Kozala elongo na bandeko baklisto: ezali mpenza na ntina?

¹ Moto moko ya mayele na ekeke ya 17 alobaki ete: “Moto moko te azali lokola esanga na kati ya ebale.” Moto yango azongeli kaka maloba oyo Biblia elobaka ete moto nyonso azalaka na mposa ya bato mosusu. (Mas. 18:1) Kozala elongo na bandeko na biso baklisto ekokisaka mposa wana. Epesaka biso matomba na makambo nini?

² Na mosala ya kosakola: Moko ya matomba oyo eleki nyonso ezali oyo: bandeko na biso bapesaka biso makasi mpe basungaka biso na mosala ya kosakola. Yango wana Yesu atindaki bayekoli na ye bakende kosakola “mibale mibale.” (Mko. 6:7; Luka 10:1) Mpo na kolanda ndakisa wana, biso mpe tozali kobima na bandeko mosusu na mosala ya kosakola mpe tozali komona bosolo ya makambo oyo Mosakoli 4:9, 10 elobi. Ntango tozali kosakola elongo na bandeko na biso, kondima na bango, botosi na bango mpe bolingo na bango epesaka biso mpiko mpe ebakiselaka biso molende.

³ Lisalisi mpo na makambo oyo ekómelaka biso moko: Lisangá na biso ya bandeko ezali mpe esika oyo tokoki kozwa bilendiseli mpe makasi mpo na koyika mpiko na mikakatano mpe kolonga komekama. Bandeko na biso baklisto bakoki koyebisa biso mikapo oyo elobelaka makambo oyo ezali kotungisa biso. Bakoki ata kobondela mpo na biso, ndenge biso mpe tobondelaka mpo na bango. (2 Kol. 1: 11) Kozanga ntembe, ndakisa na bango ya malamu etindaka biso tósala misala ya malamu mpe elendisaka biso.

⁴ Na makita: Kozala na bandeko baklisto ezali mpenza lipamboli; kasi mpo na kozwa yango, tosengeli koyanganaka ntango nyonso na makita ya lisangá. (Ebe. 10:24, 25) Masolo oyo esalemaka kuna eteyaka biso makambo mingi ya elimo; mpe koyangana na makita ezali kosala ete tozala penepene ya bandimi mosusu. Makita epesaka biso libaku ya koyoka ndenge bandeko balobelaka kondima na bango, ezala ntango basalaka masolo na liboso to ntango bapesaka biyano. (Lom. 1:12) Bondeko na biso ekómaka makasi mingi ntango tosololaka liboso mpe nsima ya makita. Wana nde ntango ya kobɛta masolo ya makambo oyo ekómelá biso, makambo oyo ekómisaka kondima na biso makasi. Bizaleli na biso ekobonga mpenza soki tozali kofanda mingi na bato oyo balingaka Yehova, balingaka Liloba na ye, mosala na ye, mpe basaleli na ye.​—Filp. 2:1, 2.

⁵ Bandeko na biso baklisto bazali na ntina mingi mpo na biso. Mpo soki bango bazali te, ekozala mpasi mingi mpo na kotambola na nzela oyo ezali komema na bomoi mpamba te ezali nzela ya nkaka. Nzokande, na bolingo na bango mpe na bilendiseli oyo bapesaka biso, tokoki kokoba nzela na biso tii na mokili ya sika ya boyengebene ya Yehova.​—Mat. 7:14.