Omibongisi mpo na kolobela bindimeli na yo?
OSILÁ kokutana na likambo moko, oyo mpo na yango omonaki ete osengeli kolobela bindimeli na yo? Tótalela likambo oyo ekomelaki Susana, elenge moko ya mbula 16, na ekólo Paraguay. Na liteya moko na kelasi, mwana moko alobaki ete Batatoli ya Yehova bandimaka “Kondimana ya Kala” te, bandimaka Yesu Klisto te, Malia mpe te. Bamosusu balobaki mpe ete Batatoli ya Yehova bandimaka kokufa na esika ya kokende lopitalo. Soki ozalaki wana, olingaki kosala nini?
Susana abondelaki Yehova mpe alakisaki mosapi. Lokola etikalaki moke bábima, asɛngaki molakisi nzela ete amibongisa mpo alobela bindimeli na ye lokola Motatoli ya Yehova. Molakisi andimaki. Na boumeli ya pɔsɔ mibale oyo elandaki, Susana amibongisaki malamu, asalelaki mwa buku Batatoli ya Yehova—Bazali banani? Makambo nini bandimaka?
Mokolo oyo asengelaki kosala lisolo yango ekokaki. Susana alimbolaki ntina oyo tobengamaka Batatoli ya Yehova. Alimbolaki mpe elikya na biso mpo na mikolo ezali koya mpe ntina oyo toboyaka bázongisa biso makila. Na nsima, asɛngaki baninga na ye ya kelasi bátuna mituna. Bana mingi balakisaki misapi. Molakisi akamwaki mingi ntango ayokaki ndenge oyo elenge mwasi yango azalaki kosalela Biblia mpo na koyanola na mituna.
Mwana-kelasi moko alobaki boye: “Mokolo moko nakendaki na Ndako ya Bokonzi, mpe namonaki ata ekeko moko te.” Molakisi alukaki koyeba ntina. Susana atángelaki ye Nzembo 115:4-8 mpe Exode 20:4. Molakisi akamwaki mpe alobaki boye: “Mpo na nini bandako-nzambe na biso etondi na bikeko, nzokande Biblia epekisi yango?”
Bakobaki kotuna mituna na boumeli ya miniti 40. Ntango Susana atunaki soki bakolinga kotala kasɛti-video Pas de sang: la médecine relève le défi, bango nyonso bandimaki. Molakisi abongisaki mpo bátala yango na mokolo oyo elandaki. Nsima ya kotala video yango, Susana alobelaki bankisi oyo Batatoli ya Yehova mosusu bandimaka na esika bázongisa bango makila. Mpo na yango, molakisi alobaki boye: “Nayebaki te ete ezali na bankisi ebele oyo ekoki kosalelama na esika ya kozongisa moto makila; nayebaki mpe te ete koboya makila ezali na matomba mingi. Bankisi yango ezalaka kaka mpo na Batatoli ya Yehova?” Ntango molakisi ayokaki ete ezali mpo na bato nyonso, alobaki ete, “Mbala ya nsima oyo Batatoli ya Yehova bakoya kotala ngai, nakondima kosolola na bango.”
Lisolo oyo Susana abongisaki ete asala yango na boumeli ya miniti 20, eumelaki ngonga misato. Pɔsɔ moko na nsima, bana-kelasi mosusu balobelaki mpe bindimeli ya mangomba na bango. Na nsuka, batunaki bango mituna, kasi bakokaki kopesa biyano te. Molakisi atunaki bango: “Mpo na nini bokoki te kolimbola bindimeli na bino ndenge moninga na bino oyo azali Motatoli ya Yehova asalaki?”
Bayanolaki boye: “Bango bayekolaka mpenza Biblia. Biso tosalaka yango te.”
Molakisi alobaki na Susana boye: “Boyekolaka mpenza Biblia mpe bosalaka makasi ya kotosa oyo elobi. Bobongi kozwa longonya.”
Susana akokaki kofanda kimya. Kasi, lokola alobaki, alandaki ndakisa malamu ya elenge Moyisalaele oyo azalaki na boombo na Silia. Elenge mwasi yango akómaki kofanda na ndako ya Naamana, mokonzi ya basoda ya Silia, oyo azalaki na maladi ya maba. Elenge mwasi yango akangaki monɔkɔ te, alobaki na mwasi ya nkolo na ye boye: “Soki nkolo na ngai azalaki liboso na mosakoli oyo azali na Samalia, mbɛ ye akobikisa ye na [maba] na ye.” Elenge yango akokaki te koboya kopesa litatoli mpo na Nzambe ya solo. Mpo na yango, nkolo na ye Naamana akómaki mosambeli ya Yehova.—2 Mik. 5:3, 17.
Ndenge moko mpe, Susana akokaki te koboya kopesa litatoli mpo na Yehova mpe basaleli na ye. Lokola Susana alobaki mpo na kondima na ye ntango batyelaki bindimeli na ye ntembe, atosaki etinda oyo ya Biblia: “Bósantisa Klisto lokola Nkolo na kati ya mitema na bino, bómibongisa ntango nyonso mpo na koloba liboso ya moto nyonso oyo atuni bino ntina ya elikya oyo ezali na kati na bino, kasi bósalaka bongo na elimo ya boboto mpe na limemya makasi.” (1 Pet. 3:15) Yo mpe omibongisi mpo na kolobela bindimeli na yo ntango ozwi libaku ya kosala yango?
[Elilingi na lokasa 17]
Bisaleli oyo ekoki kosalisa yo oloba mpo na kondima na yo