Biblia elobi nini?

Kozala sembo na libala elimboli mpenza nini?

Bato mingi balingaka ete moto oyo abali asangisaka nzoto kaka na molongani na ye. Likanisi yango eyokani na ndenge Biblia elobi na ntina etali bosembo na libala ete: “Tiká libala ekumisama na kati ya bato nyonso, mpe mbeto ya libala ezala na mbindo te.”​—Baebele 13:4.

KOZALA sembo na libala esuki kaka na koboya kosangisa nzoto na moto mosusu oyo azali molongani na yo te? Tokoloba boni mpo na kosangisa nzoto na moto mosusu na makanisi? Boninga makasi na moto oyo azali molongani na yo te ekoki mpe kokóma “kozanga bosembo na libala”?

Kosangisa nzoto na moto mosusu na makanisi ezali mabe te?

Biblia emonisi ete kosangisa nzoto ezali likambo ya malamu oyo esalemaka na libala, mpe oyo epesaka babalani esengo. (Masese 5:18, 19) Kasi lelo oyo, bato mingi ya mayele bazali kokanisa ete ezali mabe te ete moto oyo abalá akóma kosangisa nzoto na moto mosusu na makanisi, kutu ezali malamu mpo na nzoto na ye. Kosangisa nzoto na moto mosusu na makanisi ezali mabe te kaka mpo moto asangisi nzoto mpenzampenza te?

Kosangisa nzoto na moto mosusu na makanisi ezali koluka komisepelisa yo moko. Ezaleli ya ndenge wana eyokani te na oyo Biblia elobi mpo na bato oyo babalá. Na oyo etali kosangisa nzoto, Liloba ya Nzambe elobi boye: “Mwasi azali na bokonzi te likoló ya nzoto na ye moko, kasi mobali na ye nde azali na yango; ndenge moko mpe, mobali azali na bokonzi te likoló ya nzoto na ye moko, kasi mwasi na ye nde azali na yango.” (1 Bakolinti 7:4) Kolanda toli yango esalisaka moto amona ete kosangisa nzoto ezali te ndenge ya kokokisa bamposa ya moimi oyo akolisi mpo azali kokanisa kosangisa nzoto na moto mosusu. Kosala bongo esalisaka mobali ná mwasi na ye bázala na esengo mingi.​—Misala 20:35; Bafilipi 2:4.

Kosangisa nzoto na moto mosusu na makanisi elimboli kokanisa makambo oyo, soki moto asali yango, ekoyokisa molongani na ye mpasi mingi. Kosangisa nzoto na moto mosusu na makanisi ekoki nde kosala ete moto akóma pene mingi na kosala ekobo? Ɛɛ, ezali bongo. Biblia emonisi boyokani oyo ezali kati na makanisi ná misala: “Moto na moto amekamaka nde na komemamáká mpe na kobendamáká na mposa na ye moko. Na nsima mposa wana, ntango ezwi zemi, eboti lisumu.”​—Yakobo 1:14, 15.

Yesu alobaki boye: “Moto nyonso oyo azali kokoba kotala mwasi tii na koyoka ye mposa asili kosala ekobo elongo na ye na kati ya motema na ye.” (Matai 5:28) Soki oboyi kokanisakanisa makambo oyo ekoki komema na ekobo, ‘okobatela motema na yo’ mpe libala na yo.​—Masese 4:23.

Mpo na nini kotya makanisi kaka epai ya molongani na yo?

Mpo na kozala na libala ya esengo, esɛngaka moto ‘akangama kaka’ na molongani na ye. (Loyembo ya Salomo 8:6, NW; Masese 5:15-18) Yango elimboli nini? Atako ezali mabe te kozala na baninga ya basi mpe ya mibali, molongani na yo nde abongi kozwa libosoliboso ntango na yo, likebi na yo mpe asengeli kozala ntango nyonso na makanisi na yo. Boninga nyonso oyo ezali kosɛnga ozwa makambo oyo ebongi kaka na molongani na yo mpe opesa yango moto mosusu ezali lolenge moko ya “kozanga bosembo na libala,” ata soki bosangisi nzoto te.a

Ndenge nini boninga ya ndenge wana ekoki kokola? Okoki komona ete moto mosusu azali kitoko to na boboto koleka molongani na yo. Kolekisa ntango na moto yango na mosala to na esika mosusu ekoki kotinda yo oyebisa ye makambo na yo moko, ata mpe mikakatano to makambo oyo ezali kopesa yo mpasi na libala na yo. Okoki kobanda kolinga ete moto yango abɔndisaka yo mpo na mpasi oyo ozali na yango na motema. Kokutana na moto yango mpo na kosolola, to mpe kosolola na ye na telefone to kokomana na Internet ekoki kotinda yo obimisa basɛkɛlɛ ya libala na bino. Bato oyo babalani balingaka ete makambo mosusu esuka kaka kati na bango mibale mpe ete “likambo ya nkuku” ekóma na matoi ya moto mosusu te.​—Masese 25:9.

Kebá! Koluka komilongisa te mpe koloba ete ozali kolinga moto te, nzokande ozali kolinga ye! Yilimia 17:9 elobi ete “motema ezali na bokosi.” Soki ozali na boninga makasi na moto oyo azali molongani na yo te, omituna: ‘Nazali komilongisa to kobombabomba boninga yango? Nakoyoka nsɔni te soki molongani na ngai ayoki masolo na biso? Nakoyoka ndenge nini soki molongani na ngai asali boninga ya ndenge wana na moto mosusu?’​—Matai 7:12.

Boninga makasi na moto oyo azali molongani na yo te ekoki kobebisa libala, mpo yango ekoki kotinda bino bósangisa nzoto. Ndenge Yesu amonisaki, “longwa na motema nde ebimaka . . . bikobo.” (Matai 15:19) Kasi, ata soki moto asali mpenza ekobo te, soki molongani azali kotyela ye motema lisusu te, ekoki kozala mpasi mingi boyokani na bango ezonga ndenge ezalaki liboso. Mwasi moko na nkombo Karenb alobaki boye: “Ntango nayebaki ete Mark azalaki kosolola na telefone mbala mingi na mokolo mpe na ndenge ya kobombama na mwasi mosusu, nayokaki mpasi na motema. Ezali mpasi mingi nandima ete asangisaki na ye nzoto te. Nayebi te soki nakotyela ye lisusu motema.”

Kokóma moninga makasi te na moto oyo azali molongani na yo te. Kokanga miso te na bamposa ya mabe oyo ebotami na motema mpe kolukaka te kolongisa makanisi ya mabe. Soki omoni ete boninga moko elingi kobebisa libala na yo, salá nokinoki mpo ekóma makasi te to mpe katá yango. Biblia elobi boye: “Moto ya mayele akososola mabe liboso mpe akomibomba.”​—Masese 22:3.

Bótikala ntango nyonso mosuni moko

Mozalisi na biso alingaki ete libala ezala boyokani oyo eleki makasi kati na bato mibale. Alobaki ete mwasi ná mobali “bakozala mosuni moko.” (Genese 2:24) Kozala mosuni moko esuki kaka na kosangisa nzoto te. Esɛngaka kozala na boyokani makasi, oyo ekómaka makasi koleka soki molongani azali koluka liboso bolamu ya moninga, kotyela ye motema mpe kopesana limemya. (Masese 31:11; Malaki 2:14, 15; Baefese 5:28, 33) Kosalela mitinda yango ekobatela libala na yo na makama oyo eutaka na kotya makanisi na moto oyo azali molongani na yo te.

[Maloba na nse ya lokasa]

OSILÁ KOMITUNA?

◼ Kosangisa nzoto na moto mosusu na makanisi ekoki kotinda moto asala pite to ekobo?​—Yakobo 1:14, 15.

◼ Kosala boninga makasi na moto oyo azali molongani na yo te ekoki kozala likama mpo na libala na yo?​—Yilimia 17:9; Matai 15:19.

◼ Ndenge nini okoki kokómisa boyokani na yo ná molongani na yo makasi?​—1 Bakolinti 7:4; 13:8; Baefese 5:28, 33.

[Likanisi ya paragrafe na lokasa 19]

“Moto nyonso oyo azali kokoba kotala mwasi tii na koyoka ye mposa asili kosala ekobo elongo na ye na kati ya motema na ye.”​—Matai 5:28.