye akola. Ndenge molimboli moko ya maloba ya Biblia alobaki, kolamba mwana na mabɛlɛ ya mama na ye moko, ezali nde “kozanga limemya mpo na boyokani oyo Nzambe atyá kati ya moboti ná mwana na ye.”

Lisusu, bato mosusu balobaka ete ekoki kozala ete kolamba mwana ya ntaba na mabɛlɛ ya mama na ye ezalaki molulu moko oyo bapakano bazalaki kosala mpo na konɔkisa mbula. Soki ezali bongo, mobeko wana ekokaki kobatela Bayisalaele na misala mabe ya losambo ya bikólo oyo ezalaki zingazinga na bango. Mobeko ya Moize epekisaki mpenza Bayisalaele kolanda mibeko ya bikólo wana.​—Levitike 20:23.

Ntina ya nsuka ezali ete mobeko yango ezali komonisa motema mawa ya Yehova. Kutu, Mobeko ya Moize ezalaki na mibeko mosusu ya ndenge wana oyo epekisaki konyokola banyama mpe kosala makambo na ndenge ebongi te. Na ndakisa, Mobeko epekisaki mpe kopesa mbeka ya mwana ya nyama oyo akokisi mikolo nsambo te, koboma nyama ná mwana na yango mokolo moko mpe kokanga ndɛkɛ na zumbu elongo na makei to bana na yango.​—Levitike 22:27, 28; Deteronome 22:6, 7.

Emonani polele ete Mobeko ya Moize ezalaki kaka te na ebele ya mibeko mpe bipekiseli. Moko ya mateya oyo tokoki kozwa na mobeko yango ezali ete mitinda na yango ezali kosalisa biso tókóma na etamboli oyo ezali komonisa mpenza bizaleli kitoko ya Yehova.​—Nzembo 19:7-11.

[Maloba mpo na kolimbola eutelo ya bafɔtɔ na lokasa 31]

© Timothy O’Keefe/Index Stock Imagery