Okoki kolonga mikakatano

NA NTANGO oyo ya mabe, bato mingi bazali kokutana na mikakatano ya makasi. Nzokande, kolinga Nzambe mpe kokangama na mitinda na ye esalisaka baklisto bálonga mikakatano. Ndenge nini? Tokoki kozwa eyano na motuna wana na ndakisa moko oyo Yesu apesaki. Akokanisaki bayekoli na ye ya botosi na “moto ya mayele, oyo atongaki ndako na ye likoló ya mabanga.” Yesu alobaki boye: “Mbula enɔkaki makasi mpe mpela eyaki mpe mipɛpɛ epɛpaki mpe ebɛtaki ndako yango, kasi ebukanaki te, mpo yango ezwaki moboko likoló ya mabanga.”​—Matai 7:24, 25.

Tomoni ete atako moto yango azali na mayele, akutani mpe na mikakatano, oyo emonisami na mbula, mpela mpe mipɛpɛ ya makasi. Na yango, Yesu alobaki te ete bayekoli na ye bakozala na bomoi ezangi mikakatano. (Nzembo 34:19; Yakobo 4:13-15) Alobaki nde ete basaleli ya sembo ya Nzambe basengeli koyeba ete bakokutana na mikakatano mpe komibongisa mpo na kolonga yango.

Yesu abandaki ndakisa yango boye: “Moto nyonso oyo ayokaka maloba na ngai oyo mpe atosaka yango akokokana na moto ya mayele, oyo atongaki ndako na ye likoló ya mabanga.” Yesu azalaki kolobela ndako mpenza te, kasi bomoi. Bato oyo batosaka maloba ya Yesu basalelaka bososoli. Na makambo nyonso, balandaka mateya ya Klisto oyo bateyi bango, oyo ezali lokola mabanga makasi. Tósimba ete mabanga yango ya elilingi ezali na likoló te. Moto oyo Yesu alobeli na ndakisa oyo, asengelaki ‘kotimola mpe kokitisa libulu mosika na nse’ mpo na kozwa yango. (Luka 6:48) Ndenge moko, bayekoli ya Yesu basalaka makasi mpo na kolona bizaleli ya malamu mpenza oyo ekosalisa bango bápusana penepene na Nzambe.​—Matai 5:5-7; 6:33.

Nini esalemaka soki mikakatano ya makasi etye kondima ya bayekoli ya Klisto na komekama? Botosi na bango mpo na mateya ya Klisto mpe bizaleli ya boklisto epesaka bango makasi na ntango wana mpe, likambo eleki ntina, ekopesa bango makasi na ntango ya komekama monene ya Armagedona. (Matai 5:10-12; Emoniseli 16:15, 16) Ya solo, bato mingi oyo bazali kolanda mateya ya Klisto bazali kolonga mikakatano ya makasi mpenza. Yo mpe okoki kosala lokola bango.​—1 Petelo 2:21-23.