Ozali komikundola?

Osepelaki mpenza na botángi ya banimero ya Linɔ́ngi ya Mosɛnzɛli oyo euti kobima? Na bongo, talá soki okoki kopesa biyano na mituna milandi:

• Mpo na nini “Kondimana ya Kala” esilá ngala te?

Yehova, Nzambe ya bolingo, nde akomisaki yango, kasi te nzambe moko boye ya makambo mabe. Yesu ná bayekoli na ye ya liboso bakobaki kosalela Makomami ya Liebele. Ezali na batoli ya malamu mpo na bomoi ya mokolo na mokolo mpe elikya kitoko mpo na mikolo ezali koya.​—1/9, nkasa 4-7.

• Ntango oyo Nzambe atikaki eleka kobanda Adama ná Eva basalaki lisumu ekokisi likambo nini?

Bankóto ya bambula oyo eleki emonisi ete Satana azali mobuki-lokuta​—Adama ná Eva bakufá mpe bamilio ya bakitani na bango bazali kokufa. Ntango yango emonisi ete bato bakoki te kozala na bomoi ya malamu soki bapesi Nzambe mokɔngɔ mpe ete bazali te na lotomo mpe na likoki ya komitambwisa bango moko.​—15/9, nkasa 6-7.

• Mpo na nini Biblia elobi te ete Yakobo asalaki mabe ndenge alobaki ete ye nde Esau?

Yakobo abongaki kozwa lipamboli epai ya tata na ye mpamba te asombaki esika ya mwana ya liboso epai ya Esau. Ntango Yisaka ayebaki ete apambolaki nde Yakobo, alukaki te kobongola likambo yango. Lisusu, lokola Nzambe apekisaki te ete Yakobo azwa lipamboli, emonani ete alingaki ete likambo yango esalema bongo.​—1/10, lokasa 31.

• Ndenge nini lisosoli emonisaka ete moto autá na nyama te?

Koluka kosalisa bato mosusu, ata soki ekotya bomoi na biso na likama emonanaka epai ya bato ya bikólo nyonso mpe ya mposo nyonso. Bato bakokaki te kozala na ezaleli yango soki bautaki na nyama mpe soki nzoto na bango ebongisamaki mpo elukaka kaka kotikala na bomoi.​—15/10, lokasa 20.

• Mpo na nini tokoki koloba ete Nzambe azali na komikitisa, mpe ndenge nini amonisaka ezaleli yango?

Lokola Nzambe azali Moyangeli mpe Mozalisi, akoká na makambo nyonso. Atako bongo, 2 Samwele 22:36 emonisi ete Nzambe azali na komikitisa, elingi koloba amibanzabanzaka mpo na bato oyo balukaka kosepelisa ye, mpe amoniselaka bango motema mawa. Na maloba ya elilingi, amikitisaka mpo na komonisela bato oyo babangaka ye boboto.​—1/11, nkasa 4-5.

• Ndenge nini biteni ya bambɛki ya kala emonisi bosolo ya masolo ya Biblia?

Bato ya arkeoloji bakundolaki biteni ya bambɛki na Samalia; biteni ya bambɛki yango ezalaki na bankombo ya mabota 7 oyo elobelami na Yosua 17:1-6. Biteni ya bambɛki oyo bazwaki na Alada elobelaki mabota ya banganga-nzambe mpe ezalaki na nkombo ya Nzambe. Biteni ya bambɛki oyo bazwaki na Lakisi elobeli yikiyiki oyo ezalaki na Yuda liboso bato ya Babilone babundisa ekólo yango.​—15/11, nkasa 12-14.

• Mpo na nini tokoki koloba ete Luka nde akomaki mokanda ya Misala?

Tokoki koloba bongo mpamba te Evanzile ya Luka mpe mokanda ya Misala ya Bantoma etindamaki epai ya Teofili. Maloba lokola “biso,” emonisi ete Luka azalaki ntango makambo mosusu oyo alobeli ezalaki kosalema. (Misala 16:8-15)​—15/11, lokasa 18.

• Ndenge nini moklisto asengeli kotalela mosala ya koboma nyama mpe mbisi?

Banda na ntango ya Noa, Nzambe apesaki bato nzela ya koboma nyama mpe kolya yango. Kasi, lokola alobaki ete basengelaki naino kokata yango nkingo, emonisi ete esengeli komemya bomoi ya nyama mpamba te Nzambe nde azali nkolo na yango. Baklisto basengeli te koboma nyama kaka mpo na kosakana to mpo na komisepelisa. Moklisto asengeli kotosa mibeko ya Kaisala mpe kotalela lisosoli ya basusu. (Baloma 14:13)​—1/12, lokasa 31.