Mokapo 100

Lisese ya mbuma na paláta

MBALA mosusu Yesu azali naino epai na Zakai, epai kuna apemaki wana azalaki na mobémbo mpo na kokende na Yelusaleme. Bayekoli na ye bakanisi ete, ntango bakokóma na Yelusaleme, akoloba ete ye azali Masiya mpe akotya Bokonzi na ye. Mpo na kosembola likanisi wana mpe komonisa ete Bokonzi ezali naino mosika, Yesu apesi lisese oyo.

“Moto moko na lokumu asalaki mobémbo na mokili mosusu mosika mpo na kozwa Bokonzi mpe kozonga.” “Moto na lokumu,” ezali Yesu, mpe “mokili mosusu mosika,” ezali likoló. Ekokóma ye na likoló, Yesu akozwa nguya ya bokonzi epai na Tata na ye.

Kasi liboso na kokende, moto na lokumu abengi baombo na ye zomi, mpe apesi mbuma na paláta mokámá mokámá epai na moko na moko kati na bango, ye ete: “Sala mombongo kino ekozonga ngai.” Na kokokisama ya liboso, baombo zomi bamonisi bayekoli ya liboso ya Yesu. Na kokokana monene, bango nyonso bazali elilingi na bato oyo bazali na elikya ya kozala batuki na libula elongo na ye kati na Bokonzi ya likoló.

Paláta mokámá ezali mosolo mingi, ntalo oyo ekokani na lifuti ya sanza misato ya mosali bilanga. Kasi paláta yango elakisi nini? Mombongo nini baombo basengeli kosala na yango?

Paláta ezali elilingi ya bozwi oyo bayekoli bapakolami na elimo bakoki kosalela mpo na kokómisa bato mingi batuki na libula ya Bokonzi na likoló kino ntango Yesu akozonga lokola Mokonzi kati na Bokonzi oyo bolakami. Nsima na kosekwa mpe kobimela bayekoli na ye, Yesu apesaki bango paláta yango ya elilingi mpo ete bazalisa bayekoli mingi oyo bakobakisama bongo na kelasi na Bokonzi ya likoló.

Yesu akóbi koloba ete: “Nde bato na ye na mboka bayinaki ye [moto na lokumu], mpe batindi bantóma na nsima na ye koloba ete, ‘Tolingi moto oyo te ete azala mokonzi na biso.’” Bato na mboka na ye bazali Bayisraele, elingi koloba Bayuda, longola bobele bayekoli na Yesu. Nsima wana Yesu akendaki na likoló, Bayuda yango banyokolaki bayekoli na ye, komonisáká bongo ete balingaki ye te ete azala mokonzi likoló na bango. Ezali na ndimbola oyo nde basalaki lokola “bato na ye” baoyo batindaki ntóma na bango epai na ye.

Baombo zomi basali nini na paláta na bango? Yesu alimboli ete: “Wana esili ye kozwa bokonzi, azongi, mpe alobi ete baombo oyo ye apesaki mosolo yango babyangama epai na ye, ete ayeba soko moto na moto azwi boni na mombongo na ye. Oyo na liboso ayei koloba ete: ‘Nkolo, paláta na yo mokámá ezwi paláta mosusu nkóto.’ Alobi na ye ete: ‘Malamu! Yo moombo malamu. Zala na bokonzi na mboka zomi, mpo ete ozalaki sembo na likambo moke.’ Oyo na mibale ayei koloba ete: ‘Nkolo, paláta na yo mokámá ezwi paláta mosusu nkámá mitano.’ Alobi na ye lokola ete: ‘Yo mpe zala liboso na mboka mitano.’”

Moombo oyo azwaki paláta mosusu nkoto, azali elilingi na kelasi moko to etuluku ya bayekoli, bakisa mpe bantóma, kelasi oyo esalami kobanda Pantekote ya mobu 33 ya ntango na biso kino lelo. Baoyo bazwaki paláta mosusu nkámá mitano likoló bazali mpe elilingi na etuluku moko ya bato oyo, bobele na eleko wana moko, bazali kokólisa bozwi ya mokonzi na bango awa na mabelé na myango na bango mpe na makoki na bango. Bituluku wana mibale bizali kosakola nsango malamu na molende mpe, na yango, bato mingi ya motema sembo bazali kokóma baklisto. Baombo libwa basalaki mimbongo malamu mpe bakólisaki bozwi oyo bopesamelaki bango.

Yesu akóbi: “Mosusu ayei koloba ete: ‘Nkolo, tala paláta na yo mokámá oyo ebatelaki ngai kati na litambála. Nabangaki yo, mpo ete ozali moto makasi. Ozali kokamata yango ebómbi yo te, mpe ozali kobuka yango ekoni yo te.’ Alobi na ye ete, ‘Nakokweisa yo na monoko na yo mpenza, yo moombo mabe! Oyebaki ete ngai moto makasi, nakokamata yango ebómbi ngai te, mpe kobuka yango ekoni ngai te. Mpo na nini otyaki mosolo na ngai na babómbi na mosolo te? Bongo na koya na ngai nazwa yango na litombá?’ Alobi na bango batelemi wana ete: ‘Botola ye paláta yango mokámá, mpe pesa yango na oyo azali na paláta nkóto.’”

Mpo na moombo mabe, kobungisama ya paláta na elilingi elimboli kobungisa esika kati na Bokonzi ya likoló. Ya solo, na lolenge mosusu, abungisi libaku kitoko ya koyangela likoló na bingumba zomi to mitano. Moombo oyo abengami moombo mabe, ezali te mpo ete asalaki likambo mabe, kasi mpo ete akólisaki te bozwi na Bokonzi ya nkolo na ye.

Na ntango oyo paláta ya moombo mabe epesami epai na moombo ya liboso, ntembe ebimi ete: “Nkolo, azali na paláta nkoto!” Kasi, Yesu ayanoli ete: “Bakopesa biloko mosusu na oyo azwi, nde mpo na oyo azangi, bakokamata na ye yango ezali na ye. Mpe, mpo na bayini na ngai wana, balingaki te ete nazala mokonzi na likoló na bango, kambá bango awa mpe, bomá bango liboso na ngai.” Luka 19:11-27; Matai 28:19, 20.

▪ Likambo nini lipusi Yesu na kopesa lisese ya paláta?

▪ Nani azali moto na lokumu, mpe mokili epai ye azali kokende ezali nini?

▪ Banani bazali baombo, mpe paláta emonisi eloko nini?

▪ Banani bazali bato na mboka ya moto na lokumu, mpe ndenge nini baomonisi ete bayini ye?

▪ Mpo na nini moko na baombo abéngami moombo mabe, mpe likambo oyo ete babotoli ye paláta elimboli nini?