Lisolo ya Noa mpe mpela ezali lisapo ya mpamba te

OZALAKA na mposa ya kofanda na mokili moko ya kitoko, epai bato bazali na kimya na kati na bango? Epai bitumba, kobomana mpe konyokolana ezali te? Soki ezali bongo, okoki kolendisama na lisolo moko oyo ntango mosusu oyebi malamu. Ezali lisolo ya Noa, moto moko ya malamu mpenza oyo atongaki masuwa oyo ebikisaki ye ná libota na ye na mpela moko oyo ezindisaki mokili mobimba mpe ebomaki bato nyonso ya mabe.

Ezali na masolo mingi te oyo eyebani lokola lisolo ya mpela wana. Lisolo ya makambo oyo ekómelaki Noa ezali na mokanda ya Genese, kobanda na mokapo ya 6 kino ya 9; Coran mpe masapo ya bato ya bikólo mingi elobeli yango mpe. Mpela yango esalemaki mpenza, to lisolo yango ezali kaka lisapo ya mpamba oyo babɛtaka mpo na kolendisa bato básalaka malamu? Na boumeli ya bikeke, bato ya teoloji mpe ya siansi bapesá makanisi ndenge na ndenge mpo na likambo yango. Kasi, Biblia, Liloba ya Nzambe, emonisi polele ete lisolo ya Mpela ya Noa ezali lisapo ya mpamba te. Mpo na nini?

Mokanda ya Genese eyebisi biso polele mpenza mbula, sanza mpe mokolo oyo Mpela ebandaki, ntango mpe esika oyo masuwa etɛlɛmaki, mpe ntango oyo mabelé ekaukaki. Elobeli mpe makambo nyonso ya masuwa yango. Nzokande, mbala mingi masapo elobelaka makambo na bosikisiki ndenge wana te.

Masolo mibale ya Biblia oyo elobeli mabota emonisi ete Noa azalaki mpenza. (1 Ntango 1:4; Luka 3:36) Ezela ná Luka, bato oyo bakomaki masolo yango, balandelaki mpenza makambo na likebi. Luka alobeli molɔngɔ ya bankɔkɔ ya Yesu Klisto tii na Noa.

Yisaya, Ezekiele mpe bantoma lokola Paulo ná Petelo, balobelaki mpe Noa ná Mpela.​—Yisaya 54:9; Ezekiele 14:14, 20; Baebele 11:7; 1 Petelo 3:19, 20; 2 Petelo 2:5.

Yesu Klisto alobelaki Mpela na maloba oyo: “Se ndenge esalemaki na mikolo ya Noa, ekozala mpe bongo na mikolo ya Mwana ya moto: bazalaki kolya, bazalaki komɛla, mibali bazalaki kobala, basi bazalaki kobalisama, tii mokolo yango ntango Noa akɔtaki na masuwa, mpe mpela eyaki mpe ebomaki bango nyonso.” (Luka 17:26, 27) Soki Mpela yango esalemaki te, wana makambo oyo Yesu alobaki mpo na “mikolo ya Mwana ya moto” ezali mpe na ntina te.

Ntoma Petelo asakolaki ete “basɛki” bakoya oyo bakotyola makambo oyo Biblia ezali koloba. Petelo akomaki ete: “Engebene mposa na bango, likambo oyo ezali kokima bango, ete . . . mokili ya ntango [ya Noa] ezwaki libebi ntango ezindisamaki na mai.” Biso mpe tosengeli kozala lokola bato wana? Soki moke te! Petelo akobaki ete: “Likoló mpe mabelé oyo ezali sikoyo ebombami mpo na mɔtɔ mpe ezali kobatelama mpo na kozela mokolo ya lisambisi mpe ya libebi ya bato oyo batyolaka Nzambe.”​—2 Petelo 3:3-7.

Nzambe akoboma lisusu bato mabe; na ntango wana mpe babiki bakozala. Soki tomekoli Noa, tokozala na kati ya basembwi oyo bakobika mpe bakokɔta na mokili moko ya malamu mpenza.