Pusaná penepene na Nzambe
“Bókóma bamekoli ya Nzambe”
BOBOTO. Motema mawa. Kolimbisa. Bolingo. Likambo ya mawa, lelo oyo, bato bazalaka mpenza na bizaleli wana te. Bongo yo? Omonaka ete milende nyonso oyo osalaka mpo na kolona bizaleli ya malamu ekendaka kaka na mai? Motema na yo ekoki kokosa yo ete makambo lokola bizaleli mabe oyo eumelá mpenza na kati na yo to makambo ya mpasi oyo okutaná na yango ekopekisa yo olona bizaleli ya malamu. Nzokande, Biblia eteyaka likambo moko oyo esengeli kolendisa biso: Mozalisi na biso ayebi ete tozali na likoki ya kolona bizaleli ya malamu.
Liloba ya Nzambe ezali kolendisa baklisto boye: “Na yango, bókóma bamekoli ya Nzambe, lokola bana balingami.” (Baefese 5:1) Maloba wana ezali komonisa ete Yehova atyelaka mpenza basambeli na ye motema. Na ndenge nini? Yehova Nzambe azalisaki moto na lolenge na Ye mpe na elilingi na Ye. (Genese 1:26, 27) Na yango, Nzambe akelaki bato na likoki ya komonisa bizaleli na ye.a Yango wana, ntango Biblia ezali kolendisa baklisto ‘bákóma bamekoli ya Nzambe,’ ezali lokola nde Yehova ye moko azali koyebisa bango ete: ‘Nazali kotyela bino motema. Nayebi ete ata bozali bato ya kozanga kokoka, bozali na likoki ya komekola ngai na makambo mosusu.’
Wapi mwa bizaleli ya Nzambe oyo tokoki komekola? Bavɛrsɛ mosusu oyo ezali liboso ya Baefese 5:1 mpe oyo ezali na nse na yango ekoyanola biso. Tóbosana te ete Paulo abandaki toli ya komekola Nzambe na liloba “na yango.” Liloba yango ezali na boyokani na vɛrsɛ oyo ezali liboso, oyo elobeli boboto, koyokelanaka mawa mpe kolimbisanaka. (Baefese 4:32; 5:1) Na vɛrsɛ oyo elandi, Paulo azali koyebisa baklisto bákoba mpenza kolinga bato mosusu. (Baefese 5:2) Ya solo, na oyo etali boboto, koyokela bato mawa, kolimbisa basusu na motema moko mpe bolingo, Yehova azali ndakisa monene oyo tosengeli kolanda.
Mpo na nini tosengeli koluka kozala lokola Nzambe? Maloba ya Paulo oyo ezali komonisa ntina oyo tolukaka komekola Nzambe: “Bókóma bamekoli ya Nzambe, lokola bana balingami.” Likanisi wana ezali mpenza kolendisa! Yehova atalelaka basambeli na ye lokola bana oyo alingaka mingi. Ndenge kaka mwana moke alingaka kozala lokola tata na ye, baklisto mpe basalaka nyonso mpo na kozala lokola Tata na bango ya likoló.
Yehova atindaka bato bámekola ye na makasi te. Kutu, apesá biso bonsomi ya kopona. Yango wana, soki okomekola Nzambe to te, etali kaka yo. (Deteronome 30:19, 20) Kasi, kobosana te ete okelamá na likoki ya komonisa bizaleli ya Nzambe. Na yango, mpo na komekola Nzambe osengeli naino koyeba ye. Biblia ekoki kosalisa yo oyeba bizaleli mpe banzela ya Nzambe oyo bomoto na ye ya malamu ezali kobenda bamilio ya bato bákóma bamekoli na ye.
[Maloba na nse ya lokasa]
a Bakolose 3:9, 10 emonisi ete kokelama na elilingi ya Nzambe elimboli kozala na bizaleli lokola oyo ya ye. Baoyo balingi kosepelisa Nzambe basengeli kolata “bomoto ya sika,” oyo “ezali kokómisama sika engebene elilingi ya [Nzambe] Oyo azalisaki yango.”