Mokapo 26

Azongi na Kapernaume

NSANGO na ntina na Yesu esili kopalangana kati na mboka mobimba mpe bato mingi bazali kolanda ye ata akei na esika na ye moko mpo na kopema. Nzokande, nsima na mwa mikolo azongi na Kapernaume na kolekaka na nzela ya libeke ya Galilai. Nsango epalangani nokinoki kati na mboka ete azongi, mpe bato mingi bayei na ndako oyo ye azali. Bafalisai mpe balakisi na Mibeko bauti mosika mpenza na Yelusaleme bazali mpe wana.

Bato batondi mekee pene na ekuke na boye ete nzela ya kokota na ndako ezali te. Bobele na ntango yango, likambo moko ya kokamwa ekosalema. Likambo yango ezali na ntina monene, mpamba te ekosalisa biso na kososola ete Yesu azali na nguya ya kolongola eutelo na bampasi ya bato, mpe kopesa kolongono malamu ya nzoto epai na baoyo nyonso ye aponi kobikisa bango.

Wana Yesu azali koteya bibele, bato minei bakumbi na ndako yango moto moko ebosono alali na kitikwala. Balingi ete Yesu abikisa moninga na bango, kasi bakoki kokota te mpo bato baleki mingi. Oyo nde mawa! Kasi, balembi te. Babuti likolo na ndako, bafungoli lidusu na likolo na ndako mpe bakitisi pembeni na Yesu kitikwala oyo likolo na yango ebosono alali.

Yesu asiliki mpo ete bakati ye maloba? Te! Nkutu akamwi mingi nde mpo na kondima ya bato oyo. Alobi na ebosono: “Masumu na yo malimbisami.” Kasi Yesu akoki solo kolimbisa masumu? Bakomeli mpe Bafalisai bandimi te. Bazali kokanisa boye na mitema na bango: “Mpo na nini moto oyo azali koloba boye? Azali kotuka. Nani mosusu ayebi kolimbisa masumu, soko bobele Nzambe te?”

Koyebaka makanisi na bango, Yesu alobi na bango ete: “Nini oyo ezali petee, koloba na ebosono ete: ˈMasumu na yo malimbi-sami,ˈ to koloba ete: ˈTelema, kamata kitikwala na yo mpe tambola?ˈ”

Na nsima Yesu alakisi na bato nyonso bazali wana, mpe na batyoli na ye ete azali na nguya na kolimbisa masumu awa na mokili mpe azali moto oyo aleki bato nyonso. Abaluki epai na ebosono mpe alobi na ye boye ete: “Telema, kamata kitikwala na yo mpe kenda na ndako na yo.” Mobali yango atelemi, alokoti kitikwala na ye nokinoki mpe abimi liboso ya bato banso! Bibele bakamwi na maloba oyo: “Tomoni likambo na lolenge oyo liboso soko moke te.”

Yesu amonisi ete masumu nde ebendaka maladi mpe ete lilimbisi ya masumu ekomemaka kolongono malamu na nzoto. Biblia elobi ete Adam, nkoko na biso nyonso, asalaki lisumu mpe ete tosangolaki biso banso mabe ya lisumu yango, elingi koloba maladi mpe liwa. Kasi na nse ya Bokonzi na Nzambe, Yesu akolimbisa masumu ya baoyo nyonso balingi Tata na ye mpe bazali kosalela ye, nsima na yango nde bokono nyonso ekosila. Oyo nde bolamu tokozala na yango na ntango wana! Malako 2:1-12; Luka 5:17-26; Matai 9:1-8; Baloma 5:12, 17-19.

▪ Makambo nini Yesu akutani na yango ntango azongi na Kapernaume mpe likambo nini ya monene esalemi wana?

▪ Ndenge nini ebosono akomi kino esika Yesu azali?

▪ Mpo na nini biso banso tozali basumuki, kasi ndenge nini Yesu amonisi ete masumu na biso makoki kolimbisama mpe tokoki kozala lisusu na nzoto ya kokoka?