Mituna ya batángi

Motatoli ya Yehova akoki kokende na libala ya ndeko to moninga na ye moko oyo azali Motatoli te?

Mokolo ya libala ezalaka mokolo ya esengo mingi; yango wana baklisto mpe balingaka kosepela elongo na bato oyo babalani. Nzokande, soki babengisi elenge na libala moko, asengeli kosɛnga nzela epai ya baboti to bato oyo bazali kobɔkɔla ye. (Baefese 6:1-3) Kasi, ezali boni soki mobali moko oyo azali Motatoli ya Yehova te alingi ete mwasi na ye oyo azali Motatoli, akende na ye elongo na libala moko oyo ekosalema na ndako-nzambe? Lisosoli ya mwasi yango ekoki kopesa ye nzela ya kokende soki ezali kaka mpo na kotala, kasi mpo na kosangana na milulu ya losambo te.

Na mokuse, tokoloba ete kokende to koboya kokende na libala ya ndenge wana ezali ekateli ya moto na moto. Nzokande, moklisto mokomoko asengeli koyeba ete akozongisa monɔkɔ epai ya Yehova mpe asengeli kotalela mitinda mosusu ya Biblia liboso azwa ekateli ya kokende na libala ya moto oyo azali Motatoli te.

Moklisto asengeli koluka libosoliboso kosepelisa Nzambe. Yesu alobaki boye: “Nzambe azali Elimo, mpe baoyo bazali kosambela ye basengeli kosambela na elimo mpe na solo.” (Yoane 4:24) Yango wana, Batatoli ya Yehova basanganaka na makambo ya mangomba mosusu te, na ndakisa mabondeli mpe milulu oyo eyokani te na mateya ya solo ya Biblia.​—2 Bakolinti 6:14-17.

Moklisto ayebaka ete ekateli na ye ekoki mpe kobɛtisa bato mosusu libaku. Soki ozwi ekateli ya kokende, bandeko na yo bakomona mabe te soki oboyi kosangana na milulu mosusu? Osengeli mpe kokanisa ndenge oyo Batatoli mosusu bakotalela likambo yango. (Baloma 14:13) Ata soki yo moko to bato mosusu na libota na yo bokanisi ete kokende na libala ya moto oyo azali Motatoli te ezali mabe te, yango ekoki nde komonana mabe epai ya bandeko na lisangá? Ekoki nde kotungisa lisosoli ya basusu?

Libala ya bato oyo bazali Batatoli te ezalaka na milulu mingi oyo ekoki kozala mokakatano mpo na Motatoli. Ezali boni soki basɛngi yo ozala na kati ya bato oyo bakokɔtisa babalani? To soki molongani na yo oyo azali Motatoli te alingi bósangana na makambo nyonso? Soki libala yango ekosalema na biro ya Leta, ntango mosusu kokende esukaka kaka na kotala ndenge makambo ekoleka.

Nzokande, libala oyo ekosalema na ndako-nzambe to oyo sango to pastɛrɛ moko akobenisa ezalaka na makambo mosusu oyo ekoki kotungisa moklisto. Mpo na kotosa lisosoli na yo oyo eteyami na Biblia mpe koboya kobuka mitinda ya Biblia to kosala likambo moko oyo bato mosusu bakomona mabe, okoki kozwa ekateli ya kokende te. (Masese 22:3) Okoki kokima makambo mosusu oyo ekosilikisa yo to mpe bandeko na yo soki olimboli bango liboso mitinda oyo otosaka mpe oyebisi bango makambo oyo okoki kosala.

Nsima ya kotalela makambo nyonso, moklisto mosusu akoki komona ete ekozala mabe te akende na libala ya moto oyo azali Motatoli te mpe kotala kaka ndenge makambo ekoleka. Kasi, soki moklisto moko amoni ete kokende na libala yango ekotya ye na likama ya kobuka mobeko moko ya Nzambe, akoki komona ete likama ezali monene koleka matomba oyo akoki kozwa na likambo yango. Soki amoni malamu akende na molulu ya libala te, kasi akende kaka na fɛti oyo ekosalema nsima, asengeli kozala na ekateli makasi ya ‘kosala makambo nyonso mpo na nkembo ya Nzambe.’ (1 Bakolinti 10:31) “Moto na moto akomema mokumba na ye moko” ntango azali kozwa bikateli ya ndenge wana. (Bagalatia 6:5) Yango wana, ezala ekateli nini ozwi, kobosana te ete kobatela lisosoli ya malamu liboso ya Yehova Nzambe nde likambo eleki ntina.