Mokapo 77

Likambo litali libula

BATO bayokaki ete Yesu akendaki kolya epai na Mofalisai moko. Na bongo bayangani nkoto mingi penepene na ndako mpo na kozela ye. Na bokeseni na Bafalisai oyo bazali kotemela Yesu mpe bazali kolikya kokanga ye kati na maloba na ye, ebele na bato bazali koyoka ye na mposa nyonso mpe na botondi mpenza.

Kolobaka liboso epai na bayekoli na ye, Yesu alobi ete: “Bokeba mpo na mfulu na Bafalisai, oyo ezali bokosi.” Lokola yango emonisamaki na ntango na bolei, lingomba na Bafalisai etondi na bokosi. Ata soki mabe na bango ebombami na nse na ína lokola ete bamipesi na makambo na Nzambe, ekosuka na komonisama polele. Yesu alobi ete: “Likambo moko te lizipami ekozanga komonana, mpe likambo moko te libombami ekozanga koyebana.”

Yesu azongeli lisusu bilendiseli oyo alobaki yango epai na bazomi na mibale ntango atindaki bango kosakola na Galilai. Alobi ete: “Bobanga baoyo bazali koboma nzoto te, mpe bango bakoki kosala likambo mosusu te na nsima.” Yesu alendisí bayekoli na ye ete Nzambe, oyo abosanaka ata ndeke moko te ya moke, akobosana bango mpe te. Alobi: “Wana ekokamba bango bino liboso na biyanganelo, mpe liboso na mikóló, mpe liboso na mikonzi, . . . elimo santu ekolakisa bino makambo makoki na bino koloba.”

Ezali na ntango wana nde moto moko atomboli mongongo na ye katikati na bato. Asengi ete: “Molakisi loba na ndeko na ngai ete akabola libula elongo na ngai.” Mibeko na Moïse mikataki ete mwana ya liboso asengeli kozwa ndambo mibale na libula; na bongo matata masengeli kozala te. Kasi, emonani ete moto oyo azali kosenga biloko mosusu oyo azali na lotomo na yango te.

Na bosembo nyonso, Yesu aboyi kokotela moto moko kati na bango. Ayanoli ye ete: “Mobali, nani atii ngai mosambisi to mokaboli na biloko kati na bino?” Na nsima apesi likebisi oyo na ntina mingi epai na bato: “Bokeba mpe bosenzela na ntina na elulela nyonso, mpo ete bomoi na moto ezali kati na motuya na biloko bizali na ye te.” Na yango, atako biloko na ye biyikani mingi, nsukansuka moto asengeli kokufa mpe kotika yango nyonso. Yesu asaleli lisese moko mpo na komonisa polele solo wana mpe komonisa bozoba ya moto nyonso oyo akozala na bopotu mpo na komizwela nkombo malamu liboso na Nzambe. Lisese ezali boye:

“Bilanga na mozwi moko bibotaki malamu, mpe akanisaki na motema na ye ete: ‘Nasala nini? mpo ete nazali na esika na kotya mbuma na ngai te.’ Alobaki ete: ‘Nakosala boye, nakoboma bibombelo na ngai, mpe nakotonga mosusu bikoleka monene, mpe nakoyanganisa mbuma na ngai nyonso na biloko na ngai wana, mpe nakoloba na molimo na ngai ete: “Molimo na ngai, ozali na biloko mingi malamu bibombami mpo na mbula mingi; pema, lia, mela, mpe sepela.”’ Kasi Nzambe alobi na ye ete: ‘Yo zoba! na butu oyo bakoluka bomoi na yo epai na yo. Bongo biloko bisili yo kobomba, nani akozwa yango?’”

Mpe Yesu asukisi boye: “Ezali se bongo mpo na moto abombi biloko mpo na ye moko mpenza nde azali mozwi epai na Nzambe te.” Atako bayekoli bakoki kosala makasi ete bapesa nzela te na mposa ya konduka bozwi, nzokande na ntina na bitungiseli na bango ya mokolo na mokolo, bakoki kolemba kosalela Jéhovah na molimo na bango mobimba. Na bongo Yesu asaleli libaku wana mpo na kozongela toli kitoko oyo apesaki yango, mbula moko na ndambo esili koleka, kati na Lisolo na ye likoló na ngomba. Kotalaka epai na bango, alobi ete:

“Yango wana nalobi na bino ete: Bozala na mitema likoló te mpo na bomoi na bino, soko bokolya nini soko bokomela nini to mpo na nzoto na bino soko bokolata nini. . . . Bokanisa bandeke yanganga ete bakolonaka te mpe bakobukaka te, mpe bazali na ebombelo te soko etyelo te, nde Nzambe akoleisaka bango. . . . Bokanisa felele, ekosalaka busi te soko bilamba te, nde nalobi na bino ete Salomo na kitoko na ye nyonso alatisamaki lokola moko na yango te. . . .

“Bino boluka te soko bokolya nini soko bokomela nini, mpe bozala na mitema likoló te. Mpo ete bapakano na mokili bakolukaka biloko oyo nyonso, nde Tata na bino ayebi ete bozali na bosenga na biloko nyonso wana. Kasi, bolukaka liboso bokonzi na ye mpe biloko oyo nyonso bikopesamela bino lokola.”

Maloba wana na Yesu mabongi mpenza ete totyela yango likebi na eleko oyo tokomi na mikakatano makasi na makambo matali nkita. Ye oyo akomitungisa koleka ndelo mpo na bamposa na ye ya mosuni mpe abandi kolembisa milende na ye kati na makambo na elimo azangi mpenza bondimi kati na nguya oyo Nzambe azali na yango mpo na kokokisa bamposa ya basaleli na ye. Luka 12:1-31; Deteronome 21:17.

▪ Ekoki kozala mpo na ntina nini moto moko asengi na Yesu ete akatela bango likambo litali libula, mpe likebisi nini Yesu apesi mpo na yango?

▪ Lisese nini Yesu asaleli, mpe mokano na yango ezali nini?

▪ Toli nini Yesu azongeli yango lisusu, mpe mpo na nini ebongi mpenza?