Mokapo 22

Yesu abengi bayekoli minei

NSIMA wana balingaki koboma ye na Nazarete, mboka epai kuna akolaki, Yesu akei na Kapernaume, pembeni na libeke na Galilai. Likambo yango ekokisi esakweli mosusu ya Yisaya, oyo esilaki koyebisa ete bato na Galilai oyo bafandi pembeni na libeke bakomona kongenga makasi.

Lokola alandi kongengisa pole na ye na kosakolaka Bokonzi na esika yango, Yesu amoni bayekoli na ye minei. Bango balandaki ye liboso na mibembo oyo asalaki mwa mikolo mingi liboso, kasi sikawa bazongeli mosala na bango ya koboma mbisi uta ezongi bango na mboka na bango, kouta na Yudea elongo na ye. Emonani lokola ete Yesu azali koluka bango, mpamba te, ngonga ekoki mpo na ye ete abongisa bakitani na ye ya sembo mpe ya molende, baoyo bakokoba mosala nsima ya kozonga na ye.

Na bongo Yesu azali kotambola pembeni na libeke; ntango amoni Simona Petelo mpe baninga na ye kosukola minyama na bango, akei epai na bango. Amati na bwato ya Petelo mpe alobi na ye apusa bwato mwa moke na mai. Ntango bapusani moke, Yesu afandi kati na bwato mpe abandi koteya ebele na bato oyo batikali na libongo.

Na nsima Yesu alobi na Petelo ete: “Tinda bwato kuna na mai mozindo, mpe kitisa minyama na bino mpo na kokanga mbisi.”

Simona alobi ete, “Tosali mosala butu mobimba, Molakisi, nde tozwi eloko te. Nde mpo na maloba na yo nakokitisa minyama.”

Na bongo minyama mibwakami na mai mpe mimemi ebele na mbisi na motindo boye ete minyama mibandi kopasuka. Na mbala moko mibali oyo babengi baninga na bango oyo bazali na bwato penepene ete baya kosalisa bango. Mbisi eleki mingi na boye ete bwato nyonso mibale etondi mpe ebandi kozinda. Komonaka bongo, Petelo akwei na mabolongo na Yesu mpe alobi na ye ete: “Longwa penepene na ngai, Nkolo, mpo ete nazali moto na masumu.”

Yesu nde azongiseli ye ete: “Kobanga te! Banda sikawa okozala molɔbi na bato.”

“Bolanda ngai, mpe nakozalisa bino balɔbi na bato.” Wana ezali maloba ya kobenda oyo Yesu ayebisi yango epai na Petelo mpe epai na ndeko na ye Andre. Yakobo mpe Yoane bana ya Zebedai, bazali balobi na mbisi oyo bazalaki kolanda bango. Bango mpe babengami mpe bandimi libyangami yango kozanga kokakatana. Na bongo, mibali yango batiki mosala na bango ya koboma mbisi mpe bakomi bayekoli minei ya liboso oyo balandi Yesu na bosembo mpe bakangami na ye libela. Luka 5:1-11; Matai 4:13-22; Malako 1:16-20; Yisaya 9:1, 2.

▪ Mpo na nini Yesu abengi bayekoli na ye ete balanda ye? Bayekoli yango banani?

▪ Ekamwiseli nini ebangisi Petelo?

▪ Motindo nini mosusu ya kolɔba Yesu abengi bayekoli na ye na kosangana na yango?