Kosakola ndako na ndako

 1. Motuna nini ezali kobima mpo na mosala ya kosakola ndako na ndako, mpe mpo na nini?

¹ Linɔ́ngi ya Mosɛnzɛli ya Siona ya 1 Yuli 1893 (na Lingelesi) elobelaki ntina ya kosakola ndako na ndako. Elobaki boye: “Baoyo bameseni kosalela mayele ndenge na ndenge ya kosakola solo, bakondima mpenza ete kosakola ndako na ndako na lisalisi ya buku L’AURORE DU MILLÉNIUM ezali sikoyo lolenge eleki malamu ya kopalanganisa nsango malamu.” Bato ya mokili mobimba bayebi ete kosakola ndako na ndako ezali mosala ya Batatoli ya Yehova. Lokola na mikili mosusu ekómi mpasi kokuta bato na ndako, lolenge wana ya kosakola ezali kaka na ntina?

 2. Makambo nini Biblia elobi mpo na mosala ya kosakola ndako na ndako?

² Euti na Biblia mpe ezali na ntina: Mosala ya kosakola ndako na ndako euti na Biblia. Yesu apesaki bayekoli 70 etinda bákende mibalemibale kosakola ndako na ndako. (Luka 10:5-7) Mwa moke nsima ya liwa ya Yesu, Biblia elobi boye mpo na bayekoli na ye: “Mikolo nyonso na kati ya tempelo mpe na ndako na ndako, kozanga kotika, bakobaki koteya mpe kosakola nsango malamu.” (Mis. 5:42) Ntoma Paulo mpe ateyaki na molende mpenza ndako na ndako.​—Mis. 20:20.

 3. Wapi mwa matomba ya kosakola ndako na ndako?

³ Tii lelo oyo, kosakola ndako na ndako ezali lolenge eleki malamu ya kopalanganisa nsango malamu. Yango esalisaka biso ‘tóluka’ bato oyo babongi na ndenge ya molɔngɔ. (Mat. 10:11) Mbala mingi, bato bazalaka na motema ya kokita ntango bazali epai na bango. Kosolola na bango​—koyoka mingongo na bango, kotala bango na elongi mpe komona esika oyo bafandaka​—esalisaka biso tóyeba makambo oyo esepelisaka bango mpe oyo etungisaka bango. Mbala mingi, yango epesaka biso nzela ya kosolola na bango na mozindo.

 4. Tokoki kosala nini mpo mosala ya kosakola ndako na ndako ebimisa matomba mingi?

⁴ Okoki kobongola makambo mosusu: Ntoma Paulo azalaki kosala nyonso “mpo na nsango malamu.” (1 Kol. 9:23) Mbala mosusu tokoki kobongola manaka na biso mpo tósakola na ntango oyo bato mingi bazalaka na ndako. Na ndakisa na mpokwa, mokolo ya pɔsɔ to ya lomingo, to na mikolo oyo bato bakendeke misala te. Komá nimero ya bandako nyonso oyo okutaki bato te mpe zongelá bango na ntango mosusu to na mokolo mosusu ya pɔsɔ wana.

 5. Ndenge nini bandeko oyo bazali na mikakatano ya nzoto bakoki kosakola ndako na ndako?

⁵ Ata baoyo bazali na mikakatano ya nzoto bakoki mpe kosakola ndako na ndako. Mbala mosusu, tokoki kozwa bibongiseli mpo na komema bandeko ya ndenge wana na bisika oyo ezali mpasi te mpo na kokóma, mpo na kosalisa bango básakola na ndenge ebongi. Ndeko mwasi moko azalaki koyoka mpema mokuse. Soki asololi na moto moko, akokoka kosolola na moto mosusu kaka soki apemi miniti 30. Atako bongo, ayokaki esengo mpenza ntango basangisaki ye na bandeko mosusu mpo básakola elongo!

 6. Mpo na nini tosengeli kosakolaka ndako na ndako mbala na mbala?

⁶ Tozali kokoba kozwa bato mingi oyo bazali lokola bampate ntango tozali kosakola ndako na ndako. Ntango mosakoli moko abɛtaki na ekuke ya ndako moko, moto oyo azalaki na kati ya ndako azongisaki boye: “Kɔtá! Nayebi ntina oyo oyei kotala ngai. Nauti kobondela Nzambe mpo atindela ngai moto moko asalisa ngai, mbala moko nayoki yo ozali kobɛta kɔkɔkɔ. Nzambe ayoki ngai yango wana atindi yo.” Matomba oyo tozali kozwa na kosakola ndako na ndako emonisi ete Yehova azali mpenza kopambola lolenge wana ya kosakola. (Mat. 11:19) Zwá mokano ya kosakola ndako na ndako mbala na mbala.