Osengeli kondima Trinité?

ONDIMAKA Trinité? Mingi na basangani ya boklisto na lokuta bazali kondima yango. Wana ezali te liteya na moboko ya Mangomba uta bikeke mingi?

Okoki mbala mosusu kokanisa ete liteya yango lizali solo. Nzokande, ezali bongo te; mpe kala mingi te, bamoko kati na bakóteli ya Trinité nkutu basili kotemela yango.

Ebongi tolobela likambo yango. Na solo, Yesu, mwana na Nzambe alobaki ete: “Bomoi na seko, ezali boye ete, bayeba yo, Nzambe ya solo bobele moko, bayeba mpe motindami na yo, Yesu Klisto.” Na yango, avenire na biso mobimba etaleli boyebi oyo tozali na yango mpo na bosolo ya bomoto na Nzambe, oyo esengisi boyekoli ya bozindo likoló na liteya ya Trinité. Mpo na nini te komipesa na botaleli yango?​—Yoane 17:3, Bible de Jérusalem (Jé), Libongoli ya Katolike.

Ata soko Trinité emonisami na makanisi makeseni, kasi likanisi lileki ntina mpenza mpo na liteya yango ezali oyo ete, Nzambe moko na ba persona misato: Tata, Mwana mpe Elimo-Santu. Lisusu, engebene liteya yango, bango nyonso misato bakokani, bazali bazwi-na-nguya-nyonso mpe nyonso bakelami te, elingi koloba ete bakobika seko kati na Nzambe moko.

Nzokande bamosusu bakolobaka ete, Trinité ezali liteya ya lokuta; bayebi ete Nzambe moko azali, ye Mozwi-na-Nguya-Nyonso mpe na seko, azali bobele ye moko mpe akeseni na bamosusu. Bayebi ete liboso na kobótama lokola moto awa na mokili, Yesu Klisto azalaki lokola anzelu, ekelamu na elimo oyo akeseni na bamosusu, azalisamaki na Nzambe; boye, azwaki ebandeli. Bato yango bandimi ete, Yesu akokani soko moke te na Nzambe Mozwi-na-Nguya-Nyonso, ata na lolenge nini; kasi uta ebandeli kino lelo, azali bobele kotósa Nzambe. Mpe bandimi lisusu ete, elimo santu ezali moto te, kasi ezali nde elimo na Nzambe, bokasi na ye oyo bokosalaka mosala.

Bakóteli ya Trinité balobi ete liteya yango litongami bobele likoló na bindimeli ya mangomba te, kasi lizwi lisusu moboko likoló na Biblia. Engebene bato na mayele baoyo batalelaki liteya yango, Trinité euti na Biblia te; mokanda moko ya Lisolo na bato elobi ete: “[Trinité] ezwi ebandeli na yango mobimba epai na bapakano.”​—Survivance païennes dans le monde chrétien.

Soko oyo yango ekoteyaka ezali solo, ekozala bongo kofinga Yesu na kozanga komona ye ete, akokani na Nzambe kati na Trinité. Soko oyo yango elobi ezali lokuta, ekozala bongo kofinga Nzambe Mozwi-na-Nguya-Nyonso na kokokanisáká ye na basusu; mpe oyo eleki mabe ezali likambo oyo ya kobenga Marie ete, “Mama na Nzambe.” Soko Trinité ezali liteya ya lokuta, ezali bongo kosambwisa Nzambe na kolobáká lokola oyo esalaki mokanda Le catholicisme (angl.), ete: “Ya solo mpenza, [soko nani] akotya ntembe na bosembo mpe bopeto ya Endimeli oyo, akokufa libela. Tala oyo Endimeli yango ya Katolike elobi: tozali kosambela Nzambe bobele moko kati na Trinité.”

Na kotaléláká oyo nyonso euti kolobama, ebongi mpenza ete oluka koyeba solo na ntina na Trinité. Kasi, liboso na kotalela ebandeli ya liteya yango mpe kotalela bandimbola na yango soko ezali ya solo mpenza, ekozala ntina mpenza ete tolimbola liteya yango na bosikisiki nyonso. Trinité ezali mpenza nini? Lolenge nini bakoteli ya Trinité bazali kolimbola yango?

[Bililingi na lokasa 2]