Liteya 19
Zwa litomba na eteyelo mpo na kobongisa mosala na yo
1. Mokano nini ya Eteyelo ya mosala ya Nzambe tokoki kobosana yango te wana ezali biso kobongisa badevuare na biso?
1 Moko na mikano ya liboso ya Eteyelo ya mosala ya Nzambe ezali boye ete esalisa biso tobonga koleka kati na mosala ya kosakola. Kobosana mokano oyo te wana ezali yo kobongisa badevuare na yo. Koluka te bobele ete otonda na boyebi mingi mpo na yo moko, kasi talela motindo nini okoki kosalela boyebi yango kati na mosala na yo ya kosakola mpe na koteya na yo.
2. Ndenge nini tokoki kopesa litatoli epai ya bato ntango tozali komeka badevuare na biso oyo tokosala na eteyelo?
2 Bamoko bazali komeka badevuare na bango na miso ya baninga na bango, na bato bafandi penepene na bango, na balakisi na bango, na bandeko na bango ya mosuni to na bato mosusu oyo bandimi koyoka bango. Kosala motindo boye ezali na matomba mingi. Okotalela likanisi ya bayoki na yo mpe kosala mabongwani masengeli mpo na kobongisa lisolo na yo ete ezala malamu koleka. Epai mosusu, kolobela bato yango makambo oyo ya motuya, ekoki kolamusa mposa na bango mpo na koyekola Biblia. Mbala mosusu ekozala libaku ya kobyanga moko na bango na koyangana na Eteyelo ya mosala ya Nzambe. Bato mingi bakomaki motindo yango na Salle du Royaume. Mojaponé moko ya mwasi, Témoin de Jéhovah amekaki lisolo na ye oyo alingaki kosala na Eteyelo ya mosala ya Nzambe, na miso ya mosangani ya Lingomba moko oyo ye akendaki kotala. Motó na likambo na ye ezalaki “Libota ya Nzambe basengeli kobima na ‘Babilone’”. Mwasi wana asepelaki mpe andimaki koyekola Biblia.
3. Nini ekopusa biso ete tosalela kati na mosala ya kosakola makambo oyo toyokaka na eteyelo?
3 Kanisa ndenge ya kosalela yango kati na mosala ya kosakola. Na Eteyelo ya mosala ya Nzambe, ozali koyekola makambo mingi kitoko oyo mingi na yango ekoki kosalelama kati na mosala ya kosakola. Kati na programme ya eteyelo, tozali koyekola makambo lokola oyo: mpo na nini tosengeli kondima Biblia, biyano na mituna oyo bato batunaka na ntina na mateya ndenge na ndenge, kokokisama na bisakweli na Biblia, ndimbola ya mikapo ya kwokoso mpe lolenge ya kosalela mikapo ya Biblia kati na bomoi ya mikolo nyonso. Luka mabaku ya kosalela makambo yango kati na mosala ya kosakola. Kozela te bobele ete moto atuna naino yo motuna na ntina na moko kati na makambo oyo. Soki libaku emonani, yo moko benda lisolo epai ya moko na makambo yango. Na motindo yango, makambo oyo makoingela kati na elimo na yo mpe okozala ministre malamu mingi.
4. Ndenge nini Eteyelo ya mosala ya Nzambe ekoki kosalisa biso ete tokola mpo na oyo etali kosalela Biblia malamu?
4 Kosalela Biblia ezali na ntina mingi kati na mosala na biso ya kosakola. Nzokande, basakoli mosusu bakokaka te mpo na kozwa nokinoki mikapo oyo bazali na yango mposa. Ezali boye mpo na yo? Soki ee, Eteyelo ya mosala ya Nzambe ekoki kosalisa yo na kokola mingi. Ndenge nini? Fungola Biblia na yo mpo na kolanda balobi nyonso oyo bazali koleka liboso. Ntango alingi kotanga mokapo moko, yo mpe luka yango kati na Biblia na yo. Kotanga mikapo wana mbala na mbala, ekomesenisa yo na yango mpe okoyeba epai wapi okomona yango ntango ozali na mposa na yango. Komesena ezali na ntina mingi, mpe okoki kosala yango bobele ntango ozali kosangana na mosala ya kosakola te, kasi lisusu poso na poso wana ezali yo koyangana na Eteyelo ya mosala ya Nzambe. Okozwa mpe litomba na makambo oyo balobi nyonso babongisaki. Baponaki mikapo ya Biblia oyo mikokani mpenza na masolo mapesamaki na bango. Wana ezali yo kolanda masolo na bango, tya bilembo na maloba ya ntina to mots clés ya mikapo ya Biblia oyo omoni yango ete ezali litomba mpo na mosala ya kosakola. Mbala mosusu okomona malamu kokoma na lokasa oyo etikala mpamba na Biblia na yo, mikapo wana mpe motó ya likambo oyo molobi abimiselaki yango. Na motindo yango, okomona mpasi te kati na mosala ya kosakola mpo na kosalela makambo oyo ozali koyekola na eteyelo.
5, 6. Litomba nini ekozala na masolo na biso soki toponi kosala yango engebene makambo mamonanaka solo?
5 Wana ezali yo kobongisa lisolo na yo, pona malamu kadre na yo, mpamba te yango ekosalisa yo ete osalela kati na mosala ya kosakola makambo kitoko oyo oyekolaki na eteyelo. Soki likoki ezali, sala lisolo na yo engebene makambo tokutanaka na yango solo kati na mosala ya kosakola. Mbala mosusu, okomona ete lisolo na yo ebongi mpo na kosakola ya ndako na ndako to na kopesa litatoli ya libaku malamu. To mpe ekoki kobonga lokola lisolo na ntango ya bozongeli moto. To lisusu lokola eyano epesami na motuna oyo moyekoli moko ya Biblia atunaki. Ntango nyonso, kadre to ndenge ya kosalela lisolo na yo esengeli komonisa makambo masalemaka solo. Ekoleka lisusu solo soki obongisi lisolo na yo na motindo boye ete molobani na yo azali na likanisi ekeseni na oyo ya yo. Na yango, okomonisa ndenge okoki kosala soki okutani na likambo motindo boye. Masolo oyo mabongi na mosala ya kosakola, masengeli te ntango nyonso kosuka na litomba malamu nokinoki; ezali mpe litomba mingi na komonisa ndenge nini tokoki kosala soki moto azali mpenza na mposa ya koyoka biso te.
6 Soki oponami mpo na kozala molobani, okoki kozwela yango bolamu mingi oyo ekozala na litomba mingi mpo na yo kati na mosala na yo ya kosakola. Salela libaku yango mpo na komeka kosimba ntina na makanisi na bato oyo tokutanaka na bango mpe ntina na bantembe oyo bazali kobimisa. Kosalaka lokola bato oyo tokutanaka na bango na mosala ya kosakola mpe komonaka ndenge ndeko nkolo ya mokumba azali kosala na libaku motindo yango, okoki kokolisa makoki na yo kati na mosala ya kosakola.
7. Mpo na kokola ntango nyonso, eloko nini tokoki koluka kobongisa yango poso nyonso kati na mosala na biso ya kosakola?
7 Soki diskur euti na Mokanda mpo na Eteyelo ya mosala ya Nzambe, talela malamu mateya mapesami kati na yango, na mokano ya kobongisa mosala na yo, ezala ndako na ndako to na lolenge mosusu. Kamata lisolo yango lokola ete ezali likambo oyo yo osengeli kobongisa poso wana kati na mosala na yo ya kosakola. Na ndakisa, soki diskur emonisi ntina ya kozala na teme to motó na likambo, omituna soki masolo na yo kati na mosala ya kosakola ezalaka solo na teme. Omonisaka teme yango polelepolele mpo ete ekota kati na elimo na bato oyo yo olobi na bango? Soki te, sala makasi na esika wana na poso oyo. Okoki mpe koyoka lisolo na ntina etali kotanga mikapo ya Makomami mpe komonisa ndenge ya kosalela yango. Wana ezali yo koyoka yango, kanisa na lolenge oyo yo osalelaka mikapo. Otangaka yango kozanga kolimbola yango epai na balobani na yo? Ndenge nini okangisaka yango na teme na yo? Ndenge nini omonisaka na balobani na yo ete yango etali bango. Kososola motindo boye ekoki kosalisa yo mpo na kokola kati na botangi mpe kolimbola mikapo ya Biblia. Soki molobi ateyi ndenge ya kosalela bandakisa to masese, ndenge nini yo okoki kokola na likambo yango? Alakisi nde motindo ya koteya kati na boyekoli ya Biblia na ndako? Talela bametode na yo mpo na komona ndenge nini okoki kosalela batoli oyo apesi, wana ezali yo koteya bato oyo oyekolaka na bango Biblia na bandako na bango, mpe salela toli yango na poso wana. Na motindo yango, okoyeba kosalela makambo oyo ozali koyekola kati na eteyelo ya mosala ya Nzambe mpo ete obongisa mosala na yo ya kosakola.
8. Wana ezali biso kosakola, ndenge nini tokoki komipesa toli biso moko mpe kozwela yango litomba?
8 Talela ndenge na yo ya kosakola. Na eteyelo ya mosala ya Nzambe, oyokaka poso na poso batoli mpe omonaka malamu na yango. Mbala mosusu Mokengeli na eteyelo abimaka na yo elongo te kati na mosala ya kosakola, yango wana ebongi ete okamata momeseno ya komipesa toli yo moko. Nsima na koloba epai na moto moko, mpe ntango otiki ye mpo na kokende na porte elandi, omituna mituna miye: Mbele nakokaki kosala nini mpo ete kosakola na ngai ezala malamu koleka? Na makambo oyo nayebi sikawa, mbele nakoki koloba ndenge mosusu soki esengeli ete nazongela lisolo yango? Komitalela lolenge oyo ekoki kozala na litomba ata na mokolo yango, mpamba te mbala mosusu okokutana na likambo yango moko na porte mosusu. Soki okamati momeseno ya kososola ndenge na yo ya kosakola, okozala kokola ntango nyonso. Nzokande, na ntango ozali kosakola elongo na ndeko mosusu, okoki mpe kosenga ye ete apesa yo toli.
9, 10. Ndenge nini kosala ba ekzersise na ndako ekosalisa biso na kosalela kati na mosala ya kosakola makambo oyo toyekoli?
9 Metode moko malamu mingi ya kobongisa masolo na yo ya mosala ya kosakola ezali boye ete omeka naino yango na miso ya basakoli mosusu mpe kososola yango elongo. Okoki kosala yango elongo na basangani ya libota na yo to na bandeko mosusu na lisangá na bino. Senga bango ete bazala lokola bato oyo tokutanaka na bango na mosala ya kosakola mpe babimisa bantembe ndenge toyokaka yango na mosala ya kosakola. Soki babimisi ntembe moko, silisa yango soki okoki. Soki te, telema mpe tuna toli epai na baoyo bazali wana. Na nsima, zongela lisolo na kosalelaka mwa bamoko na makanisi mapesami. Na nsuka ya lisolo, botala elongo soko metode yango ezali malamu. Kosalaka ba ekzersise ya motindo boye ekosalisa yo na kobongisa masolo na yo mpo na mosala ya kosakola mpe ekopesa yo likoki ya kosembola mabunga mosusu liboso ya kokende kati na mosala ya kosakola. Yango ekosalisa yo na kosalela kati na mosala ya kosakola makambo oyo ozali koyekola na eteyelo. Omikundola ete ntoma Paulo alobaki ete bato bateli ezali baoyo “basili kolakisa esoswelo na bango kokabola kati na malamu mpe mabe”. (Baeb. 5:14) Lolenge moko ya kokolisa bisoswelo na biso ezali ete tosalaka ba ekzersise.
10 Eteyelo ya mosala ya Nzambe ezali moko na ebele ya bibongiseli oyo Jéhovah, na kokaba na ye, asili kopesa biso mpo na kobongisa biso. Soki tozali koyekola mpe tozali kosalela noki mateya oyo tozali kozwa na eteyelo yango, tokoki koloba elongo na mosakoli Yisaya ete: “Nkolo Jéhovah apesi ngai lolemo na baoyo balakisami ete nayeba kosimba na maloba ye oyo alembi. Ntongo na ntongo akolamukisa, akolamukisa litoi na ngai koyoka lokola bango baoyo bakolakisama.”—Yisaya 50:4.