Pusaná penepene na nzambe

Ayebi “motema ya bana ya bato”

2 NTANGO 6:29, 30

NANI kati na biso amoná naino te ete mitungisi mpe mikakatano ya bomoi elekeli ye motó? Na bantango mosusu, tokoki komona lokola ete ezali na moto moko te oyo akoki koyeba mpenza mikakatano oyo tozali na yango to mpasi makasi oyo tozali koyoka na motema. Nzokande, ezali na moto moko oyo ayebaka mpenza ndenge tozali koyoka na motema​—Yehova Nzambe. Maloba ya Salomo oyo ezali na 2 Ntango 6:29, 30, ekoki kobɔndisa biso.

Na molulu ya bofungoli tempelo ya Yerusaleme, na mobu 1026 liboso ya ntango na biso, Salomo abondelaki. Na libondeli na ye, oyo ntango mosusu eumelaki miniti 10, Salomo akumisaki Yehova ete azali Nzambe ya bosembo, Mokokisi ya bilaka, mpe Moyoki ya mabondeli.​—1 Bakonzi 8:23-53; 2 Ntango 6:14-42.

Salomo abondelaki Nzambe ayoka lilɔmbɔ ya basambeli na ye. (Vɛrsɛ 29) Atako Salomo atángi bampasi ebele (vɛrsɛ 28), amonisi ete mosambeli mokomoko ayebi “bolɔzi na ye moko” mpe ayokaka “mpasi na ye moko.” Likambo oyo ekoki kopesa mpasi na moto moko, moto mosusu akoki koyoka mpasi te mpo na yango.

Ata soki ezali bongo to te, bato oyo babangaka Nzambe basengeli te komema mikumba na bango, bango moko. Na libondeli na ye, Salomo azalaki kokanisa mosambeli mokomoko oyo akozala na mposa ya ‘kosembola mabɔkɔ na ye,’ mpo na kobondela Yehova na motema mobimba.a Ekoki kozala ete Salomo akanisaki toli oyo tata na ye Davidi apesaki ntango akutanaki na mpasi makasi; alobaki boye: “Bwakelá Yehova . . . mokumba na yo ya kilo.”​—Nzembo 55:4, 22.

Ndenge nini Yehova akoyanola na mabondeli ya kosɛnga lisalisi oyo euti mpenza na motema? Salomo abondelaki Yehova boye: “Yo yoká kuna na likoló, esika na yo ya kofanda, mpe limbisá mpe pesá moto na moto na kolanda banzela na ye nyonso.” (Vɛrsɛ 30) Salomo ayebaki ete “Moyoki ya libondeli” amibanzabanzaka kaka te mpo na basambeli na ye nyonso, kasi mpe mpo na mosambeli na ye mokomoko. (Nzembo 65:2) Yehova apesaka lisungi oyo esengeli, ata mpe bolimbisi mpo na mosumuki oyo azongeli Nzambe na motema na ye mobimba.​—2 Ntango 6:36-39.

Mpo na nini Salomo atyaki motema ete Yehova akoyanola na libondeli ya mosambeli ya Nzambe oyo abongoli motema? Salomo akobaki libondeli na ye boye: “Mpo [Yehova] oyebi motema na ye (mpamba te kaka yo moko nde oyebi malamu motema ya bana nyonso ya bato).” Yehova ayebi bolɔzi to mpasi oyo mosambeli na ye mokomoko akoki kozala na yango na motema, mpe atyelaka yango likebi.​—Nzembo 37:4.

Tokoki kobɔndisama na libondeli ya Salomo. Baninga na biso bato bakoki koyeba mpenza te ndenge oyo biso tozali koyoka na motema​—‘bolɔzi na biso moko’ mpe ‘mpasi na biso moko.’ (Masese 14:10) Kasi, Yehova ayebi mitema na biso, amibanzabanzaka mpenza mpo na biso. Kofungolela ye motema na libondeli ekoki koyeisa mikumba na biso pɛpɛlɛ mpo na komema. Biblia elobi ete: ‘Bwakelá ye mitungisi na bino nyonso, mpo atyelaka bino likebi.’​—1 Petro 5:7.

[Maloba na nse ya lokasa]