Engebene Biblia

Tosengeli kosuka kaka na kozala bato malamu?

ELENGE mwasi moko na nkombo Allison alobi boye: “Nasalaka nyonso mpo ete bomoi na ngai ezala mpenza malamu mpe nalukaka kozala moto malamu.” Ndenge moko mpe, bato mingi bakanisaka ete kosala bongo, yango nde oyo Nzambe azali kosɛnga.

Basusu bandimaka ete ata soki basali lisumu monene, Nzambe akokipe te soki basalaka malamu na makambo mingi. Mpo na bango, Nzambe alukaka nde kolimbisa, kasi kokweisa moto na likambo te.

Moto na moto azali na ndenge oyo akanisaka ete moto malamu asengeli kozala. Kasi, likanisi ya Biblia ezali nini? Tosengeli kosala nini mpo Nzambe andima biso? Kozala moto malamu elimboli nini na miso na ye?

Tólanda nzela oyo Mozalisi na biso azali kolakisa

Lokola Yehova Nzambe azali Mozalisi na biso, azali na lotomo ya kolakisa biso nzela oyo ebongi. (Emoniseli 4:11) Na Biblia, Nzambe apesi biso mibeko mpe mitinda oyo esengeli kotambwisa bizaleli mpe losambo na biso epai na ye. Ayebisaki basaleli na ye boye: “Bóyoka mongongo na ngai mpe bósala makambo yango, [kolanda] nyonso esili ngai kolakisa bino. Bongo bokozala bato na ngai mpe ngai nakozala Nzambe na bino.”​—Yilimia 11:4.

Yango emonisi ete kozala moto malamu na miso ya Nzambe esɛngi koyekola mitinda na ye mpe koyokanisa bomoi na biso na mitinda yango. Na ndakisa, soki olingi kokóma moninga ya songolo, okoluka naino koyeba makambo oyo ye alingaka básalela ye. Na nsima, okosala na ndenge oyo ekosepelisa ye. Biblia emonisi ete, na ndakisa ya Abalayama oyo azalaki moninga ya Yehova, biso mpe tokoki kokóma baninga na ye, elingi koloba ete bato oyo azali kosepela na bango. (Yakobo 2:23) Lisusu, lokola Nzambe azali na mitinda oyo ezali malamu koleka oyo ya biso, tókanisa te ete akobongola yango mpo eyokana na oyo ya biso.​—Yisaya 55:8, 9.

Ntina ya kozala na botosi

Ezali solo ete Nzambe akosepela na biso te soki toboyi kotosa mibeko oyo tomoni ete ezali na ntina mingi te? Bato mosusu bakanisaka ete ezali na ntina te kotosa mibeko oyo, mpo na bango, ezali na motuya mingi te. Nzokande, na mibeko nyonso ya Nzambe, moko te ezangi ntina. Na 1 Yoane 5:3, Biblia emonisi ete mibeko na ye nyonso ezali na ntina, mpamba te elobi boye: “Bolingo ya Nzambe elakisi boye, ete tótosaka [mibeko] na ye.” Ntango tosalaka nyonso mpo na kotosa mibeko nyonso ya Nzambe, tomonisaka ete tolingi ye mpe tozali koluka matomba na biso moko te.​—Matai 22:37.

Yehova asɛngaka biso te tósala makambo nyonso na ndenge ya kokoka. Soki toyoki mpenza mawa mpo na mabunga tosali mpe tosali makasi tózongela yango te, andimaka kolimbisa biso. (Nzembo 103:12-14; Misala 3:19) Kasi, tokoki nde kobuka mibeko mosusu ya Nzambe na nko mpe kokanisa ete akokipe te mpo tozali kotosa ye na makambo mosusu? Ndakisa oyo ya Biblia emonisi ete tokoki te kosala bongo.

Saulo, Mokonzi ya Yisalaele, amonaki malamu atosa kaka ndambo ya makambo oyo Nzambe asɛngaki ye asala. Ntango azalaki kobunda bitumba na bato ya Amaleki, Nzambe ayebisaki ye ete atika banyama na bango te. Asengelaki ‘koboma bango.’ Atako Saulo atosaki malako mosusu, kasi atosaki oyo wana te, mpamba te atikaki na bomoi “nyama oyo elekaki malamu kati na bampate mpe na bangɔmbɛ.” Mpo na nini? Mpamba te ye ná bato mosusu balingaki ete banyama wana ekóma ya bango.​—1 Samwele 15:2-9.

Ntango mosakoli Samwele atunaki Saulo ntina oyo atosaki te makambo oyo Nzambe asɛngaki ye asala, Saulo awanganaki mpe alobaki ete atosaki. Atángaki makambo ya malamu oyo ye ná bato na ye basalaki, ata mpe bambeka oyo batumbelaki Nzambe. Samwele atunaki ye boye: “[Yehova] akosepela mbeka ná miboma lokola ye akosepela botosi kotosa mongongo na ye? Talá kotosa eleki moboma na malamu mpe koyoka eleki mafuta ya bampate.” (1 Samwele 15:17-22) Yango emonisi ete ata soki topesi bambeka to tosali makambo mosusu ya malamu, Nzambe akokanga miso te soki totosi ye te na makambo mosusu.

Mibeko ya Nzambe emonisi ete alingi biso

Lokola Yehova azali bolingo, azali te kosɛnga biso moko tókanisa ndenge malamu ya kosepelisa ye. Alakisi biso polele nzela ya malamu kati na Biblia; ezali lokola nde azali koyebisa biso ete: “Oyo ezali nzela, tambolá na yango.” (Yisaya 30:21) Soki tozali kolanda nzela ya Nzambe, tokozala te lokola bato oyo balukaka kopona kati na makanisi ekeseni oyo bato bazalaka na yango na ntina etali bizaleli malamu; bato wana balɛmbaka nzoto mpe bayebaka te makanisi oyo wapi ezali malamu. Longola yango, tokoki kondima mpenza ete nzela oyo Nzambe alakisaka ezali mpo na bolamu na biso, ‘azali kolakisa biso mpo na litomba na biso.’​—Yisaya 48:17, 18.

Mabe ezali wapi soki tozali kokata biso moko ete kozala moto malamu elakisi boye to boye? Biso nyonso tobotamaka na mposa ya koluka kaka matomba na biso moko. Mitema na biso ekoki kokosa biso. (Yilimia 17:9) Ekozala mpasi te tótyola makambo mosusu oyo Nzambe azali kosɛnga biso mpo tozali komona yango ete ezali makasi to ezali kopekisa biso tósala oyo tolingi.

Na ndakisa, bato mibale oyo babalani te bakoki koyokana ete básangisa nzoto mpe kokanisa ete lokola moto mosusu ayebi te, likambo yango etali kaka bango moko. Bakoki komona ete makambo na bango eyokani na mitinda ya Biblia te, kasi bakoki kokanisa ete Nzambe akomona yango mpenza mabe te mpo esali moto moko te mabe. Bamposa na bango ekoki kopekisa bango bákanga mpenza ntina ya makambo bazali kosala mpe bámona te mbuma oyo yango ekobimisa. Biblia ekebisi biso boye: “Nzela ezali oyo emonani malamu epai ya moto nde nsuka na yango bobele nzela ya kufa.”​—Masese 14:12.

Mibeko nyonso ya Yehova emonisi ete alingi biso bato mpe azali na mposa ete tómona mpasi te. Koboya kotosa mitinda ya Nzambe oyo emonisi etamboli malamu kati na basi mpe mibali na makambo etali kosangisa nzoto to na makambo mosusu epesi bato esengo monene te to bomoi ya malamu koleka. Ebimiseli nde bato mingi ebele ya mikakatano na bomoi na bango. Nzokande, kotosa mibeko ya Nzambe ezali kopesa biso makasi ya kozala na etamboli ya malamu mpe kopekisa biso tómisala mabe to tósala basusu mabe oyo tokanisaki te.​—Nzembo 19:7-11.

Soki mposa na yo ezali mpenza ya kozala moto malamu na miso ya Nzambe, salá makasi olanda nzela oyo azali kolakisa. Okomona yo moko ete “[mibeko ya Yehova] ezali kilo te.”​—1 Yoane 5:3.

OSILÁ KOMITUNA?

◼ Mpo na nini tosengeli kondima nzela oyo Mozalisi na biso azali kolakisa?​—Emoniseli 4:11.

◼ Tosengeli kotosa mibeko nyonso ya Nzambe?​—1 Yoane 5:3.

◼ Mpo na nini ebongi te biso moko tómityela mitinda na makambo etali bizaleli malamu?​—Masese 14:12; Yilimia 17:9.

[Elilingi na lokasa 29]

Mitinda ya bizaleli malamu oyo olandaka eyokani na oyo ya Nzambe?